[1] Yî-li-fu ki-siu̍k kóng:
[2] Chhiáng ngì nai-sîm thâng ngài kié-sṳt; ngài oi vi Song-ti kóng kâ-têu.
[3] Ngài só tî ke fam-vì tông-fat, oi nâ-lòi yín-yung; ngài oi sot-mìn ngài ke Chhóng-chho Chú he kûng-chṳn ke.
[4] Ngài só-kóng ke fa chṳn-kîn m̀-he phùn kiê-kôi; chhai ngì mien-chhièn ke he thai yû chṳ-fi ke ngìn.
[5] Khon â! Song-ti thai yû nèn-li̍t, chúng-he Kì m̀-voi méu-sṳ ngìn; Kì ke sîm-sṳ̂ fî-sòng chîn-mìn.
[6] Kì mò-oi yù-chhai fái-ngìn sâng hâ-hi; Kì oi vi khiùng-khú ngìn sṳ̂n-chông chṳn-ngi.
[7] Kì khon-ku chṳn-chhṳ̍t ngìn, yu sat-li̍p kì-têu chhô thai-vi; chhiu-chhiong kiûn-vòng án-ngiòng, kì-têu yún-yén su-ngìn chûn-kin.
[8] Ngìn na-he pûn lien-é khún-tén, pûn khú-nan ke sok-è thak-tén,
[9] Song-ti oi chṳ́-chhut kì-têu só-fam ke chhui-ok, sṳ́ kì-têu tî chhṳ-kâ ke kiêu-ngau lâu chhṳ-thai.
[10] Kì sṳ́ kì-têu ke ngí-kûng thâng-tó kín-ko, fûn-fu kì-têu lì-khôi sià-ok ke tho-lu.
[11] Na-he kì-têu sun-fu̍k Song-ti, sṳ-fung Kì, kì-têu chhiu nèn hióng-su phìn-ôn ke ngit-è, kì-têu ke ngìn-sên ya voi mân-yû hen-fuk.
[12] Na mò sun-fu̍k, kì-têu voi mò-chṳ mò-sṳt, yèn-heu chhiu kîn-ko sí-hò, chin-ngi̍p yîm-kiên.
[13] M̀ kin-vi Song-ti ke ngìn su-tó Song-ti chit-fa̍t; kì-têu kín-sióng kín-khién, chúng-he m̀ khiù Kì pông-chhu.
[14] Kì-têu chhin heu-sâng chhiu sí-thet, sâng-miang chhai vû-ve chûng sóng-thet.
[15] Chúng-he, Song-ti yung khú-nan lòi kiu khú-nan chûng ke ngìn, yung châi-nan sṳ́ ngìn ke ngí-kûng thâng tet-ngi̍p Kì ke fa.
[16] Song-ti tui châi-nan chûng yîn-tai ngì chhut-lòi, sṳ́ ngì chin-ngi̍p tông fat tông phìn-ôn ke thi, sṳ́ ngì chok-si̍t pài mân-mân, sṳ̍p-fûn phông-phai.
[17] Liá-ha ngì tù-tó fái-ngìn ke po-yin; ngì yí-kîn su-tó kûng-ngi ke sṳ́m-phan.
[18] Oi se-ngi, m̀-hó pûn ngìn ke chhòi-pó yín-yu; ya m̀-hó pûn-ngìn thiap heu-sú su-tó koái-phien.
[19] Ngì ke chhòi-fu tui châi-nan yû má-ke yung? Ngì só-yû ke sṳ-li̍t kám-voi pông-chhu ngì?
[20] M̀-sṳ́ phan-mong ke am-pû lòi-to; m̀-sṳ́ kín-tén chung-ngìn voi sêu-me̍t.
[21] Se-ngi ô, m̀-hó hiong sià-ok hàng-tén hi; ngì ke khú-nan kín-ko ngì oi lì-khôi kì.
[22] Oi ki-tet Song-ti ke khièn-li̍t yû kí-thai; kám-yû chhiong Kì án ví-thai ke chṳ́-thô chá?
[23] Má-ngìn cho-tet chṳ́-thin Kì oi cho má-ke? Má-ngìn nèn chit-phi Kì kóng: “Ngì cho m̀-chho̍k”?
[24] Kì só-cho ke yún-yén su-tó siung-chan; ngì ya m̀-hó m̀ ki-tet chan-mî Kì.
[25] Van-mìn khon-tó Kì ke só-cho; sṳ-ngìn tui tông-yén lòi chhà-khon.
[26] Song-ti yû kí ví-thai, ngài-têu mò fap-thu liáu-kié; ngài-têu ya son m̀-chhut Kì to-tái yû kí-tô se.
[27] Song-ti tui thi-song khi̍p-sû súi-hi, chiông kì pien-cho yùn-tú ke yí-súi.
[28] Yí-tiám tui yùn lo̍k-hâ, chhiu chṳ̂-yun chhiòn ngìn-lui.
[29] Má-ngìn mìn-pha̍k Song-ti ngióng-pân san-pu yùn-chhái? Ngióng-pân tui Kì he̍t ke hàng-kiûng fat-chhut lùi-sâng?
[30] Kì yung ngiap-lang cheu thiên-khûng, yung hói-súi châ-koi hói-tái.
[31] Kì chhiu-he án-ngiòng chhṳ-lî van-mìn, yu su kì-têu fûng-fu ke sṳ̍t-vu̍t.
[32] Kì chhîn-sú chóng-kón ngiap-lang, min-lin kì hi-tá muk-phêu.
[33] Kì tá lùi-kûng péu-sṳ voi lo̍k thai-yí, lièn thèu-sâng me chhîn-chhú tî oi sám-khôi.