[1] Yok-pak chiap-tén yu kóng:
[2] Song-ti mò yung kûng-tong tui-thai ngài; Chhiòn-nèn-chá sṳ́ ngài sîm-chûng kân-khú. Ngài chṳ́-tén yún-sên ke Song-ti fat-sṳ:
[3] Tông ngài ke miang hàn chhôi, Song-ti pûn ngài hàn-yû yit-héu hi,
[4] ngài ke choi-sùn chhie̍t-tui m̀ kóng pha̍k-chhe̍t, ngài ke sa̍t-mà chhie̍t-tui m̀ kóng fâ-liâu.
[5] Ngài chhie̍t-tui m̀ sṳ̀n-ngin ngì-têu yû-lî; ngài to sí me oi kiên-chhṳ̀ ngài mò-chhui.
[6] Ngài khok-sin chhṳ-kâ mò m̀-chho̍k, m̀-voi piong-thet liá li̍p-chhòng; ngài hàn chhai sṳ-kiên ke ngit-è, ngài kiên-chhṳ̀ liòng-sîm chhîn-pha̍k.
[7] Ngien ngài ke thi̍t-ngìn tù-tó fái-ngìn yin-kôi su ke po-yin; ngien kûng-kit ngài ke chhiong put-ngi ke ngìn án-ngiòng su hìn-fa̍t.
[8] M̀ kin-vi Song-ti ke ngìn yû má-ke hó hî-mong nè? Song-ti oi sû kì ke miang, kì hàn-yû má-ke phan-mong?
[9] Châi-nan lìm-to kì sṳ̂n-song ke sṳ̀, Song-ti kám oi thâng kì ke khiù-ham?
[10] Kì kám voi yîn-vi Chhiòn-nèn-chá lòi hí-lo̍k? Kì kám voi sòng-sòng hiong Song-ti lòi khì-tó?
[11] Ngài oi chṳ́-kau ngì-têu Song-ti ke khièn-nèn yû kí-thai; ngài ya oi lâu ngì-têu sot-mìn Chhiòn-nèn-chá ke chṳ́-yi.
[12] Ngì-têu tak-sà kám m̀-he chhiòn-phu khon-ko mâ! Cho-má-ke kín kóng mò-tap mò-toi ke fa nè? (Só-fap kóng:)
[13] Song-ti pûn fái-ngìn só-thin ke miang-yun, Chhiòn-nèn-chá oi hìn-fa̍t chhàn-phau ke ngìn, chhiu-he án-ngiòng:
[14] Kì chhiu-son yû chhin-tô lai-é, tak-ke ya voi pûn-ngìn chhṳ̀-sí; kì ke chṳ́-sûn ya voi sṳ̍t m̀-páu.
[15] Ke-têu chhûn-tó ke ngìn voi pot-vûn sí-thet; kì-têu ke koá-fu ya m̀-voi vi kì-têu kieu.
[16] Fái-ngìn sûi-yèn ngiùn-è tô-to son m̀-chhut, yu hàn-yû chok m̀-thet án-tô ke sâm-fu,
[17] chúng-he ngi-ngìn oi lòi chok kì ke sâm-fu, mò-chhui ke ngìn oi lòi pûn kì ke ngiùn-è.
[18] Fái-ngìn ke vuk chhiong tiâu-teu mò kiên-ku, ya chhiong nù-chhòi sú-mong yung ke màu-liàu.
[19] Chúng-yû yit-ngit, hi soi ke sṳ̀ hàn tông-pot, soi-siáng ke sṳ̀, kì ke chhòi-fu chhiu mò lé.
[20] Tet-ngìn-kiâng ke sṳ chhiong thai-súi kiuk-tó kì, thai fûng-chhâi chhai am-pû-thèu chiông kì chhôi-chéu.
[21] Tûng-fûng yit-chhôi, chiông kì tui vuk-hâ chhôi-chéu.
[22] Khòng-fûng oi kûng-kit kì, chhiòn-mò liù-chhìn; kì piang-miang chéu, sióng-oi chéu-chhut fûng-chhâi ke fam-vì.
[23] Ngìn oi phok-sú lòi sâu-nat kì, chhut-sâng kiuk kì lì-khôi pún-thi.