[1] Yok-pak en-kóng:
[2] Liá-chúng fa ngài yí-kîn thâng tô lé; ngì-têu ke ôn-ví fán-chón tai-lòi thung-khú.
[3] Liá-têu khûng-fa hàn kóng m̀-voi so̍t he-mò? Liá-têu fa ngì mo̍k-kóng kám cho-m̀-tet mò?
[4] Na-he von ngì-têu tù-tó ngài só tù-tó ke, ngì-têu só-kóng ke ke-têu fa ngài me voi kóng. Ngài khiung-yong voi chhiong ngì-têu án-ngiòng kín yèu-thèu, phiên yit thai-tôi ke lî-lun lòi chit-phi ngì-têu.
[5] Ngài voi yung hó-thâng ke fa kú-li ngì-têu, ya voi yung choi-sùn phì lòi ôn-ví ngì-têu.
[6] Ngài sûi-yèn kóng-fa, thung-khú m̀-voi thìn; na-he tiâm-tiâm, ngài ke thung-khú hàn-chhôi.
[7] Song-ti â, Ngì sṳ́ ngài thiám-to pan sâng-sí; Ngì sṳ́ ngài kâ-pho ngìn-mòng.
[8] He Ngì chok-tó ngài; he Ngì kûng-kit ngài. Liá-ha ngài chṳ́-yû chhûn-tó phì pâu-kut; phe̍t-ngìn chhiu kóng liá chṳn-mìn ngài yû-chhui.
[9] Song-ti chhai fat-khién chûng pak-lan ngài; Kì ngâu-ngà chhiet-chhṳ́ lòi kûng-kit ngài; ngài ke sù-thi̍t muk chṳm-chṳm khon ngài.
[10] Ngìn yit khôi-choi ngiàm-sṳ̀ sâu-nat ngài. Kì-têu tá ngài choi-kok vú-yu̍k ngài; kì-têu lièn-ha̍p hí-lòi kûng-kit ngài.
[11] Song-ti chiông ngài kâu-pûn chhui-ngìn; chiông ngài fit-lo̍k fái-ngìn sú-chûng.
[12] Ngài pún-lòi sên-fa̍t ôn-thin, chúng-he Song-ti kûng-kit ngài; Kì kha̍k-tén ngài ke kiáng-kîn, chiông ngài te̍p-to sui-sui. Kì chiông ngài chún chien-pá,
[13] Kì ke kiûng-chien-sú si-mien pâu-vì ngài; Kì ke chien sa-tó ngài ke yêu-khiên, ngài ke kôn-tám liù-to thi-nài-hâ; ke-sṳ̀ Kì hàn-he mò lìn-mén ngài.
[14] Kì yit-pái yu yit-pái tá-sông ngài; Kì chhiong yúng-sṳ án-ngiòng kûng-kit ngài.
[15] Ngài pî-sông, kâ-tén yit-liâng mà-sâm; ngài sṳt-chṳ, chhô chhai fó-fôi tông-chûng.
[16] Ngài kieu-to mien fùng-fùng; ngài ke muk-chû chúng-chúng, muk-chû khiên ya vû-vû.
[17] Chúng-he ngài pin-mò fam má-ke thai chhui; ngài ke khì-tó ya he sṳ̀n-sîm sṳ̍t-yi.
[18] Thi â, m̀-hó chiông ngài ke hiet khièm-tén! Mo̍k pûn ngài hêm ke yên-vóng sâng tiâm-thet!
[19] Ngài ke chṳn-ngìn liá-ha chhai thiên-táng; ngài ke chûng-pó oi vi ngài kóng-fa.
[20] Ngài ke-têu phèn-yû yit-chhṳ̍t chhṳ́-seu ngài; ngài chhai Song-ti mien-chhièn muk-chṳp làm-kâm.
[21] Hî-mong chûng-pó vi ngài hiong Song-ti phien-fu, chhiong ngìn vi kì ke phèn-yû phien-fu án-ngiòng.
[22] Yîn-vi ko kí-ngièn, ngài chhiu oi hàng ke-thiàu lu; ngìn hàng ke-thiàu lu, yit-thin m̀-voi to-chón-lòi.