[1] Fariisota keeysaa, namticha Niqoodemos jedhamu tokkoo tu ture; inni miseensa mana marii Yihudootaa ti ture.
[2] Inni kun halkan keeysa gara Yesuus dhufee ti, “Yaa mu'allimuu, akka ati barsiisaa taatee Rabbi biraa dhufte, nuti ni beeyna; nam tokko illeen yoo Rabbi isaa wajjiin jiraate malee, milikkita mu'ujizaa ati agarsiiftu kanneen, dandayee hin agarsiisu” isaan jedhe.
[3] Yesuus, “Dhugumaan sitti hima, eenyu illeen lammaffaa dhalachuu yoo baate, Mootummaa Rabbii arkuu illee hin dandayu” jedhee ti deebiseef.
[4] Niqoodemos ammoo, “Namni jaarsa tahe, akkamitti dhalachuu dandaya? Gadaameeysaa haadha isaatti lammaffaa galee, dhalachuu ni dandayaa?” jedhee ti Yesuus gaafate.
[5] Kanaaf Yesuus, “Dhugumaan sitti hima, eenyu illeen bishaanii fi Ruuhal Qudus irraa yoo dhalachuu baate, Mootummaa Rabbii seenuu hin dandayu.
[6] Kan jasada irraa dhalate jasada, kan ruuhaa irraa dhalatees ruuhaa dha.
[7] Lammaffaa dhalachuu dha qabda siin jechuun kiyya, baasa sitti hin tahin.
[8] Qilleensi gara fedhetti qilleensawa, soowtii isaa ni dhageeysa, eeysaa akka inni dhufu, eeysattiis akka inni deemu garuu hin beeytu; eegasuu kanneen ruuhaa irraa dhalatan hundi niis akkuma kana” jedhee ti deebiseef.
[9] Niqoodemos deebisee, “Kun akkamitti tahuu dandaya?” jedhee ti Yesuus gaafate.
[10] Yesuus deebisee, “Ati barsiisaa Israa'el taatee waan kanneen hubachuu hin dandeeysuu?
[11] Dhugumaan sitti hima, nuti waan beeynu dubbanna, waan agarreef ragaa baana; tahu illee isin ragummaa keenya hin fudhattan.
[12] Waa'ee waan lafa irraa isinitti himnaan, hin amantan taanaan, eegasuu, waa'ee waan samii irra yoon isinitti hime, akkamitti amantu ree?
[13] Ilma Namaa isa tokkicha samii irraa gad bu'e sana malee, nam tokko illeen samii hin seenne.
[14] Akkuma Museen huffee gammoojjii keeysatti bofa ol kaasee fannise sanatti, Ilmi Namaa tiis akkasumatti ol kaafamuu dha qaba.
[15] Kuniis Ilma Namaatti kan amanu hundinuu jireenya bara baraa haa qabaatuuf jecha.
[16] “Rabbi akkanumatti tokkicha Ilma isaa hamma kannuufitti addunyaa jaalate; kan isatti amanu hundinuu jireenya bara baraa haa qabaatuufi malee, haa baduufii miti!
[17] Rabbi addunyaatti farachiisuuf odoo hin tahin, biiyti addunyaa isaan najaa haa baatuuf jecha Ilma isaa addunyaatti erge.
[18] Ilma isaatti kan amanu firdiin itti hin godhamtu, isatti kan hin amanne garuu, maqaa tokkicha Ilma Rabbitti waan hin amaniniif jecha, ammuma illee duruun firdiin itti godhatee ti jirti.
[19] Ifni gara addunyaa dhufee ti jira, namoonni garuu hojiin isaanii hamtuu waan taheef jecha, ifa irra dukkana jaalatan; firdichi niis akkuma kanatti ni raawwatama.
[20] Namni hamaa hojjatu hundinuu ificha ni jibba, hojiin isaa akka irratti hin beekamneef gara ifaatti hin bahu.
[21] Dhugaa dhaan kan jiraatu garuu hojiin isaa, inni akka fedha Rabbitti hojjatame, haa mullatuuf jecha gara ifichaatti ni baha” jedheeni.
[22] Kana booddee, Yesuusii fi barattoonni isaa gara kutaa Yihudaa ti deeman; Yesuus barattoota isaa wajjiin hamma takka achi bubbule, ni cuuphaas ture.
[23] Yohannis ammoo magaalaa Enon kan Saalemitti dhihoo, bakka bishaan hedduun itti arkamu sanitti ni cuupha ture; namoonni niis achi dhaqanii ni cuuphaman.
[24] Yohannis wayta sana hin hidhamne ture.
[25] Hogguus barattoonni Yohannisii fi Yihudii tokko jiddutti waa'ee seera xaaharummaa irratti falamaan ni kaate.
[26] Barattoonni sun gara Yohannis dhufanii, “Yaa barsiisaa, namtichi Yordaanos gama sii wajjiin ture, kan atuu ragaa baateef sun kunoo ni cuupha; namoonni hundinuu gara isaa yaa'aa ti jiru” jedhanii ti itti himan.
[27] Yohannis hogguus deebisee, “Namni waanuma samii irraa isaaf kanname malee, waa takka illee fudhachuu hin dandayu.
[28] ‘Ani Kiristoosii miti, garuu kan isa dura ergamee dha’ jedhee dubbachuu kiyyaaf, isinuu ragaa naaf baatu.
[29] Aruuztittiin tan aruuztichaa ti, miliseen dhaabbatee isa dhaggeeyfatu garuu sagalee aruuztichaa hogguu dhagayu hedduu dha gammada; aniis haaluma akkasitti kunoo amma gammachuun tiyya anaaf guutamte.
[30] Inni guddina dabalachaa deemuu dha qaba, ani ammoo xiqqaachaa deemuu tu na irra jira” jedhe.
[31] Yohannis itti furee, “Inni olii dhufu hunduma irraa oli; namni lafa kanaa kanuma lafaa ti, waanuma lafa irraa ti dubbataasi, inni samii irraa dhufu hunduma irraa oli.
[32] Inni waan arkee fi waan dhagayeef ragaa baha; garuu ragummaa isaa nam tokko illeen hin fudhatu.
[33] Namni ragummaa isaa fudhatu, Rabbi, Abbaa dhugaa tahuu isaa ti mirkaneeysa.
[34] Inni Rabbiin erge, Qoowlii Rabbii ti dubbata, Rabbiis isaaf ruuhaa huu saffaraan maleetti kannaafi.
[35] Abbaan Ilma isaa ni jaalata, waan hundumaas harka isaatti kannee ti jira.
[36] Namni Ilma Rabbitti amanu, jireenya bara baraa ti qaba; kan Ilma Rabbii tiif ajajamuu didu garuu jireenya hin arku, lola Rabbii tu isa irratti hafa malee” jedhe.