[1] [Yesuus eegasii gara Gaara Ejersaatti ol bahe.
[2] Borumtii bariisaan deebi'ee ti ammaas gara Beeytal Maqdas dhaqe. Namoonni hundinuu gara isaa dhufnaan, inni ammoo taa'ee isaan barsiisuu dha jalqabe.
[3] Barsiisonni seeraa tii fi Fariisonni dubartii ejja irratti qabamte takka ol galchanii ti, namoota jidduu dhaabbachiisan.
[4] Yesuusiin, “Yaa barsiisaa, dubartiin tun odoo ejjituu ti qabamte.
[5] Museen seera keeysatti, dubartoota akkasii dhagaa dhaan rukunnee akka ajjeefnu nu ajajee ti jira; ati amma ammoo maal jetta?” jedhaniin.
[6] Isaan tanaan akka hillimatti isaan qabanii waan ittiin kasasan arkachuuf ture; Yesuus garuu gad godhatee ti quba isaa tiin lafa irratti waa barreeyse.
[7] Isaan gaaffii itti deddeebifnaan, Yesuus ol godhatee, “Isin keeysaa namtichi dilii hin qabne, inni dubartii tanatti dura dhagaa itti haa darbatu” isaaniin jedhe.
[8] Kana booddee ammaas gad godhatee ti lafa irratti waa barreeyse.
[9] Isaan tana dhagayanii, jaarsolii dhaa jalqabanii hamma warra kaanitti tokko tokkoon hulluuqanii ti deeman; Yesuus kophaatti dhiisan; dubartittiiniis achuma dhaabbattee ti hafte.
[10] Hogguus Yesuus ol godhatee, “Intalo, meerree jarri? Namni tokko illeen si irratti firdii hin goonee?” isii dhaan jedhe.
[11] Isiin ammoo, “Lakkii, nam tokko illeen Gooftaa koo” jettee ti deebifteef; as irratti Yesuus, “Eegasuu, aniis sitti hin firdii godhu, deemi ammaa jalqabdee dilii hin godhin!” isii dhaan jedhe.]
[12] Yesuus ammaas, “Ani ifa addunyaa ti, namni ana duukaa bu'u ifa jireenyaa ti qabaata malee, dukkana keeysa abadan hin deemu” jedhee ti namootatti dubbate.
[13] As irratti warri Fariisotaa, “Ati ifiif ragaa baata, ragummaan kee tiis hin fudhatamu” jedhaniin.
[14] Yesuus ammoo deebisee, “Ifii kiyyaaf kan ragaa bahu yoon tahe illee, eeysaa akkaan dhufe, eeysa akkaan dhaquus waaniin beekuuf jecha, ragummaan tiyya ni fudhatamti; isin garuu eeysaa akkaan dhufe, eeysaas akkaan dhaqu hin beeytan.
[15] Isin akka yaada namaatti firdii gootu, ani garuu nam tokkotti illee hin firdii godhu.
[16] Ani silaa firdii godhe illee, firdiin tiyya dhugaa dha; ani bar kophaa kiyyaa mitii, isa ana erge Abbaa tu anaa wajjiin jira.
[17] Seeruma keeysan keeysatti illee, ‘Ragummaan namoonni lama ragaa bahan ni fudhatama’ kan jedhu barreeyfamee ti jira.
[18] Ana, kan ifii kiyyaa ragaa bahu, inni kaan ammoo, isa ana erge, Abbaa tu ragaa naaf baha” isaaniin jedhe.
[19] Isaan hogguus, “Abbaan kee eeysa jira?” jedhanii ti Yesuus gaafatan. Yesuus deebisee, “Isin anaas, Abbaa kiyyaas hin beeytan; ana silaa beeytanii, Abbaa kiyyaas ni beeytu turtan” isaaniin jedhe.
[20] Yesuus kutaa Beeytal Maqdas keeysaa, bakka muudaayni buusii kaayamu bira taa'ee ti, jecha kana hundumaa kan isaan barsiise. Wayti isaa amma illee waan hin gahiniif jecha, namni tokko illeen harkaan isa hin qabne.
[21] Ammaas Yesuus, “Ani niin deema, isin ana barbaaduuf teeysu; bakkaan ani dhaquus dhufuu hin dandeeysan, tanaaf, dilii teeysaniin dhumtu” jedhee ti isaanitti dubbate.
[22] As irratti Yihudoonni warri Yesuusiin morman, “Bakkaan ani dhaqu dhufuu hin dandeeysan wanni jedheef, if ajjeesuufii laata?” jedhan.
[23] Inni ammoo, “Isin warra gadii ti, ani ammoo kan olii ti; isin kanneen addunyaa tanaa ti, ani ammoo kan addunyaa tana irraa hii miti.
[24] Dilii teeysaniin akka dhumtan isinitti himee tiin jira; ani eenyu akkaan tahe hubattanii yoo amanuu baattan, dilii teeysaniin dhumtu” isaaniin jedhe.
[25] As irratti isaan, “Sa ati eenyu?” jedhanii ti isa gaafatan; Yesuus ammoo, “Durumaan jalqabee kanumaan dubbachaa turee dha.
[26] Ani waa'ee keeysaniif waaniin dubbadhu waaniin firdii godhuus waan hedduun qaba; isa na erge irraa waaniin dhagayeen, addunyaatti dubbadha; inni ana ergees Abbaa dhugaa ti” jedhee ti isaanitti hime.
[27] Isaan garuu waa'ee Rabbii akka isaanitti hime hin galleef.
[28] Kanaaf Yesuus, “Wayta Ilma Namaa muka irratti ol baaftan, hogguusi, ani eenyu akkaan tahe, beeytu; ani ifumaan waan takka illee akkaan hin goone ammoo, waanuma Abbaan kiyya na barsiise akkaan dubbadhu ni hubattuus.
[29] Inni ana ergees anaa wajjiin jira; ani wayta hundumaa waan isa gammachiisu waaniin godhuuf jecha, inni kophaatti ana hin dhiifne” isaaniin jedhe.
[30] Yesuus tana hogguu dubbate, namoonni hedduun isatti amanan.
[31] Hogguus Yesuus Yihudoota warra isatti amananiin, “Qoowlii tiyyatti irkattanii yoo jiraattan, isin dhuguma barattoota kiyya.
[32] Dhugaa dhaas ni hubattu; dhugaaniis bilisa isin baasa” jedheeni.
[33] Isaan ammoo deebisanii, “Nuti shanyii Abrahaami, nuti nama tokkoof illee takkaa gabra hin taane; akkamitti ‘Ni bilisoomtu’ nuun jetta ree?” jedhaniin.
[34] As irratti Yesuus, “Dhugumaan isinitti hima, namni dilii hojjatu hundinuu gabricha dilii ti.
[35] Gabrichi umrii isaatti illee haaskaa gooftaa isaatti hin lakkaawamu, ilmi garuu yoom illee haaskaa abbaa isaatti lakkaawama.
[36] Ilmi yoo bilisa isin baase, isin dhugumaan bilisa taatan.
[37] Isin shanyii Abrahaam akka taatan ani niin beeka; haa tahu malee, qoowliin tiyya isin keeysatti bakka waan dhabdeef jecha, ana ajjeesuu dha barbaaddu.
[38] Ani waaniin Abbaa kiyya biratti arkeen dubbadha; isin ammoo waan abbaa keeysan irraa dhageeysan hojjattu” isaaniin jedhe.
[39] Yihudoonni ammoo, “Abbaan keenya Abrahaami” jedhanii ti deebisaniif. Yesuus garuu deebisee, “Isin joollee Abrahaam odoo taatanii, hojii Abrahaam hojjate ni hojjattu turtan.
[40] Ana, namticha dhugaa Rabbi biraa dhagaye isinitti hime, kunoo, ajjeesuu dha barbaaddu; Abrahaam waan akkanaa hin goone.
[41] Isin hojii abbaa keeysanii ti hojjattu” isaaniin jedhe. Isaan ammoo, “Nuti ilmaan zinaa tii miti; nuti abbaa tokkuma qabna, inni niis Rabbi” jedhaniin.
[42] Yesuus deebisee, “Rabbi odoo abbaa keeysan tahe, ana ni jaalattu turtan; ani kunoo, Rabbi biraa dhufee tiin as jira; isaa tu ana erge malee, ani ifiin hin dhufne.
[43] Jechi kiyya maaliif isiniif galuu dide? Jecha kiyya dhagayuu isin waan hin dandeenyeef, hin hubattan.
[44] “Isin abbaa keeysan, Sheeyxaana irraa, waan taatanii dha; fedha hamaa abbaa keeysanii ti godhuu dha barbaaddan. Jalqabumaa kaasee, inni kan nama ajjeesaa turee dha; dhugaan isa keeysa waan hin jirreef jecha, inni dhugaa irra hin dhaabbanne. Inni kijibaa dha, abbaa kijibaa tiisi; kanaaf hogguu kijibu, waan garaa isaa keeysa jiru dubbata.
[45] Ani ammoo dhugaa waaniin isinitti dubbadhuuf jecha, ana hin amantan.
[46] Isin keeysaa diliif kan na ciicatu eenyu? Ani dhugaa kaniin dubbadhu yoon tahe, maaliif ana hin amantan?
[47] Kan Rabbi irraa tahe, Qoowlii Rabbii ni dhagaya; isin ammoo warra Rabbii waan hin tahiniif jecha, qoowlii isaa hin dhageeysan” jedheeni.
[48] Yihudoonni ammoo deebisanii, “Ati nama Samaariyaa ti, Sheeyxaanaa tu si keeysa jira, siin jechuun keenya sirrii mitii?” jedhaniin.
[49] Hogguus Yesuus, “Sheeyxaanni na keeysa hin jiru; ani Abbaa kiyyaan kabaja, isin ammoo kabaja na dhoorkattu.
[50] Ani ulfina mataa kiyyaaf hin barbaadu, garuu kan barbaadu tokkoo tu jira; inni niis daanyicha.
[51] Dhugumaan isinitti hima, namni qoowlii tiyya eegu bara baraaf du'a hin arku” isaaniin jedhe.
[52] As irratti Yihudoonni, “Amma kunoo Sheeyxaanni akka si keeysa jiru hubannee ti jirra; Abrahaam du'ee ti jira, nabiyyoonni niis du'anii ti jiru; ati ammoo, ‘Namni qoowlii tiyya eegu, bara baraaf hin du'u’ jetta.
[53] Sa ati, abbaa keenya Abrahaam kan du'e irra ni caaltaa? Nabiyyoonni niis du'anii ti jiru, ati eenyu if seeta?” jedhaniin.
[54] Yesuus ammoo, “Ani mataa kiyyaaf ulfina kan kannu yoon tahe, ulfinni kiyya humaa tii miti; Abbaa kiyya, isa isin ‘Rabbii keenya’ jettaniinii tu ulfina anaaf kanna.
[55] Isin, isa yoo beekuu baattan illee, ani garuu isa niin beeka. Isa hin beeku yooniin jedhe, akkuma keeysan kijibaa dhaan taha; ani ammoo dhugumaaniin isa beeka, qoowlii isaa tiis niin eega.
[56] Abbaan keeysan Abrahaam guyyaa kiyya arkuuf yaadaan jaalate; guyyichaas arkee ti gammadeesi” jedhe.
[57] As irratti Yihudoonni, “Ati kunoo bara shantama illee hin guunne, eeysatti Abrahaam agarte?” jedhaniin.
[58] Yesuus ammoo deebisee, “Dhugumaan isinitti hima, Abrahaam odoo hin dhalatin dura, ani niin jiraan ture” isaaniin jedhe.
[59] Hogguus Yihudoonni Yesuusitti darbachuuf dhagaaggee guurratan; inni garuu masxuuratti Beeytal Maqdas keeysaa bahee ti deeme.