[1] Thì-man-ngìn Yî-li-fap en Yok-pak kóng:
[2] Ngìn oi lâu ngì kóng-fa, ngì mò nai-sîm lòi thâng he-mò? Chúng-he má-ngìn ngiûn tet-he̍t m̀ kóng-fa nè?
[3] Ngì sṳt kâu-ko chhin-tô ngìn, sṳ́ ngiôn-ngio̍k ke sú yû li̍t.
[4] Ngì ke fa sṳt pûn voi tiet-tó ke ngìn tet-tó kú-li, sṳ́ sôi-ngio̍k ke chhit-thèu yúng-khien hí-lòi.
[5] Liá-ha châi-fo lìm-to ngì sṳ̂n-song, ngì chhiu kiâng-to mò yúng-hi tâm-tông.
[6] Ngì ke kin-khièn mò tai-pûn ngì sin-sîm he-mò? Ngì mò hó-hiàm ke hàng-vì mò tai-pûn ngì hî-mong he-mò?
[7] Ngì sióng khon â: Nai yû mò-chhui ke ngìn me̍t-mòng? Nai yû chṳn-chhṳ̍t ke ngìn hàng-to chhie̍t-lu hi nè?
[8] Cheu ngài khon, kâng sià-ok, ve thu̍k ke ngìn, kì-têu só sû-sṳ̀n ke chhiu-he ok-thu̍k.
[9] Song-ti ke théu-hi sṳ́ kì-têu me̍t-mòng; Song-ti ke fat-khién sṳ́ kì-têu sêu-me̍t.
[10] Thai sṳ̂-é ke ho-sâng chhiòn-phu tiâm-thet; se sṳ̂-é ke ngà-chhṳ́ chhiòn-phu khau-thet.
[11] Ló sṳ̂-é mò hó-sṳ̍t chhiu ngo-sí; se sṳ̂-é ya chhiòn-phu san chhiang-chhiang.
[12] Yû yit-pái ngài am-chûng thâng-tó sêu-sit, ngài ngí-kûng thâng-tó chhin-se ke sâng;
[13] thai-kâ tông hó-soi ke sṳ̀, yû yi-siong lòi káu-chhau ngài.
[14] Ngài kiâng-to pi̍t-pi̍t-chhat; ngài chhiòn-sṳ̂n ke kut-thèu ki̍t-ki̍t-chûn.
[15] Yit-chhṳn fûng chhôi-ko ngài ke mien, sṳ́ ngài kûi-sṳ̂n hí hòn-mô-kû.
[16] Ngài khon-tó yit-chúng hìn-siong thìn chhai ngài mien-chhièn, chúng-he ngin m̀-chhut kì he má-ke. Liá-sṳ̀, chhai tiâm-chhin chûng, ngài thâng-tó chhin-se ke sâng-yîm kóng:
[17] Chhai Song-ti mien-chhièn, má-ngìn khâm-tet chhṳ̂n-cho ngi-ngìn? Chhai chhóng-chho Chú mien-chhièn, yû má-ngìn he sùn-kiet ke?
[18] Lièn thiên-táng ke phu̍k-ngìn, Song-ti ya yí-sṳ m̀-tet; Kì sṳt chṳ́-chhut ke-têu thiên-sṳ́ ke ko-sṳt.
[19] Ngìn he yung nài cho ke, chhiong he̍t chhai nài-vuk tú, pí chu-chhùng kha yùng-yi chak-sí; kám-kóng Song-ti cho-tet yí-sṳ ngài-têu?
[20] Ngìn chêu-sṳ̀n-thèu hàn-sâng, lìm-am-é chhiu sí-thet; kì yún-yén me̍t-mòng, ya mò ngìn chhap kì!
[21] Kiâ chong-phùng ke sok-è pâng thôn-thet; kì sí, ya he mò chṳ-fi lòi sí.