[1] Kana booddee Yihudoonni Isa ajjeesuuf waan yaadaniif jecha, Yesuus kutaa Galiilaa keeysa deddeeme malee, kutaa Yihudaa keeysa deddeemuu hin barbaanne.
[2] Hogguus Ayyaanni Daasaa, kan warra Yihudootaa tokko dhihaatee ti ture.
[3] Obboleeyyan Yesuus ammoo, “Barattoonni kee dalagaa ati hojjattu akka arkaniif, asii ka'ii tii, kutaa Yihudaatti deemi!
[4] Namni zaahiritti beekamuu barbaadu, dalagaa isaa dhooysatti hin hojjatu; amma garuu ati dalagaa tana hundumaa kan hojjattu eega taate, addunyaatti if mullisi!” isaan jedhan.
[5] Obboleeyyanummaan isaa ti illeen isatti hin amanne turan.
[6] Yesuus ammoo, “Za'aan tiyya amma illee hin geenye, isiniif garuu za'aan hundinuu mijjaawaa dha.
[7] Biiyti addunyaa isin jibbuu hin dandeeysu; ana garuu, hojiin isii hamtuu akka taate waaniin ragaa itti bahuuf jecha, na jibbiti.
[8] Isin gara ayyaantichaatti ol bahaa, ani garuu, za'aan tiyya waan hin raawwataminiif jecha, amma illee gara ayyaana kanaatti ol hin bahu” jedhee ti isaaniif deebise.
[9] Tana isaaniin jedheetuma, Galiilaatti hafe.
[10] Obboleeyyan isaa gara ayyaantichaatti eega ol bahan booddee, Yesuus ammoo zaahiritti odoo hin tahin, dhooysatti ol bahe.
[11] Yihudoonni warri Yesuusiin morman, “Namtichi sun eeysa jira?” jechaa ayyaanticha irratti ni iyyaafatu turan.
[12] Namoonni niis waa'ee isaa ni guungumu turan; isaan keeysaa garri tokko, “Inni nama gaarii dha” jedhan, garri kaan ammoo, “Lakkisaa, inni karaa irraa namoota dogoggorsiisa” jedhan.
[13] Haa tahu malee, Yihudoota warra Yesuusiin morman waan sodaataniif jecha, isaan keeysaa nam tokko illeen waa'ee isaa zaahiritti hin dubbanne.
[14] Guyyoonni ayyaantichaa torban eega walakkaawan, Yesuus Beeytal Maqdas ol seenee ti barsiisutti ka'e.
[15] Yihudoonni warri Yesuusiin morman, “Namtichi kun qaraatiin maleetti akkamitti kitaabota beeke?” jedhanii ti ajaa'iban.
[16] Yesuus ammoo isaaniif deebisee, “Qaraatiin ani barsiisu, tan isa ana ergee ti malee tiyyaa miti.
[17] Namni fedhii Rabbii raawwachuu barbaade, ilmiin tun Rabbi biraa tahuu isii, yookaan ifuma irraa fuudhee dubbachuu kiyya addaan ni hubata.
[18] Namni if keeysaa fuudhee dubbatu, ulfina mataa isaa tii barbaada; namni ulfina kan isa ergeef barbaadu garuu nama dhugaa ti, jallinni niis isa keeysa hin jiru.
[19] “Museen seera isiniif kannee ti jiraa mitii? Isin keeysaa tokko illeenuu seericha hin eeyne. Maaliif ana ajjeesuu barbaaddu ree?” jedheeni.
[20] Jarri as irratti, “Sheeyxaanaa tu si keeysa jira! Eenyuu tu si ajjeesuu barbaada?” jedhaniin.
[21] Yesuus ammoo deebisee, “Ani dalagaa isin ajaa'ibsisu tokko godhee tiin jira, hundi keeysanuu ni birrattan.
[22] Museen seera dheeyna-qabaa ti isiniif kanne; dheeyna-qabaan kun illeen abboottan irraa dhufe malee, Musee dhaan hin jalqabamne; isin ammoo guyyaa Sanbataatti illee dha nama dheeyna qabdu.
[23] Seerri Musee odoo hin caphin, daa'imni guyyaa Sanbataatti kan dheeyna qabamu eega tahe, eegasuu ani guyyaa Sanbataatti waaniin guutuu namaa tokko fayyiseef jecha, anaan loltuu ree?
[24] Firdii haqaa kannaa malee, akkuma isinitti fakkaatetti hin faradinaa!” isaaniin jedhe.
[25] Amma ammoo namoonni Yerusaaleem tokko, “Namtichi kun kan isaan ajjeesuu barbaadanii mitii?
[26] Kunoo, inni zaahiritti dubbachaa ti jira; isaaniis waa takka illee isatti hin dubbatan; warri hooggantoonni, akka inni Masiihicha tahe dhuguma hubatanii tahinnaa?
[27] Haa tahu malee, namtichi kun eeysaa akka tahe ni beeyna; Masiihichi hogguu dhufu garuu, eeysaa akka inni tahe, nam tokko illeen hin beeku” jedhan.
[28] As irratti Yesuus odoo Beeytal Maqdas keeysatti barsiisaa jiruu, sagalee isaa ol fudhatee, “Dhuguma ana ni beeytu, ammaas bakkaan irraa dhufees ni beeytu. Ani ifumaan hin dhufne, inni ana erge amanamaa dha; isin ammoo isa hin beeytan.
[29] Ani garuu isa biraa hiin dhufe, isaa tu na erge; kanaafiin isa beeka” isaaniin jedhe.
[30] As irratti isa qabuu jarraban; garuu waytiin isaa amma illee waan hin gahiniif jecha, namni tokko illeen harkaan isa hin qabne.
[31] Ummata sana keeysaa namoonni hedduun Yesuusitti amanan; isaaniis, “Masiihichi hogguu dhufu, waan namtichi kun agarsiise irra caalaa milikkita mu'ujizaa ni agarsiisaa laata?” jedhan.
[32] Fariisonni hogguus namoota waa'ee Yesuus guunguman dhagayanii ti, luboonni warri angafoonninii fi Fariisonni niis Yesuus qabsiisuuf waardiyyoota isaanii isatti ergan.
[33] Yesuus hogguus, “Kunoo, ani amma wayta gabaabduu qofaafiin isin bira tura; achiin booda gara isa ana ergee tiin deema.
[34] Isin na barbaaduuf teeysu, garuu ana hin arkattan; bakkaan ani jiruus dhufuu hin dandeeysan” jedhe.
[35] Yihudoonni warri Yesuusiin morman, “Akka nuti isa hin agarreef, namtichi kun eeysa dhaquu dha yaada? Gara Yihudoota warra Giriigii keeysa faca'anii dhaqee, Giriigota barsiisuu dha yaadaa laata?
[36] ‘Isin ana barbaaduuf teeysu, garuu ana hin arkattan; bakkaan ani jiruus dhufuu hin dandeeysan’ jechuun isaa, maal jechuu isaa ti?” jedhanii ti walitti dudubbatan.
[37] Guyyaan dhuma ayyaantichaa, kaan hunduma irra caalaa kabajamaa dha; guyyaa sana Yesuus ka'ee dhaabbatee, sagalee isaa ol fudhatee, “Namni dheebote yoo jiraate gara kiyya dhufee haa dhuguu.
[38] Namni Anatti amane, akkuma Kitaabni dubbatetti, ‘Madda bishaan jiraataa tu garaa isaa keeysaa burqa’” jedhe.
[39] Yesuus kana jechuun isaa waa'ee Ruuhal Qudus, kan warri isatti amanan fudhachuuf taa'aniif dubbate; inni bakka durrii ulfina isaatti waan ol hin fudhataminiif jecha, Ruuhal Qudus amma illee hin kannamne ture.
[40] Warra dubbii tana dhagayan keeysaa jarreen tokko, “Namtichi kun dhuguma nabiyyii dha” jedhan.
[41] Warri kaan ammoo, “Inni Kiristoosi” jedhan; warri hafan garuu, “Kiristoos Galiilaa dhaa dhufaa?
[42] Kitaabtichi, Kiristoos shanyii Daawwid keeysaa Beetliheem ganda Daawwid itti jiraate irraa akka dhufu hin himnee ree?” jedhan.
[43] Namoonni eenyummaa Yesuus irratti yaadaan gargar bahan.
[44] Isaan keeysaa hammi tokko isa qabuu dha barbaadan; garuu namni tokko illeen harkaan isa hin qabne.
[45] Waardiyyoonni warri Yesuusitti ergaman, gara luboota warra angafootaa tii fi gara Fariisotaatti deebi'an; isaan ammoo, “Maaliif Yesuus qabdanii hin fidinaa?” jedhanii ti waardiyyoota gaafatan.
[46] Waardiyyoonni niis “Akka namticha kanatti takkaa namni dubbatee hin beeku” jedhanii ti deebisaniif.
[47] As irratti warri Fariisotaa, “Isinuma illee karaa irraa dogoggorsiise jechuu dhaa?.
[48] Haa tahuu, warra hooggantoota yookiin warra Fariisotaa keeysaa kan isatti amanan jiruu?
[49] Lakkii, saba ballaa seera Musee dhaan kanname hin beeyne qofa; isaanuu warra abaaramoo dha” jedhaniin.
[50] Niqoodemos, namtichi duraan gara Yesuus dhaqe, ammaas warra Fariisotaa sana keeysaa tokko kan ture,
[51] hogguus, “Seerri keenya afaan namticha irraa odoo hin dhagayin, waan inni hojjatees odoo hin hubatin namuma fedhe irrattuu ni farachiisaa?” isaaniin jedhe.
[52] Isaan garuu deebisanii, “Atummaanuu nama Galiilaa tahinnaa? Kitaabticha xiinxalii ilaali! Galiilaa dhaa nabiyyiin akka hin kaane” jedhaniin.
[53] Kana booddee hundi isaanii gara mana isaanitti galan.