[1] Kana booddee Yesuus bishaan Garba Galiilaa, kan bishaan Xiberiyaas jedhamu gamatti ceehe.
[2] Namoonni hedduun, warra dhukkubsatan fayyisuu isaa tiin milikkita mu'ujizaa inni godhe waan arkaniif jecha, isa duukaa dha bu'an.
[3] Yesuus hogguus barattoota isaa wajjiin gaara tokko irratti ol bahee ti taa'e.
[4] Wayta sana Ayyaanni Bira Dabruu warra Yihudootaa dhihaatee ti ture.
[5] Yesuus achi millatee, namoonni hedduun akka gara isaa dhufaa jiran arkee ti, “Biddeena jarri kun nyaatan eeysaa binna?” jedhee ti Filiphoos gaafate.
[6] Kana godhuun isaa waan Filiphoos jedhu laaluuf jecha malee, Yesuus waan godhuuf deemu ni beeka ture.
[7] As irratti Filiphoos deebisee, “Biddeenni, meeta dhibba lamaan yoo binne illee xiqqoo xiqqottuu, hunda isaanii wal hin gahu” jedheeni.
[8] Indiriiyaas, obboleeysi Simoon Phexiroos, barattoota isaa keeysaa tokko kan ture, Yesuusiin,
[9] “Gurbaan biddeena garbuu shanii fi kalluuna lama qabu tokko as jira; garuu namoota dila kanaaf eeysatti gaha?” jedheeni.
[10] Yesuus ammoo, “Namoota teeysisaa!” jedhee ti ajaje. Achi coqorsa hedduu tu jira ture; namoonni dhiiraa warra kuma shan tahanii tu coqorsa sana irra tattaa'an.
[11] Kana booddee Yesuus biddeennan sana fuudhee, Rabbiif galata galchee, warra tattaa'aniifiis hamma isaan fedhan hireef; kalluunticha irraa hiis akkasumatti hireef.
[12] Namoonni nyaatanii eega quufan, Yesuus, “Waan takka illeen akka hin qisaasamne, hambaa hafe walitti qabaa!” jedhee ti barattoota isaatti hime.
[13] Hambaa biddeennan garbuu shanan jarri nyaatan irraa hafe, safii kudha lama guutuu dha walitti qaban.
[14] Namoonni sun milikkita mu'ujizaa Yesuus agarsiise kana hogguu arkan, “Kun dhuguma nabiyyicha, isa gara addunyaa dhufuuf jiru sana” jedhan.
[15] Yesuus namoonni kun dhufanii humnaan isa qabanii, mootii godhuuf akka ka'an hubatee ti, kophaa isaa ammaas gara gaaraatti jalaa deeme.
[16] Hogguu galgalaawe, barattoonni isaa gara garba bishaanii sanitti gad bu'an.
[17] Duruun dukkanaawe; Yesuus amma illee gara isaanii hin dhufne; isaaniis doonii seenanii ti gama Qifirnaahomitti ceehuuf ka'an.
[18] Bubbeen jabduun bubbifnaan, bishaantichi ni raafame.
[19] Toora kiilo metrii shanii takka doonii dhaan eega deeman booda, Yesuus bishaan gubbaa deemaa gara doonichaatti odoo dhihaatuu arkanii ti sodaatan.
[20] Yesuus garuu, “Abshir bar, anaa” isaaniin jedhe.
[21] Isaan gara doonicha irratti isa baasuu dha barbaadan; doonichi garuu hogguusuma qarqara bishaantichaa bakka itti deemaa turan gahe.
[22] Guyyaa borumtii warri bishaanticha gamatti hafan sun, kaleeysa dooniin takka qofa akka achi turte, Yesuus ammoo barattoota isaa wajjiin doonicha akka hin seeninii fi barattoonni kophaa isaanii doonichaan akka deeman ni hubatan.
[23] Haa tahu malee, dooniin warri biraa Xiberiyaasii gara bakka sanaa dhufanii ti jiru; bakkiti sun ammoo lafa itti Gooftaan galata galchee, namoonni biddeena itti nyaatan sanatti dhihoo dha turte.
[24] Namoonni sun, Yesuusii fi barattoonni isaa tiis akka achi hin jirre beekanii ti, doonota seenanii Yesuus barbaacha gara Qifirnaahomitti ceehan.
[25] Hogguus namoonni Yesuus bishaanticha gamatti arkanii ti, “Yaa barsiisaa! Yoom as geeyse?” isaan jedhan.
[26] Yesuus ammoo deebisee, “Dhugumaan isinitti hima, isin milikkita mu'ujizaa waan agartaniif odoo hin tahin, biddeena nyaattanii waan quuftaniif na barbaaddu.
[27] Nyaata baduuf hin laffa'inaa, nyaata jireenya bara baraa tiif tahuuf malee! Ilmi Namaa kan Rabbi Abbaan sumuda isa irratti godhee tu, nyaata kana isiniif kannuuf taa'a” isaaniin jedhe.
[28] Isaan hogguus, “Eegasuu fardii Rabbii godhuuf maal hojjachuu tu nu irra jira?” jedhanii ti isa gaafatan.
[29] Yesuus deebisee, “Fardii Rabbii godhuun isa tokkicha inni ergetti amanuu dha” jedheeni.
[30] As irratti isaaniis, “Agarree akka sitti amannuuf jecha, milikkita mu'ujizaa maal nu agarsiifta? Maaliis goota?
[31] Akka Kitaabni himutti, ‘Inni samii irraa akka nyaataniif biddeena ergeef’, abbootiin teenya huffee gammoojjii keeysatti nyaata ‘Maannaa’ jedhamu nyaatanii ti jiru” jedhaniin.
[32] Yesuus ammoo deebisee, “Dhugumaan isiniin jedha, Musee miti, kan biddeena samii irraa isiniif kanne, Abbaa kiyyaa tu biddeena dhugaa dhaa samii irraa isiniif kanna malee.
[33] Biddeenni Rabbii kan samii irraa gad dhufee, addunyaa tiifiis jireenya kannu isa” jedheeni.
[34] Isaan ammoo, “Yaa Gooftaa, biddeena kana hoggayyumaaf nuuf kanni” jedhaniin;
[35] hogguus Yesuus, “Ana biddeenni jireenyaa, gara kiyya kan dhufu abadan hin beelawu, kan anatti amanuus abadan hin dheebotu.
[36] Akkumaan ani isinitti hime, isin ana agartanii ti jirtu, garuu hin amantan.
[37] Warri Abbaan kiyya anaaf kannu hundinuu, gara kiyya dhufu, namuma gara kiyya dhufuus ani if irraa achi hin arihu.
[38] Ani wanniniin samii irraa itti gad bu'eef, fedha kiyya godhuufii miti, ammoo fedha isa ana ergee raawwachuufi malee.
[39] Warra inni anaaf kanne hundumaa keeysaa tokko illee odoon hin bachiisin, ammoo guyyaa dhumaatti du'aa akkaan isaan kaasu fedha isa ana ergee ti.
[40] Abbaan kiyya, namni Ilma isaa millatee isatti amanu hundinuu, jireenya bara baraa akka qabaatu fedha; ammaas aniis guyyaa dhumaatti du'aa isa niin kaasa.”
[41] Warri Yihudootaa, waan inni, “Ani biddeena samii irraa gad bu'ee dha” ifiin jedheef, isa irratti guunguman.
[42] Isaan, “Kun Yesuus ilma Yoseef kan nuti haadhaa fi abbaa isaa beeynuu mitii? Irrattuu akkamitti inni ‘Samii irraa hiin gad bu'e’ jedha ree?” jedhan.
[43] Yesuus deebisee, “Walitti hin guunguminaa!
[44] Abbaan inni ana erge yoo isa harkise malee, nam tokko illeen gara kiyya dhufuu hin dandayu; nama gara kiyya dhufu ammoo, aniis guyyaa dhumaatti isa du'aa niin kaasa.
[45] Kitaaba nabiyyootaa keeysatti, ‘Hundi isaanii warra Rabbiin barsiifaman tahu’ jedhamee barreeyfamee ti jira; Abbaa kiyya dhaggeeyfatee ammaas isa irraa barate hundinuu gara kiyya dhufa.
[46] Namni tokko illeen Abbaa hin agarre, isa kan Rabbi biraa dhufe sana malee, isa qofaa tu Abbaa arke.
[47] Dhugumaan isinitti hima, namni amanu jireenya bara baraa ti qaba.
[48] Ana biddeenni jireenyaa.
[49] Abbootiin teeysan huffee gammoojjii keeysatti nyaata ‘Maannaa’ jedhamu nyaatan, haa tahu malee ni du'an.
[50] Biddeenni samii irraa gad bu'u kunoo ti; namni isa nyaatu hin du'u.
[51] Ani biddeena jiraataa, kan samii irraa gad bu'ee dha; namni tokko illeen biddeena kana irraa yoo nyaate, bara baraaf ni jiraata; biddeenniniin jireenya addunyaa tiif kannu, jasada kiyya” isaaniin jedhe.
[52] As irratti Yihudoonni, “Namtichi kun akkamitti jasada isaa akka nyaannuuf nuuf kannuu dandaya?” jedhanii ti walitti falaman.
[53] Yesuus ammoo, “Dhugumaan isiniin jedha, isin jasada Ilma Namaa yoo nyaattan malee, dhiiga isaa tiis yoo dhuydan malee, jireenya if keeysaa hin qabdan.
[54] Abbaan fedhe huu kan jasada kiyya nyaatee, dhiiga kiyyaas dhuge, jireenya bara baraa ni qaba; aniis guyyaa dhumaatti du'aa isa niin kaasa.
[55] Jasadni kiyya, nyaata dhugaa dhaa ti, dhiiyni kiyyaas, dhugaatii dhugaa dhaa ti.
[56] Jasada kiyya kan nyaatu, dhiiga kiyyaas kan dhugu ana keeysa jiraata, aniis isa keeysaan jiraadha.
[57] Akkuma Abbaan jiraataan ana erge, aniis isaan jiraataa akkumaan tahe, namni jasada kiyya nyaatuus akkasumatti kan anaan jiraatu taha.
[58] Kunoo kana biddeenni samii irraa gad bu'e; akka mannaa abbootiin teeysan nyaatanii, booddee ammoo du'anii tii miti; namni biddeena kana nyaatu, bara baraaf ni jiraata” jedhe.
[59] Yesuus kana hundumaa Qifirnaahom mana sagadaa keeysatti hogguu barsiisu dubbate.
[60] Barattoota isaa keeysaa hedduun kana dhagayanii, “Kun jecha jabaa dha, eenyuu tu kana fudhachuu dandaya?” jedhan.
[61] Yesuus ammoo barattoonni isaa as irratti guungumuu isaanii beekee ti, “Tana tu isin gufachiisaa?
[62] Ilma Namaa kan bakka dur turetti ol bahuu irra jiru, yoo agartan hoo, akkam ree?
[63] Ruuhaa kan jireenya kannu, jasadni humaa keeysa hin jiru; qoowliin ani isinitti dubbadhe tun ruuhaa dha, jireenyaasi.
[64] Garuu isin keeysa warri hin amanne jiru” jedhe. Yesuus jalqabumaa kaasee isaan keeysaa warri hin amanne, eenyu dabarsee akka isa kannuus ni beeka ture.
[65] Yesuus, “Kanaafiin ‘Abbaa biraa yoo kannamuuf baate, nam tokko illeen gara kiyya dhufuu hin dandayu’ jedhee isinitti hime” jedhe.
[66] Wayta sanaa jalqabanii barattoota isaa keeysaa hedduun booddeetti irraa deebi'an; eegas booda isaan wajjiin hin deemne.
[67] Yesuus hogguus warra kudha lamaaniin, “Isin illeen ammaas deemuu dha barbaadduu?” jedhee ti gaafate.
[68] Simoon Phexiroos deebisee, “Yaa Gooftaa, si dhiifnee eenyu bira dheeyna? Qoowlii jireenya abad sii tu qaba.
[69] Nutiis ni ammanna, ammaas akka ati tokkicha qulqulluu Rabbii taatees ni beeyna” jedhan.
[70] Yesuus ammoo, “Kudha lamaan keeysanuu anaa tu file mitii? Isin keeysaa garuu inni tokko, Sheeyxaana” isaaniin jedhe.
[71] Kanaas waa'ee Yihudaa ilma Simoon, nama Keriyot sanaaf dubbate; inni kunoo kudha lamaan keeysaa tokko tahu illee, dabarsee isa kannuuf deema ture.