[1] Yok-pak en-kóng:
[2] Ngien yû ngìn chiông ngài ke yù-sèu chhṳn khon-é, yû ngìn chiông ngài ke châi-nan piong chhai thiên-phìn;
[3] kì-têu pí hói-sùn ke sâ hàn-kha chhûng; só-yî, m̀-hó koai ngài kóng-fa chhû-siu̍k.
[4] Chhiòn-nèn ke Song-ti yung chien sa-tó ngài; chien-thèu ke thu̍k chhe-to ngài ke sṳ̂n-sîm-lìn. Song-ti yung kok-chúng tet-ngìn-kiâng ke châi-nan tá-kit ngài.
[5] Yâ-lì yû chhiâng-chhó chhiu mân-chiuk; ngiù yû chhó hó-sṳ̍t chhiu tiâm-tiâm.
[6] Sṳ̍t-vu̍t mò-hàm mò-mi ngióng sṳ̍t-tet? Lón-pha̍k kám-yû má-ke mi-si nè?
[7] Liá-chúng sṳ̍t-vu̍t ngài mò-oi sṳ̍t, yit-ha lo̍k-choi chhiu sióng-oi éu.
[8] Ngien Song-ti su-pûn ngài só khì-khiù ke, sóng-su ngài só phan-mong ke.
[9] Ngien Song-ti chiông ngài chak-mièn, chhut-sú chiông ngài chién-chhù!
[10] Án-ngiòng, ngài hàn-he voi tet-tó ôn-ví; khú-nan chhûng-to voi sí, ngài hàn voi fôn-hí, yîn-vi ngài chhiùng-lòi m̀-sṳt vì-poi sṳ̀n-sṳn Song-ti ke min-lin.
[11] Ngài nai-yû ngièn-hi kín tén-tén hâ-hi nè? Ngài m̀-tî kiet-khiu̍k, oi ngióng-pân ngiûn-nai nè?
[12] Kám-kóng ngài he sa̍k-thèu cho ke? Kám-kóng ngài ke sṳ̂n-thí he thùng tá ke?
[13] Ngài sṳ̍t-chhai mò phan-fap hó kiu chhṳ-kâ; ngài m̀-tî oi hi nai-vi khiù pông-chhu.
[14] Ke-têu mò yung chhṳ̀-oi tui-thai phèn-yû ke, chhiu he vok-thet tui Chhiòn-nèn-chá ke kin-vi.
[15] Ngài ke hiûng-thi â, ngì-têu chhiong hâi-súi kho m̀-tet, yit-ha mò lo̍k-yí, súi chhiu châu-thet.
[16] Hòn-thiên lo̍k-siet ke sṳ̀, hâi-súi chhiu kiet-pên.
[17] Chhai ngie̍t-thiên sî-yeu súi ke sṳ̀, kì yu châu-thet.
[18] Kûi-chhui sên-lî ngìn chhìm súi-ngièn sa mì-lu, kì-têu hàng m̀-chho̍k lu chhiu sí chhai khóng-yâ.
[19] Kûi-chhui Thì-mâ ke sên-lî ngìn hi chhìm súi; Sṳ-pâ ke lî-hak kín-tén ya kín hî-mong.
[20] Kì-têu ke phan-mong pien-cho thung-khú; kì-têu chhìm m̀-tó súi chhiu sṳt-mong.
[21] Tui ngài lòi-kóng, ngì-têu chhiu-chhiong liá hâi-súi; khon-tó ngài ke chhìn-khóng, chhiu chho̍k-kiâng to-thui.
[22] Ngài kám sṳt hiong ngì-têu khiù má-ke lî-vu̍t, ya-he oi ngì-têu vi ngài hi sû-mâi ngìn?
[23] Ya-he yêu-khiù kiu ngài lì-khôi sù-thi̍t ke sú, ya-he su̍k ngài lì-khôi ke-têu khiòng-phau ke sú?
[24] Hó â, chhiáng ngì kâu ngài, ngài voi tiâm-tiâm thâng; sṳ́ ngài liáu-kié chhṳ-kâ nai-vi m̀-chho̍k.
[25] Kóng-fa kûng-tong chhiu voi sṳ́ ngìn sin-fu̍k; chúng-he ngì-têu to-tái chit-phi má-ke?
[26] Ngài chhie̍t-mong ke fa ngì-têu khon-cho chhiong fûng; cho-má-ke hàn sióng-oi chit-phi kói-chṳn ngài?
[27] Ngì-têu chhû-chhiâm, oi tet-tó kû-yì lòi cho nù-chhòi, sióng-oi chhon-chhièn, ngì-têu hàn-kám chhut-mai hó phèn-yû.
[28] Chhiáng ngì-têu mien-tui-mien lòi khon ngài, ngài chhie̍t-tui m̀-voi kóng fâ-liâu.
[29] Ngì-têu oi fì-sîm chón-yi, m̀-hó án mò kûng-phìn; oi chai sióng khon-é, yîn-vi ngài chṳn-chhṳ̍t mò hî-ká.
[30] Ngài ke sa̍t-mà kám sṳt kóng fâ-liâu, ngài kám m̀-voi fûn-phe̍t sṳ-fî mâ?