[1] Hogguus Philaaxos, Yesuus achii fuudhee ti garafsiise.
[2] Warri loltuu dhaa gonfoo qoree hojjatanii ti, mataa isaa irra kaayan; uffata jaanoo tiis isatti uwwisan.
[3] Gara isaatti deddeebi'anii, “Akkam ree, yaa mootii Yihudootaa!” jechaa isa ni kakkabalu turan.
[4] Philaaxos ammaas gad bahee ti, “Yakka tokko illee akkaan isa irratti hin arkin akka beeytaniif, kunoo gara keeysanittiin gad isa baasa” isaaniin jedhe.
[5] Yesuus ammoo gonfoo qoree kaayatee, uffata jaanoo tiis uffatee ti gad bahe; hogguus Philaaxos, “Kunoo ti namtichi!” isaaniin jedhe.
[6] Luboonni warri angafoonninii fi waardiyyoonni Yihudootaa hogguu isa arkan, “Fannisi! Fannisi!” jedhanii ti iyyan. Philaaxos ammoo, “Isinummaan fuudhaa tii isa fannisaa, ani ammoo, yakka tokko illee isa irratti hin agarre” isaaniin jedhe.
[7] Warri Yihudootaa deebisanii, “Nuti seera tokko qabna; inni Ilma Rabbii waan if godheef jecha, kanaaf akka seera keenyaa sanitti du'uu tu isa irra jira” jedhaniin.
[8] Philaaxos dubbii tana hogguu dhagaye, daran ni sodaate.
[9] Deebi'ee tiis mana ol seenee, Yesuusiin, “Ati eeysaa dhufte?” jedheeni; Yesuus garuu jawaaba hin deebifneef.
[10] Philaaxos as irratti, “Anatti hin himtuu? Gad si dhiisuuf akkaan ani amrii qabu akkasumatti ammaas si fannisuufiis akkaan ani amrii qabu hin beeytuu?” jedheeni.
[11] Yesuus garuu deebisee, “Odoo ol irraa siif kannamuu baattee, amrii takka illee ana irratti hin qabdu turte; kana waan taheef, inni dabarsee sitti na kanne sun, dilii caaltu qaba” isaan jedhe.
[12] Sababa kanaf jecha, Philaaxos isa gadi dhiisuuf karaa itti barbaade. Warri Yihudootaa garuu, “Namticha kana yoo gadi dhiifte, ati saahiba Qeesaarii miti; namni ifiin mootii if godhu hundinuu, Qeesaariin morka” jedhanii ti itti iyyan.
[13] Philaaxos jecha kana dhagayee ti, Yesuus gadi baasee, bakka dhagaa shiiraa kan afaan Ibraayisxitti “Gabataa” jedhamutti, barcuma firdii irra taa'e.
[14] Kuniis guyyaa qophee Ayyaana Bira Dabruu gara za'aa jahaffaa ti ture; Philaaxos hogguus Yihudootaan, “Kunoo, mootiin keeysan” jedhe.
[15] Isaaniis iyyanii, “Dhabamsiisi, dhabamsiisii isa fannisi!” jedhaniin. Philaaxos ammoo, “Mootii keeysan fannisuu ree?” isaaniin jedhe. Luboonni warri angafoonni deebisanii, “Nuti Qeesaar malee, mootii biraa hin qabnu” jedhan.
[16] Hogguus akka inni fannifamuuf dabarsee ti isaanitti isa kanne; akkasitti isaan Yesuus fuudhanii ti deeman.
[17] Yesuus fannoo isaa ifiif baadhatee, gara bakka “Killiyyuu mataa” yookiin afaan Ibraayisxitti “Golgootaa” jedhamtutti achi bahe.
[18] Achitti isa fannisan; namoota biraa lamaas isaa wajjiin, tokko gamanaan, tokkoos gamasiin, Yesuus isaan jiddutti fannisan.
[19] Philaaxos hogguus waan ittiin beeysisu tokko barreeysee, mataa fannoo isaatitti maxxanse; katabbiiniis, “Yesuus nama Naazireet, mooticha Yihudootaa” tan jettu turte.
[20] Bakki Yesuus itti fannifame, mandarichatti dhihoo waan turteef, katabbii beeysisaa sana Yihudoota keeysaa hedduu tu dubbise; inni afaan Ibraayisxitti, afaan warra Roomaatti, afaan warra Giriigittiis barreeyfamee ti ture.
[21] Hogguus luboonni warri angafoonni Yihudootaa Philaaxosiin, “Namticha kanaa tu ‘Ani mootii Yihudootaa ti’ jedhe, jedhi malee, ‘Mooticha warra Yihudootaa’ jettee hin barreeysin!” jedhaniin.
[22] Philaaxos garuu deebisee, “Waaniin katabe duruun katabee tiin jira” jedhe.
[23] Yesuus eega fannisan booda warri loltuu dhaa, huccuu isaa fudhatanii, tokko tokko akka isaan gahutti bakka afuritti hiratan; jalla-biyyaan isaa garuu olii hamma gaditti dhawaa tokkichaan bahe malee, hodhaa hin qabu ture.
[24] Kanaaf, “Koottaa jalla-biyyaa kana hin tarsaafnuu, hixaa darbannee abbaa inni bahuuf ilaalla!” waliin jedhan. Kanaaniis dubbiin Kitaabaa tan inni, “Wayaa kiyya gargar hiratanii, uffata kiyya irrattiis hixaa dha darbatan” jedhe ni raawwatame. Warri loltuuniis kanuma godhan.
[25] Fannoo Yesuus cinaas haati isaa, haboon isaa, Maariyaam niitii Qilophaa, Maariyaam Magdalaa tiis ni dhadhaabbatu turan.
[26] Yesuus hogguu tana haadha Isaa, barattuu Inni jaalatees isii cinaa Odoo dhaabbatuu ti arkee, haadha isaa tiin, “Yaa haadha too, kunoo ilmi kee!” jedheeni.
[27] Eegasii barattuu saniiniis ammaas, “Kunoo, haati tee!” jedhe; barataan sun wayta sanii jalqabee gara mana ifii isaatitti isii fudhate.
[28] Yesuus, amma wanni hundinuu raawwatamuu isaa beekee, Qoowlii Kitaabaa raawwachiisuuf jecha, “Dheebodhe” jedhe.
[29] Meeshaan kal keeysa guutame tokko achi ture; waan bishaan xuuxxu takkaan waraabanii ti, muka hisoophitti kaayanii, afaan Yesuusitti qaban.
[30] Yesuus kal dhangaggaawaa san eega afaanitti dhamdhame booddee, “Raawwatame” jedhe; mataa isaa tiis laqac godhee lubbuu isaa tiis kanne.
[31] Guyyaan sun, guyyaa itti qophaawani; guyyaan Sanbataa kan isatti aanuus guyyaa guddaa dha ture. Kanaaf meeyxaa warra fannifamanii, guyyaa Sanbataa fannoo irra akka hin oolle godhuuf, lafeelee miillan isaanii caccaphsanii fannoo irraa akka gad buufamaniif, warri Yihudootaa Philaaxos gaafatan.
[32] Akkasitti warri loltuu dhufanii, miila namticha duraa tii fi ammaas kan isaa wajjiin fannifamee tiis ni caccaphsan.
[33] Gara Yesuus hogguu dhufan, inni akka duruun du'e agarraan, miila isaa hin caphsine.
[34] Haa tahu malee, warra loltuu keeysaa inni tokko eeboo dhaan cinaacha isaa waraannaan, hogguusuma dhiigaa fi bishaan keeysaa dhangala'an.
[35] Namticha kana arkee tu ragaa bahe, ragummaan isaa tiis dhugaa dha; isiniis ammaas akka amantaniif jecha, inni dhugaa akka dubbatu ni beeka.
[36] Kuniis kan Kitaabni, “Lafeen isaa takka illeen hin caphsamtu” jedhe, haa raawwatamuuf tahe.
[37] Kitaabni bakka biraatti ammaas, “Gara isuma waraananii ni ilaalu” jedha.
[38] Kana booddees, Yoseef kan jedhamu namni Armaatiyaa tokko, reefka Yesuus fannoo irraa buusuuf Philaaxos kadhate; Philaaxos hayyama kanninaan, namtichi deemee ti, reefka Yesuus buuse. Namtichi kun Yihudoota waan sodaateef, zaahiritti odoo hin tahin, dhooysatti barattuu Yesuus ture.
[39] Niqoodemos, namtichi gaafa duraa halkan Yesuus bira dhufe suniis, sibrii fi qumbii walitti makaa raxilii dhibba tokko kan tahu fuudhee ti dhufe.
[40] Hogguus reefka Yesuus fuudhanii, akka aadaa awwaalcha Yihudootaatti, urgeesituu sanaan wajjiin huccuu quncee qoonxar irraa hojjatameen kafanan.
[41] Lafti inni itti fannifame sun ammoo bakka oyruu kudra-mudraa takka turte; oyruu kudra-mudraa sana keeysaas qabriin haarayni, tan tanaan dura tokko illeen keeysatti hin awwaalamin takkaa tu ture.
[42] Guyyaan, kan warri Yihudootaa itti qophaawan waan taheef jecha, qabriin suniis dhihotti arkamnaan, Yesuus achi keeysa dagalchan.