[1] Ngì nèn yung ǹg kiêu-é chiông hói-koai lâi hí-lòi, ya-he yung sok-è hi thak kì ke sa̍t-mà mò?
[2] Ngì yû phan-fap yung sok-è khien kì ke phi-khûng, ya-he yung kiêu-é chhôn-ko kì ke hâ-ngâm mò?
[3] Kì voi kín-khiù ngì piong kì chéu, ya-he khiù ngì lìn-mén kì mò?
[4] Kì kám voi lâu ngì li̍p-yok, hén yún-yén fu̍k-sṳ ngì mò?
[5] Ngì kám voi chiông kì chún tiâu-é káu mò? Ngì nèn chiông kì thò-tén, pûn ngì ke se-â-moi-é káu mò?
[6] Tá-ǹg ke nèn chiông kì chún fo-vu̍t lòi lun-ka mò? Sên-lî ngìn kám nèn chiông kì pho-khôi lòi mai mò?
[7] Ngì kám nèn yung chok-ǹg ke chhòng-chhiông chhiuk kì ke phì, ya-he yung ǹg-chhâ chhiuk-chhôn kì ke thèu-nà mò?
[8] Ngì sióng-oi chiông kì khim-tén, chai yit-pái chhiu m̀-kám lé; ngì yún-yén m̀-voi m̀ ki-tet lâu kì piang he ngióng-pân tet-ngìn-kiâng.
[9] Khon-ko hói-koai ke ngìn chhiòn-phu hak-tó; mò ngìn kám chṳ-fu̍k kì.
[10] Kì yit su-tó chhiuk-kit, chhiu ok khià-khià; má-ngìn kám khî chhai kì ke mien-chhièn nè?
[11] Chhiu-chhiong án-ngiòng, thiên-ha van-vu̍t lûng-chúng he Ngài ke â! Má-ngìn lâu Ngài chok-tui, hàn-oi ham Ngài phòi kì nè?
[12] Kóng-tó hói-koai, Ngài m̀-kóng ngì kám voi chhîn-chhú? Ngì kám tî kì kí yû-li̍t, he ngióng-pân khiòng-thai?
[13] Má-ngìn yû phan-fap pok kì ke ngoi-sâm, ya-he chhiuk-chhôn kì só-chok ke thiet-kap?
[14] Má-ngìn yû phan-fap ham kì choi tá khôi-lòi? Kì ke ngà-chhṳ́ si chû-vì chhin tet-ngìn-kiâng.
[15] Kì ke poi-nòng yû yit-phài yit-phài ke lìn-kap, hèn-hèn ngiàm khiung-ha, chhiong sa̍k-thèu án-ngang.
[16] Tak-phién lìn-kap siông-lièn khiung-ha, lièn khûng-hi tû theu m̀ lo̍k-hi.
[17] Kì-têu fu-siông ngiàm-to tông-he̍t, mò má-ke nèn chiông kì-têu pak-khôi.
[18] Kì yit-ha tá ha̍p-chhiú chhiu voi fat-chhut kông; muk-chû chhiong thiên-mùng-kông ke ngit-thèu án-kîm.
[19] Kì ke choi voi phùn-fó, yû fó-fâ pî chhut-lòi.
[20] Kì ke phi-khûng ya voi phùn-yên chhut-lòi, chhiong vo̍k-thèu hâ sêu lù-chuk-chhó yîn-hí ke yên.
[21] Kì phùn ke hi sṳ́ fó chho̍k hí-lòi; fó chhiu tui kì ke choi phun chhut-lòi.
[22] Kì ke kiáng-kîn tông-ngang yu fî-sòng yû-li̍t; tù-tó kì ke chhiòn-phu kiâng-to thiau hí-lòi.
[23] Kì ke ngoi-hok tông kiet-sṳ̍t, ngang-to mò ngìn pâng-tet thîn-thûng.
[24] Kì ke sîm ngang-to chhiong sa̍k-thèu, chhiong mo-sa̍k án-ngang.
[25] Kì yit hong-hí-lòi, lièn yúng-sṳ ya chho̍k-kiâng, mò-kat mò-sat, tá-lón-thui.
[26] Tô-kiam mò fap-thu sông-hoi kì; chhiông lâu chien tui kì ya mò-háu.
[27] Tui kì lòi-kóng, thiet chhiong châu-chhó, thùng ya chhiong mut-thet ke su-é.
[28] Kiûng-chien mò fap-thu chiông kì kiuk-chéu; nâ sa̍k-thèu te̍p kì, chhiong vò-kón tá-tó chhiòn mò ngai-tó.
[29] Chhai kì khon-lòi, kun-é chhiu-chhiong vò-kón; kì seu pî ko-lòi ke chhiông, lièn khon tû m̀-khon.
[30] Kì ke tú-sṳ́ phì chhiong tông-chiâm ke ngá-sak; kì-têu chhiong thiet-phà án-ngiòng kín-phà thi-nài.
[31] Kì luk thai-hói, súi chhiu kín-kún, chhiong vo̍k-thèu tú ke yù chhin-kún.
[32] Kì yit chhiù-ko, súi-mien chhiu-chhiong voi fat-kông; kì sṳ́ hói-súi liù-hâ pha̍k-set ke súi-phô.
[33] Thi-song mò khì-thâ thung-vu̍t nèn lâu kì pí; kì má-ke tû m̀-kiâng.
[34] Lièn chui kô-thai ke thung-vu̍t kì ya khon-khiâng; kì he só-yû yâ-chhu ke vòng.