[1] Heu-lòi, Song-chú tui thai-fûng tông-chûng fì-tap Yok-pak kóng:
[2] Ngì he má-ngìn, kám fài-ngì Ngài ke chṳ́-yi? Ngì ngióng voi kóng án mò chṳ-sṳt ke fa â?
[3] Khî hí-lòi, chhiong yit-ke yúng-kám ke ngìn; Ngài mun ngì, ngì lòi chṳ́-kau Ngài.
[4] Ngài chhóng-chho sṳ-kie ke sṳ̀, ngì chhai nai-vi? Ngì na-he chṳn-kîn án chhûng-mìn, kóng khon-é!
[5] Ngì kám tî he má-sà thin kì ke thai-se? Má-sà chhai kì ke táng-kô lâi-sien chhet-liòng?
[6] Thai-thi ke kî-chhú ôn chhai nai-vi? Sṳ-kie ke kî-sa̍k má-sà piong ke?
[7] Ke-ngit thiên-kông-sên khiung-ha chhong-kô; thiên-táng chung sṳ̀n-chṳ́ thai-sâng fôn-fû.
[8] Thai-hói tui thi-nài-hâ pau chhut-lòi ke sṳ̀, má-sà koân súi-mùn, pûn kì thìn hâ-lòi nè?
[9] He Ngài yung yùn châ-koi thai-hói, chiông kì pâu chhai thai mùng-yên chûng.
[10] Ngài vi hói-súi thin-hó kie-han, pin ôn súi-mùn yu chhôn hí-lòi.
[11] Ngài lâu kì kóng: Ngì to liá-vi chhiu hó, cho-m̀-tet chhêu-ko; ngì hiûng-khòng ke thai-long yit-thin oi chhai liá-vi thìn hâ-lòi.
[12] Yok-pak â, chêu-sṳ̀n-thèu ke ngit-kông tui nai-vi chhut-lòi? Ngì yit-sên-ngìn tông-chûng kám sṳt tui kì ha-ko min-lin?
[13] Ngì kám yû phan-fap fûn-fu ngit-thèu cheu thai-thi, chiông khong chhai vû-am chûng ke fái-ngìn kiuk chhut-lòi?
[14] Ngit-thèu kín-cheu, thi-song ke sân-kông sân-lak pien-hìn, chhiong chho̍k chhut-lòi ke mù-è, chhiong chap-hó ke sâm-fu.
[15] Thai-kông yit-cheu, ke-têu fái-ngìn chhiu m̀-kám lon-lòi, kì-têu khià hí-lòi ke sú m̀-kám kûng-kit ngìn.
[16] Ngì sṳt lo̍k-hi ko hói-tái mò? Ngì sṳt chhai chhṳ̂m-yên tú hàng mò?
[17] Yû-ngìn chṳ́-sṳ ngì sí-mòng ke mùn mò? Ngì kám sṳt khon-ko yîm-kiên ke mùn mò?
[18] Ngì tî liá sṳ-kie yû kí-thai mò? Na-he ngì tî chhiu lâu Ngài kóng â!
[19] Ngì tî kông tui nai-vi lòi mò? Vû-am ke ngièn-thèu chhai nai-vi?
[20] Ngì voi tai kì-têu chón ngièn-vi hi mò? Ngì tî tai kì-têu chón-hi ke lu mò?
[21] Liá-têu sṳ ngì yin-tông tî, yîn-vi ngì án-ló lé; sṳ-kie su chhóng-chho ke sṳ̀, ngì yí-kîn chhut-se lé!
[22] Ngì kám sṳt ngi̍p-hi piong-siet ke chhông-khu, ya-he khon-ko pên-pho̍k ke chhông-khu mò?
[23] Ngài tún liá-têu, chún-phi chhai kong châi-nan lâu chan-chên ke ngit-è lòi yung.
[24] Kông he tui nai-vi san khôi-lòi? Tûng-fûng tui nai-vi chhôi ko-lòi?
[25] Má-sà vi thai-yí fûn súi-lu? Má-sà vi ngiap-lang khôi lu-sien?
[26] Má-sà lo̍k-súi chhai mò-ngìn he̍t ke só-chhai? Chhai mò-ngìn to ke fông-thi?
[27] Má-sà chṳ̂-yun thiên-hôn ke thi, sṳ́ thú-thi yu sâng-chhut chhiâng-chhó?
[28] Yí-súi yû â-pâ mò? Lu-súi he má-sà kiung ke nè?
[29] Má-sà he pên ke â-mê? Thiên-táng ke sông he má-ngìn kiung ke?
[30] Má-sà sṳ́ súi pien chhiong sa̍k-thèu án-ngang? Sṳ́ hói-mien kiet-pên?
[31] Ngì yû phan-fap chiông Mâu-sên thak khiung-ha mò? Ngì yû phan-fap kié-khôi Lia̍p-fu-sên ke tai-é mò?
[32] Ngì yû phan-fap cheu-sṳ̀ tai khiùn-sên mò? Ngì voi thu thai-se Pet-téu sên mò?
[33] Ngì tî thiên-thí yun-hàng ke kûi-chet mò? Ngì voi kiet-thin thai-thi ke fap-chet mò?
[34] Ngì yû phan-fap sṳ́ yùn thâng ngì fat-chhut ke min-lin mò? Ngì voi ham thai-yí chhiong tó-tén hâ-lòi ke súi mò?
[35] Na-he ngì hiong ngiap-lang fat-chhut min-lin, kì voi to ngì ke mien-chhièn en-kóng: “Ngài chhai liá-vi” mò?
[36] Má-sà pûn chû-lu niâu yû chṳ-fi kóng Nì-lò-hò kí-sṳ̀ voi cho thai-súi? Má-sà su chhûng-mìn pûn kiê-kûng thài kóng voi thiên-kông lé?
[37] Má-sà yû chṳ-fi hi-son yùn-thòn yû kí-lùi? Má-sà yû phan-fap sṳ́ yùn pien-yí tó-tén hâ-lòi?
[38] Má-sà yû phan-fap sṳ́ fôi-chhṳ̀n kiet-khi̍t? Má-sà yû phan-fap sṳ́ nài-fún kiet-thòn?
[39] Sṳ̂-é chhai lùng-tú khù-tén, ya-he chhai chhó-teu-tú phu̍k-tén; ngì yû phan-fap vi sṳ̂-mà chok-tó lia̍p-vu̍t mò? Ngì yû phan-fap sṳ́ se sṳ̂-é sṳ̍t-páu mò?
[41] Vû-â ngo-to pî-lòi pî-hi, se vû-â hiong Ngài khiù sṳ̍t-vu̍t, ke-sṳ̀ má-sà hi vi-páu kì-têu nè?