[1] Dubbii tana eega dubbate booddee, Yesuus gara samii ol laalee ti, “Yaa Abbaa, waytichi gahee ti jira, Ilmi kee durrii ulfinaa akka siif kannuuf, Ilma kee tiif ulfina kanniifi.
[2] Akkuma ati Banii-Aadam hundumaa irratti amrii isaaf kannite, inni niis ammaas warra ati isaaf kannite hundumaaf jireenya bara baraa akka kannuuf.
[3] Si Rabbii tokkicha dhugaa, Yesuus Kiristoos isa ati ergitees beekuun isaanii jireenya bara baraa ti.
[4] Ani lafa irratti durrii ulfinaa siif kannee tiin jira, hojiin akkaan ani hojjadhuuf ati anatti kannitees raawwadhee tiin jira.
[5] Ammaan tanaas yaa Abbaa, ulfinaan si wajji uumama addunyaa dura qabaachuu tureen if biratti ulfina anaaf kanni!
[6] “Addunyaa keeysaa warra ati anaaf kanniteef maqaa kee beeysisee tiin jira. Isaan kan kee ti turan, ati anaaf kannite; isaaniis qoowlii tee eeganii ti jiru.
[7] Ammaas kunoo, wanti ati anaaf kannite hundinuu si biraa tahuu isaa hubatanii ti jiru.
[8] Qoowlii ati anaaf kannite hundumaa, aniis isaaniif kannee tiin jira. Isaaniis fudhatan, ani ai biraa akkaan dhufe mirkaniin beekan; akka ati na ergitees amanan.
[9] Ani isaaniif jechaan kadhadha; isaanuu kan kee waan tahaniif, warra ati anaaf kanniteefiin kadhadha malee, addunyaa tiifii miti.
[10] Wanniniin ani qabu hundinuu kee ti, wanni ati qabduus kiyya; isaan keeysatti ulfina arkadhee tiin jira.
[11] Ammaas, ani asii achi addunyaa irratti hin arkamu, isaan garuu amma illee addunyaa keeysa jiru; ani kunoo, gara kee tiin dhufa. Yaa Abbaa Qulqulluu, akkuma nuti tokko taane, warri ati anaaf kannitees tokko akka tahaniif, maqaa kee tiin isaan eegi!
[12] Hangaan ani isaan bira ture, humna maqaa kee tii kan ati anaaf kanniteeniin isaan eege; waan hamaa irraa isaan eegee tiin jira, qoowliin Kitaabaa akka raawwatamtuufiis isaan keeysaa ilma badiidhaa malee, tokko illeen kan bade hin jiru.
[13] Amma garuu ani gara kee tiin dhufa; gammachuun tiyya isaan keeysatti akka raawwatamtuuf jechaan, qoowlii kanneen addunyaa keeysatti dubbadha.
[14] Ani qoowlii tee isaaniif kannee tiin jira; akkumaan ani kan addunyaa hin tahin, isaaniis warra addunyaa waan hin tahiniif jecha, biiyti addunyaa isaan jibbite.
[15] Waan hamaa irraa akka isaan eeyduuf malee, addunyaa keeysaa akka isaan baaftuuf si hin kadhadhu.
[16] Akkumaan ani kan addunyaa hin tahin, isaaniis warra addunyaa tii miti.
[17] Qoowliin tee dhugaa dha, dhugaa dhaan isaan qulqulleeysi.
[18] Akka ati addunyaatti na ergitetti, aniis akkasumattiin addunyaatti isaan ergee tiin jira.
[19] Isaan ammaas dhugumaan siif warra if kannan akka tahaniifiin, ani isaaniif jecha if kanna.
[20] “Kadhaan tiyya isaanuma kana qofaafi miti; ammaas warra qoowlii isaanii dhagayanii anatti amananiifiis kadhachuu koo ti malee.
[21] Isaan hundinuu tokko haa tahan, yaa Abbaa, akkuma ati ana keeysa jirtu aniis si keeysa jiru, isaaniis nu keeysa haa jiraatanii; biiyti addunyaa tiis akka ati na ergite haa amantuufiin kadhadha.
[22] Akkuma nuti tokko taanetti, isaaniis tokko haa tahaniifiin, ulfina ati anaaf kannite isaaniif kannee tiin jira.
[23] Ani isaan keeysa, atiis na keeysa jiraachuu kee tiin isaaniis raawwatanii haa tokkaayanii; biiyti addunyaa tiis ati na erguu kee, akkuma na jaalattettiis, isaan jaalachuu kee tiis haa beeytu!
[24] Yaa Abbaa, warri ati anaaf kannite sun bakkaan ani jiru akka anaa wajjiin jiraataniin barbaada; ammaas ulfina kiyya uumama addunyaa dura waan na jaalatteef kan anaaf kannite sana, akka isaan arkaniin fedha.
[25] Yaa Abbaa koo, qaceelaa! Biiyti addunyaa tun si hin beeytu, ani garuu siin beeka, isaan kuniis ati akka na ergite beekanii ti jiru.
[26] Maqaan kee isaan biratti akka beekamu godhee tiin jira, ammaas akka beekamu niin godha; kuniis, jaalalti ati ittiin na jaalatte isaan keeysaas jiraattee, aniis isaan keeysa akkaan jiraadhuufi” jedhe.