[1] Yu yû yit-ngit, thiên-táng ke chung sṳ̀n-chṳ́ chai lòi chhèu-kien Song-chú, Sat-tan ya chhai kì-têu tông-chûng.
[2] Song-chú mun Sat-tan: “Ngì tui nai-vi lòi â?” Sat-tan en-kóng: “Ngài chhai thi-song tak-vi hàng-lòi hàng-hi, yèn-heu chón-to liá-vi lòi.”
[3] Song-chú mun Sat-tan: “Ngì yû chu-yi tó Ngài ke phu̍k-ngìn Yok-pak mò? Sṳ-kiên mò yit-sà chhiong kì án-hó: cho-ngìn chṳn-chhṳ̍t, kin-vi Ngài, yén-lì fái-sṳ. Ngì sûi-yèn kit Ngài kûng-kit kì, vù-yèn vù-ku châu-tha̍p kì, chúng-he kì hàn-he chhiong thèu-pái án-ngiòng tui Ngài chûng-sîm.”
[4] Sat-tan en-kóng: “ ‘Yung-phì von-phì!’ Ngìn piong-thet só-yû ke yit-chhiet lòi von chhṳ-kâ ke sâng-miang, tak-sà me kâm-ngien.
[5] Chúng-he Ngì na-he chhut-sú sông-hoi kì ke sṳ̂n-thí, kì yit-thin voi tông-mien chu-ma Ngì!”
[6] Song-chú tui Sat-tan kóng: “Hó â, kì chhai ngì ke sú-chûng, chúng-he oi liù kì ke sâng-miang.”
[7] Sat-tan chhiu tui Song-chú mien-chhièn chhut-hi, khôi-sṳ́ tá-kit Yok-pak, sṳ́ kì tui kiok-tái to thèu-nà táng pot thu̍k-chhông.
[8] Yok-pak hi chhô chhai fó-fôi tú, nâ yit-te ngá-sak koat chhṳ-kâ sṳ̂n-hong ke thu̍k-chhông.
[9] Kiâ pû-ngiòng tui kì kóng: “Ngì to liá-ha hàn kiên-chhṳ̀ ngì ke chûng-sîm mâ? Chu-ma Song-ti, hi sí hó nâ!”
[10] Yok-pak en-kóng: “Ngì liá-ke fu-ngìn-kâ ngióng-voi án hâm-chhê! Kám-kóng Song-ti su-fuk pûn ngài-têu, ngài-têu chhiu fôn-hí, Kì kong châi-fo, ngài-têu chhiu chu-ma Kì he-mò?” Sûi-yèn Yok-pak tù-tó án-tô thung-khú, kì hàn-he m̀ khôi-choi chu-ma Song-ti lòi fam-chhui.
[11] Yok-pak yû sâm-ke phèn-yû, chhiu-he Thì-man-ngìn Yî-li-fap, Sû-â-ngìn Pí-le̍t-tha̍t, lâu Nâ-mâ-ngìn Só-fap. Kì-têu thâng-tó Yok-pak tù-tó liá yit-chhiet ke châi-fo, tak-sà chhiu lì-khôi vuk-hâ, chheu-tén hi khon kì, ôn-ví kì.
[12] Kì-têu yén-yén chhiu khon-tó Yok-pak, chúng-he ngin m̀-chhut he kì, tén-to ngin-chhut he kì, chhiu khôi-sâng thai-kieu, tak-sà chhá-lan chhṳ-kâ ke ngoi-sâm, hiong thiên-táng ve chhṳ̀n-fôi, ve chhai chhṳ-kâ thèu-nà táng.
[13] Yèn-heu kì-têu thùng Yok-pak khiung-ha chhô chhai thi-song, chhit-ngit chhit-ya mò kóng yit-ki fa, yîn-vi kì-têu khon-tó Yok-pak ke thung-khú án-thai!