[1] Bitaaniyaa ganda Maariyaamii fi obboleeytii isii Maartaatti, namticha Alaazaar jedhamu tokkoo tu dhukkubsachaa ture.
[2] Maariyaam tun tan Gooftaa axira dibdee, rifeensa mataa isii tiin miila isaa irraa hayxee dha; Alaazaar inni dhukkubsate kun ammoo obboleeysa isii ti.
[3] Kanaaf obboleeyyan isaa gara Yesuusitti nama erganii, “Yaa Gooftaa! Kunoo, inni ati jaalattu ni dhukkubsata” jedhaniin.
[4] Yesuus tana hogguu dhagaye, “Dhukkubni kun du'aan kan xumuramuu miti; ulfina Rabbii akka mullisuuf, Ilmi Rabbiitiis ittiin akka ulfaatuufi malee” jedhe.
[5] Yesuus ammoo Maartaa fi obboleeytii isii, Alaazaariis ni jaalata ture.
[6] Tahuu illee garuu, dhukkubsachuu Alaazaar eega dhagaye booda, bakkuma ture sana dabalee guyyaa lama oole.
[7] Kana booddee Yesuus, “Mee koottaa, deebinee Yihudaa ti dheeynaa!” jedhee ti barattoota isaatti dubbate.
[8] Barattoonni isaa ammoo, “Yaa barsiisaa! Dhihoo tana Yihudoonni dhagaa dhaan si dhawuu dha barbaadan; ati ammaas achi dhaquu dha yaaddaa?” jjedhaniin
[9] Yesuus garuu deebisee, “Ifni guyyaa tokkoo za'aa kudha lama qabaa mitii? Namni guyyaa dhaan deemu, ifa aduu waan arkuuf jecha hin gufatu.
[10] Namni halkaniin deemu garuu, ifa waan hin qabneef ni gufata” jedhe.
[11] Yesuus tana eega dubbatee booddee, “Alaazaar saahibni keenya rafee ti jira, Ani ammoo dhaqee tiin isa dammeysa” isaaniin jedhe.
[12] As irratti barattoonni isaa, “Yaa Gooftaa, yoo rafee jiraate ni fayya” jedhaniin.
[13] Yesuus akka Alaazaar du'e isaanitti hime, isaan garuu waa'ee hirriiba rafuu kan dubbate seehan.
[14] Kanaaf Yesuus zaahir baasee, “Alaazaar du'e jedheeni;
[15] isin amanuu akka dandeeysaniif, achi jiraachuu dhabuu kiyyaaf isiniif jecha niin gammada; amma garuu koottaa, gara isaa ti dheeynaa!” isaaniin jedhe.
[16] Toomaas inni “Lakkuu” jedhamu ammoo, “Isaan wajjiin akka duunuuf, nutiis haa yaanuu!” jedhee ti barattoota warra kaanitti dubbate.
[17] Yesuus hogguu achi gahe, Alaazaar du'ee eega awwaalame, guyyaa afur tahuu dha hubate.
[18] Bitaaniyaan Yerusaaleem irraa hanga kiilo metrii sadihii ti fagaatti.
[19] Yihudoonni hedduuniis waa'ee du'a obboleeysa isaanii tiif Maartaa fi Maariyaam jajjabeeysuuf dhufanii ti turan.
[20] Maartaan dhufa Yesuus dhageeysee ti, gad itti baate; Maariyaam garuu mana keeysa teeysi turte.
[21] Maartaan hogguus Yesuusiin, “Yaa Gooftaa, silaa ati as jiraattee, obboleeysi kiyya na duraa hin du'u ture.
[22] Amma illee waanuma ati isa kadhatte, Rabbi akka siif kannu ani niin beeka” jetteeni.
[23] Yesuus hogguus, “Obboleeysi kee du'aa ni ka'a” isiin jedhe.
[24] Maartaan ammoo deebiftee, “Guyyaa qiyaamaa, hogguu warri du'an du'aa ka'an, akka inni ka'u niin beeka” jetteeni.
[25] Yesuus garuu, “Qiyaamaan Ana, jireenyi niis Ana; namni Anatti amanu yoo du'e illee ni jiraata.
[26] Odoo jiruu kan anatti amanu hundinuu abadan hin du'u; tana ni amantaa?” jedheeni.
[27] Isiin as irratti, “Eeyye yaa Gooftaa, ati Masiihi isa gara addunyaa dhufuuf jiru, Ilma Rabbii akka taate amanee tiin jira” jetteeni.
[28] Maartaan eaga tana dubbatte booda, deemtee ti obboleeytii isii Maariyaam suuta mooggatti yaamtee, “Barsiisaan as jira, si yaamaas” jetteeni.
[29] Maariyaam akkuma tana dhageeyseen, daftee kaatee gara Yesuus dheeyxe.
[30] Yesuus, bakkuma Maartaan isa itti qunnamte sana ture malee, amma illee ganda hin seenne.
[31] Yihudoonni isii jajjabeeysuuf isii wajjiin mana keeysa turan, Maariyaam daftee kaatee gad bahuu isii agarraan, bakka qabritti booyuuf waan deemtu seehanii ti isii duukaa yaa'an.
[32] Maariyaam bakka Yesuus ture sana geeysee, hogguu isa agarte, miila Isaa irratti kuftee ti, “Yaa Gooftaa! Silaa ati as jiraattee, obboleeysi kiyya na duraa hin du'u ture” jetteeni.
[33] Yesuus booyicha isii tii fi booyicha Yihudoota warra isii wajjiin dhufanii hogguu arke, guraaramee ti garaan isa raafame.
[34] “Eeysatti awwaaltan?” jedhee gaafannaan, “Kunoo, koottuu tii ilaali yaa Gooftaa!” jedhanii ti deebisaniif.
[35] Yesuus imimmaan dhangalaase.
[36] Hogguus warri Yihudootaa, “Mee laalaa, akkamitti akka inni isa jaalatu!” jedhan.
[37] Isaan keeysaa jarri hangi tokko garuu, “Namtichi ija nama jaamaa bane kun, silaa Alaazaar akka hin duune godhuu hin dandayu turee?” jedhan.
[38] Yesuus ammaas if keeysatti cinqamaa gara qabrichaa ti dhaqe. Qabrichi holqa dhagaa ti; holqichi niis dhagaa dhaan cufamee ti ture.
[39] Hogguus Yesuus, “Dhagicha irraa fuudhaa!” jedhe; Maartaan obboleeytiin namticha du'ee ammoo, “Yaa Gooftaa, hanga ammaatti tortoree ti jira, eega awwaalame arra guyyaa afraffaa isaa ti” isaan jette.
[40] As irratti Yesuus, “Silaa amantee ulfina Rabbii akka agartu, ani sitti hin himnee?” isii dhaan jedhe.
[41] Kana booddee isaan dhagicha qabricha irraa ni kaasan; Yesuus garuu ol laalee, “Yaa Abbaa! Na dhagayuu kee tiif siin galateeyfadha.
[42] Akka ati hoggu hundumaa na dhageeysuus, ani beekee tiin jira; garuu namoonni as dhadhaabbatan kun, akka ati ana ergite haa amananiifiin tana dubbadhe” jedhe.
[43] Tana jedhee sagalee guddaa dhaan, “Alaazaar as bahi!” jedhee ti yaame.
[44] Kunoo, namtichi du'ee ture sun, qabricha keeysaa gad bahe; miila isaa lamaanii fi harka isaa lamaaniis gasaroo liinoo tiin hidhamee, fuulli isaattiis huccuun maramee ti ture. Yesuus, “Irraa hiikaa tii gad dhiisaa, haa deemu!” jedhee ti isaan ajaje.
[45] Yihudoota gara Maariyaam dhufan keeysaa hedduun, waan Yesuus godhe arkanii ti itti amanan.
[46] Isaan keeysaa hangi tokko ammoo, gara warra Fariisotaa dhaqanii ti, waan Yesuus godhe isaanitti himan.
[47] Hogguus luboonni warri angafoonninii fi Fariisonni yaa'ii warra Yihudootaa walitti yaamanii, “Waa'ee namticha milikkita mu'ujizaa hedduu agarsiisaa jiru kanaa maal godhuu qabna?
[48] Akkanumatti yoo isa dhiifne, nama iyyuu isatti ni amanu; warri Roomaa tiis dhufanii, Beeytal Maqdas keenyaa fi ammaas ummata keenyaas nu duraa balleeysu” jedhan.
[49] Isaan keeysaa, Qayyaafaa kan jedhamu tokko, bara sana angafa lubootaa ti ture; inni kun, “Isin waa takka illee hin beeytan.
[50] Ummanni hundinuu dhumuu mannaa, namni tokko ummataaf du'uun akka isiniif irra wayyaa tahe hin hubattan” isaaniin jedhe.
[51] Inni dubbii tana if keeysaa fuudhee hin dubbanne; bara sana angafa lubootaa waan tureef jecha, Yesuus ummata sanaaf du'uun akka irra jiru, raajii dubbate.
[52] Saba sana qofaaf odoo hin tahin, joollee Rabbii warra bittinnaawan bakka takkatti walitti qabuuf jecha ture.
[53] Akkasitti guyyaa san irraa jalqabanii, Yesuus ajjeesuuf murtoo godhan.
[54] Kana irraa kan ka'e Yesuus zaahiritti Yihudoota jidduu deddeebi'uu dhiisee, gara kutaa huffee gammoojjitti dhihaatuu, gara magaalaa Efreem jedhamutti jalaa deemee ti, barattoota isaa tiin wajjiin achi bubbule.
[55] Ayyaanni Bira Dabruu warra Yihudootaa dhihaannaan, keeysaa namoonni hedduun, ayyaanichi odoo hin gahin dura if xaaharuuf Yerusaaleemitti ol bahan.
[56] Isaan kun Yesuusii wajjiin wal arkuu dha barbaadan; Beeytal Maqdas keeysa dhadhaabbatanii, “Maal isinitti fakkaata? Inni gara ayyaanichaa, inumaa hin dhufuu?” waliin jedhan.
[57] Luboonni warri angafoonninii fi Fariisonni, Yesuus qabuuf jecha, namni bakka inni jiru beeku akka isaan beeysisuuf ajaja baasan.