[1] Yok-pak â, liá-ha chhiáng thâng ngài ke fa; chu-yi thâng ngài só-oi kóng ke yit-chhiet.
[2] Ngài liá-ha khôi-choi, yung sa̍t-mà kóng-fa.
[3] Ngài oi kóng-chhut chṳ̂n-sîm fa; ngài kóng ke he sṳ̀n-sṳ̍t fa.
[4] Ngài he Song-ti ke Lìn chhóng-chho ke; Chhiòn-nèn-chá ke hi pûn ngài sâng-miang.
[5] Ngì na-he yû fa oi kóng, cho ngì thì chhut-lòi fán-pok.
[6] Ngài chhai Song-ti mien-chhièn lâu ngì khiung-yong; ngài me he yung nài chho ke.
[7] Só-yî ngì m̀-sṳ́ kiâng ngài; ngài m̀-voi pûn ngì ap-li̍t.
[8] Ngì kóng ke liá-têu fa, ngài chhîn-ngí thâng-tó lé.
[9] Ngì kóng: “Ngài mò-chhui, mò cho má-ke m̀-chho̍k; ngài chhîn-pha̍k, mò fam má-ke chhui-ngiak.
[10] Chúng-he, Song-ti chhìm kî-fi tá-kit ngài, chiông ngài khon-cho sù-thi̍t.
[11] Kì yung thiet-lien só-tén ngài ke sûng-kiok; Kì chu-yi khon ngài só-yû ke hàng-tha̍p.”
[12] Chúng-he Yok-pak â, ngài lâu ngì kóng, ngì m̀-chho̍k lé; mò-lun má-ke ngìn, Song-ti pí kì hàn-kha ví-thai.
[13] Ngì cho-má-ke koai-yen Song-ti, kóng Kì m̀ en ngì ke sṳ̂n-su?
[14] Song-ti yit-chhṳ̍t yung kok-chúng fông-fap kóng-fa, chúng-he mò-ngìn chu-yi thâng Kì kóng má-ke.
[15] Am-pû-thèu ngìn tông hó-soi ke sṳ̀-chiet, Song-ti thok mung chhai yi-siong chûng kóng-fa.
[16] Kì tá-khôi ngìn ke ngí-kûng, yung kín-ko lòi hak kì-têu.
[17] Song-ti kóng-fa, ham ngìn lì-khôi chhui-ok, sṳ́ kì-têu m̀-voi chhṳ-kô chhṳ-thai.
[18] Kì m̀-ngien khon-tó kì-têu lo̍k yîm-kiên; Kì oi chṳ́n-kiu kì-têu thot-lì sí-mòng.
[19] Song-ti yung phiang-thung lòi chit-fa̍t ngìn ke ko-sṳt, pûn ngìn phiang-to soi chhai mìn-chhòng, lòi kón-kau kì.
[20] Pot-phiang ke ngìn má-ke tû m̀-sióng sṳ̍t, lièn chhin-hó sṳ̍t ke ya chhiòn mò vi-khiéu.
[21] Kì chheu kia̍p-kia̍p, mò pan-tiám ngiuk, kiâ kut-thèu chhiòn-phu thu̍t chhut-lòi.
[22] Kì ke lìn-fùn chiap-khiun yîm-fú; kì ke sâng-miang lì sí mò-yén.
[23] Song-ti ke chhiên-van thiên-sṳ́ tông-chûng, fe̍t-chá yû yit-vi chhòn-fa ke, lòi chṳ́-sṳ ngìn yin-kôi chhin ke pún-fun.
[24] Thiên-sṳ́ lìn-mén kì, kóng: “Piong kì chéu! Kì m̀-sṳ́ lo̍k-hi sí ke chhṳ̂m-hâng; ngài yû-chhièn su̍k-chón kì ke chhṳ-yù.”
[25] Kì ke sṳ̂n-thí voi fî-fu̍k to chhiong se-ngìn-è; kì voi pien-to chhiong heu-sâng ke sṳ̀ án yúng-khien.
[26] Kì khì-tó, Song-ti chhiu voi fôn-hí en kì; kì oi yung khoai-lo̍k ke sîm kin-pai Song-ti; Song-ti oi lâu kì fî-fu̍k hó ke koân-he.
[27] Kì voi kûng-khôi sṳ̀n-ngin: “Ngài yû fam-chhui, tiên-to sṳ-fî; chúng-he Song-ti pin-mò cheu ngài ke chhui lòi chit-fa̍t ngài.
[28] Kì kiu ngài, sṳ́ ngài m̀-sṳ́ lo̍k sí ke chhṳ̂m-hâng; sṳ́ ngài ke sâng-miang hàn cho-tet khon-tó kông-mìn.”
[29] Song-ti yit-pái yu yit-pái, vi ngìn cho liá yit-chhiet sṳ,
[30] oi kiu ngìn lì-khôi sí ke chhṳ̂m-hâng, sṳ́ kì hióng-su sâng-miang ke kông-mìn.
[31] Liá-ha, Yok-pak â, ngì oi thâng ngài ke fa, ngì oi tiâm-tiâm, hó-hó thâng ngài kóng-fa.
[32] Ngì na-he yû fa oi kóng, chhiu cho-tet en ngài; ngì chhin-liong kóng, ngài ngien-yi chiông ngì tông-cho yû-lî ke.
[33] Na-he ngì m̀-kóng, chhiu tiâm-tiâm thâng; ngài oi chiông chṳ-fi kau-thô ngì.