[1] Guyyaa sadaffaa kutaa Galiilaa ganda Qaanaatti aruuza tokkoo tu ture; haati Yesuusiis achi turte.
[2] Yesuusii fi barattoonni isaa tiis aruuzaaf afeeramanii ti turan.
[3] Daadhiin inabaa duraa dhumnaan, haati isaa, “Daadhii inabaa hin qaban” jettee ti Yesuusitti himte.
[4] Yesuus ammoo, “Yaa aayyo, maaliif tana keeysa na neeyxa? Waa godhuuf waytiin tiyya amma illee hin geenye” jedhee ti deebiseef.
[5] Haati isaa hogguus warra achi keeysa dalaganiin, “Waanuma inni isiniin jedhu godhaa!” jetteeni.
[6] Warri Yihudootaa akka seera xaaharummaa isaaniititti kan itti hojjatan gaawwaa gurguddaa dhagaa irraa tolfame jaha, kan akka biidoo shan shan fuudhanii tu achi dhadhaabbata ture.
[7] Yesuus hogguus jaraan, “Bishaan gaawwoota kanatti gugguutaa!” jedheeni; isaaniis hamma afaanitti gugguutan.
[8] Kana booddee Yesuus, “Waraabaa tii namticha kaabboo aruuzaatti kannaa!” isaaniin jedhe; isaan hogguusuma itti kannan.
[9] Namtichi bishaan daadhii inabaa tahe sana, dhamdhamee ti laale. Daadhichi eeysaa akka bahe, warra bishaan guuru sanaa tu beeka malee, namtichi hin beeku ture. Hogguus aruuzticha ifitti yaamee ti,
[10] “Silaa namni dura daadhii inabaa gaarii dha dhiheeysa, eega namoonni quufan booda garuu daadhii laafaa dha kanna; ati ammoo daadhii filatamaa kana hamma ammaatti ol keeyse” jedhee ti itti dubbate.
[11] Yesuus milikkita mu'ujizaa agarsiise hundumaa keeysaa isa duraa tana Qaanaa Galiilaatti godhe, ulfina isaa tiis ni mullise, barattoonni isaa tiis isatti ni amanan.
[12] Kana booddee Yesuus haadha isaa, obboleeyyan isaa tii fi barattoota isaa wajjiin gara magaalaa Qifirnaahomitti gad bu'e; garuu achiis waa xiqquma bubbulan.
[13] Ayyaanni Bira Dabruu warra Yihudootaa geenyaan, Yesuus gara Yerusaaleemitti ol bahe.
[14] Beeytal Maqdas keeysattiis namoota bakka sana taa'anii sangoota, hoolota, himiimiis gurguran, warra maallaqa sharafaniis ni arke.
[15] Hogguus inni quncee irraa dullaa fohatee ti, hunduma isaanii hoolota isaanii tii fi sangoota isaanii wajjiin gad isaan yaase; horii warra maallaqa sharafanii tiis ni bittimse, gabatootaas ni kokombolche.
[16] Warra himiimii gurguraniin ammoo, “As keeysaa gad baafadhaa! Mana Abbaa kiyyaa tiis mana daldaalaa hin godhinaa!” jedheeni.
[17] Hogguus barattoonni isaa, “Hinaaffaan mana kee tii na gubdi” jedhamee kan barreeyfame yaadatan.
[18] As irratti Yihudoonni, “Kana godhuuf amrii akka qabdu mullisuuf, milikkita mu'ujizaa maaliiti nu agarsiifta?” jedhanii ti isa gaafatan.
[19] Hogguus Yesuus deebisee, “Beeytal Maqdas kana jiysaa! Ani ammoo guyyaa sadih keeysatti deebisee isa niin dhaaba” isaaniin jedhe.
[20] Yihudoonni ammoo, “Beeytal Maqdas kana ijaaruun isaa, bara afurtamii jaha fudhate, ati ammoo guyyaa sadih keeysatti deebiftee ti isa dhaabdaa ree?” jedhanii ti gaafatan.
[21] Yesuus garuu Beeytal Maqdas jechuun isaa, waa'ee jasada isaa ilaalchisee dubbachuuf ture.
[22] Eega inni du'aa kaafame booddee, barattoonni isaa, waan inni dubbatee ture ni yaadatan; waan Kitaabni jedhee fi dubbii Yesuus dubbatees ni amanan.
[23] Wayta inni Ayyaana Bira Dabruuf Yerusaaleem ture sanitti, namoonni hedduun milikkita mu'ujizaa kanneen inni godhe arkanii ti isatti amanan.
[24] Inni garuu namoota hundumaa akka gaaritti waan beekuuf jecha, amanee isaan irra if hin keenye.
[25] Inni waan namaa keeysa jiru waan beekuuf jecha, nama irratti, ragaan namaa isa hin barbaachifne.