[1] Ngài-têu chhut-se chhiu-he ngiôn-ngio̍k ke, ko-tén tón-chhiam, khú-nan ke sên-fa̍t.
[2] Ngài-têu chhiong fâ-khôi án-ngiòng, chhin-kiak chhiu chhia-thet; yu chhiong yáng-è án-ngiòng, yit-ha-é chhiu chéu-thet.
[3] Song-ti â, chhiong ngài án-ngiòng ke ngìn, Ngì hàn hén pak-muk khon ngài yit-ha, tai ngài ngi̍p fap-yen su sṳ́m-phan mò?
[4] Ô-chô ngìn kám voi chhut chhiang-li ke tûng-sî? M̀-voi, chhie̍t-tui mò khó-nèn!
[5] Ngìn ke su-miang chó chhiu chu-thin hó-se; kì chhai-sṳ ke ngit-è he Ngì kiet-thin. Ngì thin ke kie-han mò-ngìn nèn chhêu-ko.
[6] Khiù Ngì mo̍k khon-tén kì, mo̍k kón kì, pûn kì chhiong chhiáng-lòi ke kûng-ngìn cho-vàn kì ke kûng.
[7] Su-é na-he pûn-ngìn chám hâ-lòi, su-thèu hàn-yû sâng-ngà pau-sún ke hî-mong.
[8] Chhiu-son kîn chhai thi nài-hâ ló-thet, su-thèu chhai nài-tú châu-thet,
[9] súi-fûn chhûng-chiuk, hàn-he voi sâng-ngà pau-sún, chhiong sîn chung ke su-mèu pau-sún yit-yong.
[10] Chúng-he ngìn yit sí, chhiu-he kì ke kiet-khiu̍k; kì thôn-hi yî-heu, oi to nai-vi hi nè?
[11] Chhiu-chhiong fù mò súi, hò-pa súi châu-thet,
[12] ngìn yit sí, chhiu m̀-voi fán-sâng; thiên lap hâ, kì ya m̀-voi hong, chhṳ̍t-chhṳ̍t soi, ham ya m̀-voi siáng.
[13] Ngien Ngì chiông ngài khong chhai yîm-kiên, khong-to Ngì ke nu-hi sêu-thet, chang thin ngit-khì lòi ki-ngiam ngài.
[14] Ngìn na sí-thet, hàn-voi fán-sâng mâ? Ngài chhiu oi tén-to sṳt-fong ke-ngit, ngiûn-to châi-nan ke ngit-è ko-hi.
[15] To ke-sṳ̀, Ngì yit ham, ngài chhiu voi en Ngì; Ngì voi fôn-hí Ngì sú só chhóng-chho ke ngài.
[16] Ke-sṳ̀, Ngì voi chhà-khon ngài ke kiok-phu, chúng-he Ngì m̀ chûi-kiu ngài ke ko-fam.
[17] Ngì voi chiông ngài ke ko-sṳt fûng-ngi̍p thoi-tú, chiông ngài só-yû ke chhui-ok chhiòn-phu châ-koi.
[18] Chhiu-chhiong sân yit pên-thet, ngàm-sa̍k ya sái-chéu hi,
[19] liù súi nò-sún sa̍k-thèu, thai-súi chhûng-chéu thú-thi; Ngì ya án-ngiòng fí-me̍t ngìn ke hî-mong.
[20] Ngì yún-yén yàng-ko ngìn, sṳ́ kì sí-thet, sṳ́ kì mien-mau kói-pien, chiông kì kiuk-chéu.
[21] Kiâ lai-é tet-tó hó miàng-sâng, kì m̀-tî; kì-têu kong-cho pî-mì, kì ya mò kám-kok.
[22] Kì chṳ́ tî chhṳ-kâ sṳ̂n-hong ke thung-khú; kì chṳ́ yû vi chhṳ-kâ yen-than pî-ôi!