[1] Yîn-vi án-ngiòng, ngài ke sîm po̍k-po̍k thiàu, khiòng-khiòng voi thiàu lì-khôi kì ke ngièn-vi.
[2] Thâng â, ngì-têu chhiòn-phu oi thâng Song-ti ke sâng, thâng Kì choi-tú só fat-chhut lung-lung-kún ke sâng.
[3] Kì chhâi ngiap-lang chhôn-ko thiên-khûng, tui thiên liá-phién ngiap-to ke-phién.
[4] Sùi-heu, ngìn thâng-tó kì lung-lung-kún ke sâng — lùi-kûng vî-ngiàm ke hióng-sâng, thùng-sṳ̀ ngiap-lang ya kín ngiap mò-thìn.
[5] Song-ti fat-chhut khì-meu ke lùi-sâng; Kì cho ke thai-sṳ, ngài-têu mò-fap lî-kié.
[6] Kì min-lin siet lo̍k chhai thi-song, ya sṳ́ thai-súi lo̍k-to mò-thìn.
[7] Kì thìn-chṳ́ ngìn ke kûng-chok, sṳ́ ngìn tî Kì ke só-cho.
[8] Yâ-chhu chéu-ngi̍p lùng tî-poi, khong chhai kì-têu ke khûng-tú.
[9] Fûng-chhâi tui nàm-fông chhut, hòn-liù tui pet-fông lòi.
[10] Song-ti phùn-hi, súi chhiu kiet-tung, yit thai-phién ke súi chhiu kiet-cho pên.
[11] Kì sṳ́ yùn chhûng-mân súi-hi, sṳ́ ngiap-lang tui yùn fat-chhut.
[12] Kì-têu thèn-tén Song-ti ke chṳ́-fî yù-hàng chón-thung, chhai chhiòn sṳ-kie chûn-hàng Song-ti yit-chhiet ke min-lin.
[13] Song-ti lo̍k-súi chṳ̂-yun thi-mien, hién-mìn Kì tui ngìn ke chhṳ̀-oi; Kì ya lo̍k thai-súi chit-fa̍t ngìn.
[14] Yok-pak â, chu-yi thâng ô! Chhiáng ôn-chhin yit-ha-é, sṳ̂-kháu Song-ti khì-meu ke só-cho.
[15] Ngì kám tî Song-ti ngióng-pân ha min-lin, ngióng-pân sṳ́ ngiap-lang tui yùn-chûng fat-sa?
[16] Ngì kám tî mân-yû chṳ-fi Song-ti khì-meu ke só-cho, ngióng-pân sṳ́ yùn phèu chhai thiên-khûng chûng mâ?
[17] Ngì kám tî nàm-fûng chhôi-lòi, thai-thi chhiu sêu-nôn, liá-sṳ̀ ngì chok ke kí-liâng sâm voi ngie̍t hí-lòi?
[18] Ngì voi hia̍p-chhu Song-ti phû-khôi kiûng-chhông, sṳ́ kì chhiu-chhiong thùng-kiang án-ngang he-mò?
[19] Chhiáng ngì kâu ngài-têu lâu Song-ti oi kóng má-ke; ngài-têu ngong-ngong tong-tong, m̀-tî oi ngióng-pân kóng.
[20] Ngài m̀-kám yêu-khiù lâu Song-ti kóng-fa; kám yû-ngìn sióng-oi chhṳ-kâ chhìm sí-lu?
[21] Sṳ-sṳ̍t song, fûng yit-chhôi, yùn chhiu san, thiên-táng kông to fî-sòng án chhiuk-muk; mò-ngìn nèn ngo-thèu hi khon ke kông.
[22] Pet-fông yû kîm-set ke thai-kông chhut-hien; Song-ti ke vî-ngiàm sṳ́ ngài-têu kin-vi.
[23] Chhiòn-nèn-chá thai-yû nèn-li̍t, ngài-têu mò fap-thu chiap-khiun; chúng-he Kì yû kûng-ngi lâu chṳn-chhṳ̍t, m̀-voi khî-fu ngìn.
[24] Yîn-vi án-ngiòng, thai-kâ lûng-chúng kin-vi Kì; chúng-he Kì m̀-tap chhṳ-chok chhûng-mìn ke ngìn.