[1] Yesuus itti furee barattoota isaa tiin, “Qalbiin teeysan isin hin hin cinqamin, Rabbitti amanaa, anattiis amanaa!
[2] Mana Abbaa kiyyaa keeysa bakki jireenyaa hedduu tu jira; odoo bakki jiraachuu baate, isinitti niin himaan ture; bakka isiniif qopheeysuuf jechaan ani achi deema.
[3] Hogguun dhaqees bakka isiniifiin qopheeysa; bakkaan ani jiru isiniis akka jiraattaniif, deebi'ee dhufee tiin gara kiyyatti isin fudhadha.
[4] Karaa bakkaan ani itti deemuu tiis, isin ni beeytu” jedheeni.
[5] Toomaas ammoo, “Yaa Gooftaa, eeysa akka ati dheeyxu hin beeynu, eegasuu akkamitti karaa beekuu dandeenya?” jedheeni.
[6] Yesuus deebisee, “Karaan, dhugaan, jireenyi niis Ana; Anaan maleetti, eenyu illeen gara Abbaa dhufuu hin dandayu.
[7] Ana silaa waan beeytan taatanii, Abbaa kiyyaas ni beeytu turtan; ammaa jalqabdanii isa ni beeytu, isa agartaniis” jedheeni.
[8] Filiphoos ammoo, “Yaa Gooftaa, Abbuma nu agarsiisii, kanaa achi nu gaha” isaan jedhe.
[9] Yesuus deebisee, “Eegaan wayta dheertuu tanaaf isiniin wajjiin ture illee, ana hin beeytuu, ati yaa Filiphoos? Namni ana arke, Abbaas arkee; akkamitti, ‘Abbaa nu agarsiisi’ jetta ree?
[10] Ani Abbaa keeysa tahuu kiyya, Abbaaniis ana keeysa tahuu isaa hin amantuu? Abbaa isa ana keeysa jiraatuu tu hojii isaa hojjata malee, qoowliin isinitti himuus ifuma koo ti irraa hii miti.
[11] Ani Abbaa keeysa, Abbaaniis ana keeysa, jedhee hogguun dubbadhu na amanaa! Yookiin, hojichumaaf jettanii amanaa!
[12] “Dhugumaan isiniin jedha, namni anatti amanu, waaniin ani hojjadhu hundumaa ni hojjata; ani gara Abbaa waaniin dhaquuf jecha, kana irra kan caalu illee inni ni hojjata.
[13] Abbaan Ilma isaa tiin ulfina akka arkatuuf jecha, waanuma isin maqaa kiyyaan kadhattan ani niin godha.
[14] Waanuma fedhee huu, isin maqaa kiyyaan yoo kadhattan, ani niin godha” jedheeni.
[15] Yesuus itti furee, “Isin yoo na jaalattan, ajaja kiyya ni eeydu.
[16] Ani Abbaa niin kadhadha, inni wayta hundumaa isin wajjiin haa jiraatuuf jecha, kan biraa kan isin jajjabeeysu, isiniif ni kanna.
[17] Inni isin jajjabeeysu kun, Ruuha dhugaa ti; addunyaan waan isa hin agarree fi waan isa hin beeyneef jecha, fudhachuu hin dandeeysu. Inni isiniin wajjiin waan tahuuf, isin keeysaas waan jiraatuuf jecha, isin isa ni beeytu.
[18] Ani yatiimummatti isin hin dhiisu, gara keeysan niin dhufa.
[19] Xiqqo booddee biiyti addunyaa deebitee ana hin agartu, isin garuu, ani waaniin jiraadhuuf, isiniis waan jiraattaniif ana ni agartu.
[20] Gaafas ani Abbaa kiyya keeysa, isiniis ana keeysa, aniis isin keeysa akkaan jiru beekuuf teeysu.
[21] Namni ajaja kiyya qabu, kan isa raawwatuus, isa, kan na jaalatu; nama na jaalatu Abbaan kiyyaas isa ni jaalata; aniis isa niin jaaladha, ifiis ittiin mullisa” jedhe.
[22] Yihudaa nama Keriyot odoo hin tahin, Yihudaa inni kaan, “Yaa Gooftaa, ati addunyaatti odoo hin tahin, akkamitti numatti if mullifta ree?” isaan jedhe.
[23] Yesuus deebisee, “Eenyu illeen yoo na jaalate, qoowlii tiyya ni raawwata, Abbaan kiyyaas isa ni jaalata; nutiis isa bira dhufnee, isaan wajjiin ni jiraanna.
[24] Namni ana hin jaalanne garuu, qoowlii tiyya hin raawwatu, qoowliin isin dhageeysan tuniis tan Abbaa isa ana ergee ti malee, tiyyaa miti” jedheeni.
[25] Yesuus itti dabalee, “Kana hundumaa odoon isiniin wajji jiruu, kunoo isinitti himee tiin jira.
[26] Inni isin jajjabeeysu Ruuhal Qudus, kan Abbaan maqaa kiyyaan ergu garuu, waan hundumaa isin ni barsiisa, waaniin isinitti hime hundumaas isin ni yaadachiisa.
[27] Nagaya isin wajjiin niin hambisa, nagaya kiyyaas isiniifiin kanna; ani akka addunyaan kannitutti isiniif hin kannu; qalbiin teeysan isin hin cinqamin, abshir!
[28] ‘Amma niin deema, deebi'ee tiis isin bira niin dhufa’ isiniin jechuu kiyya dhageeysanii ti jirtu; silaa na jaalattanii, waan Abbaan ana irra caaluuf jecha, gara Abbaa deemuu kiyyaaf silaa ni gammaddu turtan.
[29] Kuniis hogguu raawwatamu akka amantaniif, duraan dursee tiin amma odoo inni hin tahin dura, kunoo isinitti himee tiin jira.
[30] Kanatti dabalee asii achi waan hedduu isinii wajjiin hin dubbadhu; inni addunyaa tana moohu dhufutti jira; haa tahu malee, inni ana irratti amrii hin qabu.
[31] Garuu ani akkaan Abbaa jaaladhu, ammaas akkuma Abbaan na ajajetti akkaan hojjadhu, addunyaan haa beeytuu; ka'aa asii haa yaanuu!” jedhe.