[1] Chiap-tén, Nâ-mâ-ngìn Só-fap en Yok-pak kóng:
[2] Ngì sṳ́ ngài sîm-kôn fàn-chhau, ngài ngiûn m̀-he̍t lé, yit-thin oi en ngì.
[3] Ngì chit-phi ngài ke fa sṳ̍t-chhai tông vú-yu̍k ngìn, chúng-he ngài yû lìn-sin tî ngióng-pân lòi en ngì.
[4] Ngì kám m̀-tî, chhṳ-kú yî-lòi, yû ngìn-lui chhai thi-song khôi-sṳ́,
[5] fái-ngìn ke fôn-hí chhiòn-phu he chhiam-sṳ̀ ke, mò khièn-sṳ̀n ke ngìn khoai-lo̍k ya tong m̀-kiú.
[6] Chhiu-son kì chhṳ-kô, kô to voi tù-thiên, kì ke thèu-nà khià to voi tut-tó yùn,
[7] kì to-mî voi chhiong fun-thú án-ngiòng pûn-ngìn so-thet; sṳt kì ke ngìn chhiòn-phu voi mun, kì chéu nai hi lé.
[8] Kì chhiong mung án-ngiòng sêu-sṳt, yún-yén m̀-voi chai khon-tó; kì chhiong am-pû-thèu ke yi-siong, yit-ha-é chhiu mò-thet.
[9] Khon-ko kì ke ngìn m̀-voi chai khon-tó kì; kì oi tui kì só-he̍t ke só-chhai sêu-sṳt.
[10] Kì ke chṳ́-ńg khú-to oi hi hiong khiùng-khú ngìn khiù-chhìn; kì oi chhîn-sú chiông pok-siok tet-lòi ke chhòi-vu̍t vàn ngìn.
[11] Kì sûi-yèn hàn tông heu-sâng chap-chen, chúng-he mò kí-kiú voi sàng-cho nài.
[12] Kì láu-tó sià-ok chhin kâm-thiàm, chiông kì khong chhai sa̍t-mà tái-hâ,
[13] hàm chhai choi-khûng tú, sòng kì ke mi-tho;
[14] chúng-he sṳ̍t-vu̍t chhai tú-sṳ́ pien sôn, pien to chhiong thu̍k-sà ke chṳp án-thu̍k.
[15] Fái-ngìn thûn-sṳ̍t ke chhòi-fu hàn voi éu chhut-lòi; Song-ti oi tui kì tú-sṳ́ tî-poi lèu chhut-lòi.
[16] Fái-ngìn cho̍t thu̍k-sà ke thu̍k-chṳp; thu̍k-sà ke sa̍t-mà thu̍k-sí kì.
[17] Kì mò miang hó khon-tó kám-lám-yù chhiong hò-pa-súi liù-tén hâ, ya khon m̀-tó nen lâu phûng-thòng chhiong hâi-súi liù chhut-lòi.
[18] Kì oi piong-thet lò-khú tet-lòi, màng hîm-sóng ke yit-chhiet; kì mò kî-fi hó hióng-su kì só tet-tó ke chhòi-fu,
[19] yîn-vi kì ap-pet, khî-chhie̍t khiùng-khú ngìn, yu pa-cham phe̍t-ngìn só-hí ke vuk-sa.
[20] Yîn-vi kì chhin thâm-sîm, yún-yén m̀-tî hó mân-chiuk, kì kak-yi ke tûng-sî lièn yit-hong ya mò-fap pó-liù.
[21] Kì sṳ̍t chhiang-chhiang, má-ke tû mò liù-hâ, só-yî kì ke hen-fuk m̀-voi chhòng-kiú.
[22] Chhai kì chui mân-chiuk sṳ̀n-chhiu ke sṳ̀, yit-chhiet ke châi-fo voi chiap-tén lòi.
[23] Yù-chhai kì chhin-sṳ̍t ke sṳ̀-chiet, Song-ti oi hiong kì thai fat-khién, chhiong fûng-chhâi án-ngiòng kûng-kit kì.
[24] Kì oi sám-khôi thiet-kiam ke sṳ̀, sa pûn thùng-chien chiông kì sa-chhôn.
[25] Kì chiông chien tui poi-heu yit chhû, hâu-kông chien-thèu tui tám-chûng chhut; kì chhiu kiâng-to mien-set la̍k-chhiâng.
[26] Kì ke chhòi-pó chhiòn-phu sêu-me̍t chhiang-chhiang; pin m̀-he ngìn ke sú só-tiám ke fó, chiông kì chhiòn-kâ lâu chhòi-sán sêu kông-kông.
[27] Thiên oi hién-mìn kì ke chhui; thi oi cho-chṳn kûng-kit kì.
[28] Song-ti thai fat-khién ke sṳ̀-chiet, kì ke kâ-ngia̍p voi sún chhiang-chhiang.
[29] Liá he fái-ngìn tui Song-ti só-tet ke kiet-khiu̍k, chhiu-he Song-ti vi kì só kiet-thin ke po-yin.