[1] Ayyaana Bira Dabruuf guyyaan jaha hafee, Yesuus Bitaaniyaa bakka Alaazaar ture dhaqe; inni kuniis isa Yesuus du'aa kaasee turee dha.
[2] Achitti hiraata qopheeysaniif; Maartaan ni tajaajilti, Alaazaar ammoo warra isaa wajjiin maadditti dhihaatan keeysaa tokko ture.
[3] Maariyaam hogguus axira dibataa aslii isaa kan “Naardoos” jedhamu, kan gatiin isaa hedduu qaalii, hanga walakkaa liitroo kan tahu fiddee ti, miillan Yesuus irratti dhangalaaftee, rifeensa isii tiin miillan isaa irra hayxe; urgaan axiraa tiis mana guutte.
[4] Barattoota isaa keeysaa tokko, Yihudaan namni Keriyot, kan isa qabsiisuuf deemuu ture garuu as irratti,
[5] “Axirri kun meeta dhibba sadihitti gurguramee, maaliif warra hiyyeeysootaaf hin kannamne?” jedhee ti dubbate.
[6] Inni tana wanni jedheef, hiyyeeysootaaf yaadee tii miti, hattuu waan tureef malee; korojoo horii qabduu tahee, achi keeysaa ifiif maallaqa fudhachaa ti ture.
[7] Yesuus ammoo, “Isii dhiisi! Guyyaa awwaalcha kiyyaaf na qopheeysuuf isiin axira kana ol keeyse.
[8] Namoota deegoo wayta hundumaa if jidduu dhaa qabdu, ana garuu wayta hundumaa if biraa hin qabdan” jedhe.
[9] Yihudoota keeysaa hiis ummanni dilli Yesuus achi jiraachuu dhageenyaan dhufan; Alaazaar kan inni du'aa kaasees laaluuf jecha malee, Yesuus qofa laaluuf hin dhufne.
[10] Hogguus luboonni warri angafoonni Alaazaariis ajjeesuuf murtoo dha godhan.
[11] Sababni niis isa irraa kan ka'e, Yihudoota keeysaa hedduun gara Yesuus dhufanii, isatti waan amananiif ture.
[12] Guyyaa itti aanuttiis ummanni dilli ayyaantichaaf hogguu ol bahan, Yesuus gara Yerusaaleem akka dhufaa jiru dhagayan.
[13] Damee muka meeyxii harkatti qabatanii, isa simachuuf bahan; sagalee guddaa dhaaniis, “Hosaanaa, mootiin Israa'el inni maqaa Rabbii Gooytaa tiin dhufu galateeyfamaa dha” jedhan.
[14] Yesuus hogguus nyagoo harree takka arkatee ti irra taa'e; kuniis Kitaaba keeysatti barreeyfamee ti jira;
[15] “Yaa joollee Xiyoon hin sodaatinaa, kunoo mootiin keeysan nyagoo harree irra taa'ee ni dhufa” jedhame.
[16] Barattoonni isaa duraan kana hin hubanne; Yesuus ulfina isaatti eega ol fudhatame booddee garuu, kun waa'ee isaa tiif akka barreeyfameefi, kanaas akka isaaf godhan ni galeef.
[17] Namoonni gaafa inni Alaazaar qabrii keeysaa yaamee, du'aa kaase bira turan, kana godhuu isaa ragaa bahaa ti turan.
[18] Kanaaf jecha ummanni milikkita mu'ujizaa kan inni godhe kana dhageenyaan, isa simuuf afaan dhaqan.
[19] Warri Fariisotaa garuu, “Laalaa mee, akkanatti nuti eeysaa huu hin geenyu; kunoo, Banii Aadam akka jirutti jala buqqa'ee mitii?” waliin jedhan.
[20] Bakka ayyaantichaatti sagaduuf warra ol bahan keeysaa, hammi tokko Giriigota turan.
[21] Isaan kun Filiphoos, nama Beetesayidaa kan kutaa Galiilaa sana bira dhufanii ti, “Yesuus arkuu dha feena, Gooftaa” jedhaniin.
[22] Filiphoos ammoo deemee ti Indiriiyaasitti hime; Indiriiyaasii fi Filiphoos wajjiin deemanii ti Yesuusitti himan.
[23] Yesuus garuu deebisee, “Wayti Ilmi Namaa ulfina isaatti ol fudhatamu gahee ti jira.
[24] Dhugumaan isinitti hima; firiin qamadii biyyee keeysa buutee yoo duute malee, kophaa taatee ti hafti; yoo duute garuu firii hedduu dha godhatti.
[25] Namni lubbuu isaa mararsiifatu lubbuu isaa sanuu dhaba; namni addunyaa tana irratti lubbuu isaa hin mararsiifanne garuu, jireenya bara baraa tiif ni eeggata.
[26] Namni na kaadamu, ana duukaa bu'uu tu irra jira; kaadamaan kiyya bakkaan ani jiru jiraata; namticha ana kaadamuuf, Abbaan kiyya ulfina ni kannaaf” jedhe.
[27] Yesuus itti furee, “Amma lubbuun tiyya na cinqamte; maal haa jedhu? ‘Yaa Abbaa, za'aa tana irraa na eewali!’ niin jedhaa? Lakkii, kanumaaf jechaan gara za'aa tanatti dhufe.
[28] Yaa Abbaa, maqaa kee tiif durrii ulfinaa kanni!” jedhe. Hogguus sagaleen takka samii irraa dhuftee, “Duruun ulfina kanneef, ammaas niin kannaaf!” jette.
[29] Ummata achi turee dhagaye keeysaa hammi tokko, “Mandiisuu dha” jennaan, warri kaan ammoo, “Maleeykaa Rabbii tu itti dubbate” jedhan.
[30] Yesuus ammoo deebisee, “Sagaleen tun isiniif jecha dubbatte malee, anaafii miti.
[31] Za'aan firdii addunyaa tanaa amma; inni hamaan mootichi addunya tanaa amma gad ni darbama.
[32] Ani hogguun lafa irraa ol kaafamu, nama hundumaa ifittiin harkisa” jedhe.
[33] Tanaas du'a akkamii akka du'u tilmaamuuf jedhe.
[34] Ummanni deebisanii, “Kiristoos bara baraaf akka jiraatu seera irraa dhageenyee ti jirra; eegasuu akkamitti Ilmi Namaa ol kaafamuun taha jetta ree? Ilmi Namaa kuniis eenyu?” jedhaniin.
[35] Yesuus ammoo, “Ifni amma illee wayta gabaabaaf isin bira jira; dukkanti akka isin hin dhaqqabne, ifa odoo qabdanii deemaa! Namni dukkana keeysa deemu, garam akka deemu hin beeku.
[36] Joollee ifaa akka taataniif, ifa odoo qabdanii ifichatti amanaa!” isaaniin jedhe. Yesuus kanneen dubbatee ti isaan dhiise, ija isaanii duraa hiis if dahe.
[37] Yesuus milikkita mu'ujizaa kana hundumaa isaan duratti godhu illee, isaan isatti hin amanne.
[38] Kuniis qoowliin nabii Isaayyaas akka raawwatamtuuf, kan inni, “Yaa Gooftaa, eenyuu tu waan nuti jenne nu amane? Irreen Rabbii tiis eenyutti mullatte?” jedhe.
[39] Isaan amanuu hin dandeenye; Isaayyaas itti dabalee,
[40] “Ija isaanii tiin akka hin agarre, qalbii isaanii tiiniis akka hin hubanne akkaan ani isaan najaa baasuufiis, akka isaan hin deebine, inni ija isaanii jaamsee ti jira, qalbii isaanii tiis jabeeysee ti jira” jedhee dubbatee ti jira.
[41] Isaayyaas durrii ulfina isaa arkee ti isa laalchisuun kana dubbate.
[42] Haa tahu malee, Yihudoota warra amrii qaban keeysaahi illee hedduun isatti amananii ti jiru; garuu tokkummaa waldaya isaanii keeysaa nu baasu jedhanii warra Fariisotaa waan sodaataniif jecha, isatti amanuu isaanii hin mullifne.
[43] Isaan Rabbi irraa ulfina arkachuu caalaa nama irraa ulfina arkachuu dha jaalatan.
[44] Yesuus sagalee ol fudhatee, “Namni anatti amanu, isa ana ergetti amana malee, ana qofattii miti;
[45] namni ana laaluus, isa ana erge sana arka.
[46] Eenyu illeen kan anatti amanu dukkana keeysatti akka hin hafneef jecha, ani ifa tahee tiin gara addunyaa tanaa dhufee jira.
[47] Namni qoowlii tiyya dhagayee yoo eeguu baate, ani isatti hin firdii godhu; ani addunyaa eewaluuf malee, itti firdii godhuuf hin dhufne.
[48] Nama ana didee, qoowlii tiyyaas hin fudhannetti, daanyaan firdii godhu jira; qoowlummaan ani dubbadhee tu guyyaa qiyaamaa isatti farada.
[49] Abbaa, isuma ana ergee tu waaniin dubbadhuu fi akkaan itti dubbadhuus na ajaje malee, ani ifuma irraa fuudhee hin dubbanne.
[50] Ani ajajni isaa jireenya bara baraatti akka nama geeysu niin beeka; kanaaf waanniniin ani dubbadhu hundinuu, waanuma inni ‘Dubbadhu!’ anaan jedheen dubbadha” jedhe.