[1] Yesuus dubbii tana eega dubbate booddee barattoota isaa wajjiin ka'ee ti, bakka ooyruu kudra-mudraa tan dachaatuu Qedroon gama jirtuu takka dhaqe; isaa fi barattoonni isaa tiis ooyruu sana keeysa seenan.
[2] Yesuus wayta hedduu barattoota isaa wajjiin achitti wal arka waan tureef jecha, Yihudaan, inni dabarsee isa kannuuf deemu, bakka sana ni beeka ture.
[3] Akkasitti Yihudaan loltuu murna tokko, warra waardiyyaa Beeytal Maqdas, luboota angafootaa fi Fariisota biraa ergamaniis, if duukaa buusee ti dhufe; jarri chubboo, faanusaa fi meeshaa lolaa tiis qabatanii ti turan.
[4] Yesuus waan isatti dhufuuf taa'u hundumaa beekee, ka'ee ti itti achi hiiqee, “Eenyu barbaaddan?” isaaniin jedhe.
[5] Isaaniis deebisanii, “Yesuus namticha Naazireet” jedhaniini; hogguus Yesuus, “Anumaatu isa” jedhe. Yihudaan kan dabarsee isa kannuus isaanuma wajjiin dhaabbata ture.
[6] Hogguu inni, “Anumaatu isa” isaaniin jedhe, gara booddee isaanitti deebi'anii ti kukkufan.
[7] Ammaas, “Eenyu barbaaddan?” jedhee ti isaan gaafate; isaan ammoo, “Yesuus namticha Naazireet” jedhaniini.
[8] Yesuus deebisee, “‘Kunoo, anumaatu isa’, jedhee isinitti himee tiin jira; kanaaf yoo ana barbaaddan, jarreen kana dhiisaa, haa deemani!” jedhe.
[9] Jechi inni kanaan dura, “Warra ati anaaf kannite keeysaa tokko illee hin balleeysine” jedhe, akka raawwatamuuf jecha kana dubbate.
[10] Simoon Phexiroos, habale harkaa qaba ture, luqqifatee ti kaadamaa angafa lubootaa rukutee, gurra isaa kan mirgaa irraa kute; maqaan kaadamaa sanii Maalkos jedhama ture.
[11] Yesuus garuu Phexiroosiin, “Habalee tee galkaa isiitti deebisi! Geeba hiraar kan Abbaan anaaf kanne dhuguun ana irra hin jiruu?” jedhe.
[12] Murni warra loltuu, abbaa kumaaleeysaa tii fi waardiyyoonni Yihudootaa Yesuus qabanii ti hidhan.
[13] Dura Haannaasitti isa geeysan; Haannaas soddaa Qayyaafaa ti, Qayyaafaan ammoo bara sana angafa lubootaa ti ture.
[14] Qayyaafaan kuniis, “Namni tokko ummataaf du'uun akka irra wayyaa tahe,” jedhee nama Yihudoota gorse ture.
[15] Simoon Phexiroosii fi barattuun biraa tokko Yesuus duukaa dha deeman; barattuun inni kaan angafa lubootaa biratti beekamaa waan tureef, Yesuus wajjiin abaada mana angafa lubootaa sana seene.
[16] Phexiroos ammoo karaa alaa tiin karra dura dhaabbata ture; kanaaf barattuun inni kaan, kan angafa lubootaa biratti beekamaa ture sun, gad bahee ti, intala karra eeydutti dubbatee Phexiroos ol galche.
[17] Namittiin karra eeydu sun Phexiroosiin, “Atiis barattoota namticha kanaa keeysaa tokko mitii ree?” jette; inni ammoo, “Anaa miti” jedhe.
[18] Dhaamochi waan tureef jecha, hojjatoonninii fi waardiyyoonni ibidda shidatanii, ijaajjanii ni oowwifatu turan; Phexiroosiis isaanii wajjiin dhaabbatee ni oowwifata ture.
[19] Angaftichi lubootaa hogguus waa'ee barattoota isaa tii fi waa'ee barsiisa isaa ti Yesuus gaafate.
[20] Yesuus ammoo deebisee, “Ani zaahiritti addunyaatti dubbadhee tiin jira; wayta hundumaa mana sagadaa tii fi Beeytal Maqdas bakka Yihudoonni hundinuu itti wal gahanitti barsiisee tiin jira; dhooysattiis waan takka illee hin dubbanne.
[21] Eegasuu maaliif aa gaafatta ree? Waaniin isaaniin jedhe, warra na dhagaye gaafadhu; isaan waaniin ani jedhe ni beeku” jedheeni.
[22] Hogguu inni tana jedhe, waardiyyoota isa cinaa dhaabbatan keeysaa tokko, “Akkasitti angafa lubootaa tiif jawaaba deebiftaa?” jedhee ti mallaa isaa kabale.
[23] Yesuus deebisee, “Waan badii yoon dubbadhe, badii sanitti ragaa tahii dubbadhu! Dubbii sirrii yoon dubbadhe garuu, maaliif na kabalta ree?” jedheeni.
[24] Haannaas eegasii Yesuus, akkuma inni hidhamee jirutti, gara Qayyaafaa, angafticha lubootaatti erge.
[25] Simoon Phexiroos dhaabbatee odoo ibidda oowwifachaa jiruu, warri biraa, “Atiis barattoota isaa keeysaa tokko mitii?” jedhanii ti isa gaafatan; inni garuu, “Anaa miti” jedhee ti kaade.
[26] Hojjatoota angafa lubootaa keeysaa inni tokko, firri namticha Phexiroos gurra isaa irraa kutee, “Isaa wajjiin bakka oyruu kudra-mudraa san keeysatti ani si hin agarree?” jedheeni.
[27] Phexiroos garuu ammaas ni kaade; hogguusuma lukkuun ni iyyite.
[28] Eegasii Yesuus mana Qayyaafaa irraa gara mana bulchaa mootummaa warra Roomaatti isa geeysan; wayti niis bariisaa ganama ture. Warri Yihudootaa ifiif Hoolaa Bira Dabruu nyaachuuf xaaharamummaan if eeggachaa waan turaniif, akka hin najifamneef jecha mana mootummaa warra Roomaa sana hin seenne.
[29] Kanaaf Philaaxos isaanitti gad bahee, “Wanti isin namticha kana ittiin kasastan maali?” jedheeni.
[30] Isaan ammoo deebisanii, “Odoo inni kun nama hamaa hojjate tahuu baate, nuti sitti dabarsinee isa hin kanninu turre” jedhaniin.
[31] Philaaxos deebisee, “Isinummaan isa fuudhaa tii akka seera keeysanitti itti faradaa” isaaniin jedhe. Warri Yihudootaa garuu, “Nuti nama tokko illee ajjeesuuf seerri mirga nuuf hin kannu” jedhaniin.
[32] Kaniis, Yesuus du'a akkam du'uuf akka deemu tuquuf, wanni inni jedhe, akka raawwatamuuf tahe.
[33] Philaaxos hogguus gara mana mootummaa sanitti ol deebi'ee, Yesuus yaamsisee, “Ati mooticha Yihudotaa tii?” jedhee ti isa gaafate.
[34] Yesuus deebisee, “Kun yaaduma kee ti moo, yookiin warra biraatuu waa'ee kiyya sitti hime?” jedheeni.
[35] Philaaxos ammoo, “Yihudii dha na seetee? Ummata kee tii fi, luboota warra angafootaa tu anatti dabarsee si kanne, ati maal goote?” jedhe.
[36] Yesuus garuu deebisee, “Mootummaan tiyya mootummaa addunyaa tanaa miti; odoo mootummaa addunyaa tanaa taatee, akkaan ani warra Yihudootaatti hin kannamneef, kaadamtoonni kiyya anaaf ni lolu turan; garuu Mootummaan tiyya mootummaa addunyaa tanaa miti” jedhe.
[37] Philaaxos, “Eegasuu ati mootii dha kaa?” jedheeni; Yesuus deebisee, “Mootii akkaan tahe atuu jettee ti jirta; ani dhaladhee, gara addunyaa wanniniin dhufeef, dhugaaf ragaa bahuuf jecha; warri dhugaa irraa tahaniis, sagalee tiyya ni dhagayu” jedhe.
[38] As irratti Philaaxos, “Sa dhugummaanuu maali?” jedheeni. Eega tana dubbate booda, ammaas gara warra Yihudootaatti gad bahee, “Ani yakka tokko illee isa irratti hin agarre.
[39] Garuu Ayyaana Bira Dabruu irratti nama hidhame keeysaa tokko akkaan isiniif gad dhiisu, aadaa godhattanii ti jirtuu; mooticha Yihudootaa kana akkaan isiniif gad dhiisu ni barbbaadduu?” isaaniin jedhe.
[40] Isaan itti iyyanii, “Isa kanaa miti, Barabbaas malee!” jedhan; Barabbaas kun ammoo shiftaa dha ture.