[1] Ayyaanni Bira Dabruu geenyaan, Yesuus addunyaa tana keeysaa gara Abbaa dhaquuf, waytiin isaa akka geeyse beeke; warra isaa kanneen addunyaa tana irra jiraatan jaalatee, amma kunoo, jaalalti isaa guutummaatti hammam akka taate isaan agarsiise.
[2] Wayta hiraataa irratti, Sheeyxaanni, Yihudaan ilmi Simoon, namticha Keriyot, Yesuus dabarsee akka kannuuf yaada isa keeysa kaaye.
[3] Yesuus ammoo Rabbi Abbaan waan hundumaa amrii isaa jalatti akka galche, inni Rabbi biraa akka dhufees, gara Rabbii tiis akka deebi'u ni beeka ture.
[4] Kanaaf hiraata irraa ka'ee, huccuu darbatu if irraa fuudhee kaayee, shogomaanoo takka fuudhee ti mudhitti marxtifate.
[5] Kana booda bishaan miilaan dhiqu qoritti qicatee, miila barattoota isaa dhiqee, ammaas shogomaanoo marxifate sanaan irraa qoorse.
[6] Simoon Phexiroos bira geenyaan, Phexiroos, “Yaa Gooftaa koo, sii tu miila kiyya dhiqaa?” isaan jedhe.
[7] Yesuus deebisee, “Wanniniin ani godhutti jiru kun amma siif hin galu; booddee garuu ni hubatta” jedheeni.
[8] Phexiroosiis deebisee, “Abadan ati miila kiyya hin dhiiyxu” jedheeni. Yesuus ammoo, “Ani yoon si dhiquu baadhe, ati na biraa qooda hin qabdu” jedheeni.
[9] Simoon Phexiroos hogguus, “Yaa Gooftaa, tana tanaan miila kiyya qofaa miti, harkaa fi mataa kiyyaas na dhiqi!” isaan jedhe.
[10] Yesuus ammoo, “Namni duraan qaama dhiqate, miiluma isaa qofa malee, qaamni isaa guutuun qulqulluu dha; isiniis qulqulluu dha; haa tahu malee, hunda keeysanii miti” jedheeni.
[11] Kan dabarsee isa kannuuf deemu, eenyu akka tahe waan beekeef jecha, “Hunda keeysanii miti” jedhe.
[12] Yesuus miila isaanii dhiqee huccuu isaa uffatee, bakka isaatti eega deebi'e booddee, “Waaniin isiniif godhe kana hubattanii?
[13] ‘Barsiisaa, Gooftaas’ jettanii ti na yaamtu; akkas naan jechuun dhugaa dha baantan; ani isuma.
[14] Irrattuu ani barsiisaan keeysanii fi Gooftaan keeysan eegaan miila isiniif dhiqe, isiniis akkanumatti miila waliif dhiquun isin irra jira.
[15] Ani fakkii gaarii isiniif kannuun koo, isiniis akkanuma akka hojjattaniifi.
[16] Dhugumaan isinitti hima, hojjataan namticha isa hojjachiifatu irra hin caalu, inni ergamees isa ergate irra hin caalu.
[17] Amma waan kanneen beeytan, yoo hojii irra isaan oolchitan, isin eeybifamoo dha.
[18] “Ani kaniin dubbadheef, hunda keeysan ilaalchisee tii miti; warraan filadhe niin beeka; inni Kitaabni, ‘Namticha biddeena kiyya hirmaatee tu, hirpha isaa ana irratti kaase!’ jedhu, haa raawwatamuuf tahe.
[19] Hogguu kun tahu, ‘Ani isa tahuu kiyya’ akka amantaniif, odoo inni hin tahin, duraan dursee tiin amma isinitti hima.
[20] Dhugumaan isinitti hima, namni isaan ani erge simatu ana simachuu isaa ti, namni ana simatuus isa ana erge simachuu isaa ti” jedhee ti isaanitti dubbate.
[21] Yesuus eega tana dubbate booddee, if keeysatti cinqamee, “Dhugumaan isinitti hima, tokko isin keeysaa dabarsee na kannuuf deema” jedhee ti ragaa bahe.
[22] Barattoonni isaa, isaan keeysaa nama kamiin jechuu isaa waan wallaalaniif, ija walitti babaasan.
[23] Barattoota keeysaa inni Yesuus jaalatu tokko gudeeda Yesuusitti irkatee ti taa'a ture.
[24] Kanaaf Simoon Phexiroos eenyu jechuu isaa akka tahe Yesuus akka gaafatuuf, nyaaraan barattichatti dubbate.
[25] Barataan suniis gudeeda Yesuusitti irkatee ti, “Yaa Gooftaa, eenyu inni?” jedhee ti gaafate.
[26] Yesuus ammoo, “Inni kaniin ani biddeena qorii keeysattiin tuqee afaan kaayuu dha” jedhee ti deebiseef; hogguus biddeenaan tuqatee Yihudaa ilma Simoon nama Keriyotiif afaan kaaye.
[27] Yihudaan akkuma biddeena afaanitti fudhateen, Sheeyxaantichi isa seene; hogguus Yesuus, “Waan godhuuf deemtu dafii godhi!” isaan jedhe.
[28] Warra maadditti taa'an keeysaa, maaliif Yesuus akkas akka isaan jedhe, nam tokko illeen hin hubanne.
[29] Hammi tokko, Yihudaan korojoo horii qabduu waan tureef, Yesuus, “Waan ayyaanaaf nu barbaachisu biti!” isaan jedhe; yookiin ammoo, akka inni hiyyeeysootaaf waa kannuuf itti hime seehan.
[30] Yihudaan akkuma biddeena afaanitti fudhateen gad bahe; za'aaniis halkan turte.
[31] Yihudaan eega gad bahe booddee, Yesuus, “Kunoo, amma Ilmi Namaa durrii ulfinaa arkate; Rabbiis isaan ulfina arkate.
[32] [Rabbi isaan ulfina waan arkateef], Rabbi ammoo deebisee ti durrii ulfinaa ni kannaaf, dafee tiis ni kannaaf.
[33] Yaa joollee too, ani asii achi wayta gabaabduufiin isinii wajjiin jira; na barbaaduuf teeysu; ‘Bakkaan ani dhaqu isin dhufuu hin dandeeysan’ jedhee akkumaan Yihudootatti himetti, isinittiis amma niin hima.
[34] Ajaja haarayaan isiniif kanna, wal jaaladhaa! Akkumaan ani isin jaaladhetti, isiniis akkasumatti wal jaalachuu tu isin irra jira.
[35] Isin jaalala waliif yoo qabaattan, kanaan namoonni hundinuu akka isin barattoota kiyya taatan ni beeku” jedhe.
[36] Hogguus Simoon Phexiroos, “Eeysa dhaquuf deemta yaa Gooftaa?” jedheeni; Yesuus ammoo, “Bakkaan ani dhaquuf deemu amma ati na duukaa dhufuu hin dandeeysu, booddee garuu na duukaa dha deemta” jedhee ti deebiseef.
[37] As irratti Phexiroos, “Gooftaa, maaliifiin amma si duukaa deemuu hin dandeenye? Ani kunoo, siif jedhee lubbuu tiyya niin kanna” jedheeni.
[38] Yesuus ammoo deebisee, “Dhugumaan lubbuu tee anaaf ni kannitaa? Dhugumaan sitti hima, lukkuun odoo hin iyyin hoggu sadih na ganuuf deemta” jedheeni.