[1] Yesuus itti furee, “Ani akka isin hin gufanneef jechaan kana hundumaa isinitti hime.
[2] Tokkummaa waldaya isaanii keeysaa isin ni baasu; inumaatuu, waytiin namni isin ajjeese, kan Rabbiif ibaa godhe itti fakkaattu, dhufuuf jirti.
[3] Isaan Abbaa yookiin anaas waan hin beekiniif kana hundumaa godhu.
[4] Garuu, ani kanneen isin beeysisuun koo, za'aan hogguu geeyse, waaniin ani isinitti hime tana akka yaadattaniifi. “Duraan ani waaniin isin wajjiin tureef jecha, tana isinitti hin himne” jedhe.
[5] Yesuus, “Amma garuu gara isa na ergeettiin deema, isin tokko illeen, ‘Eeysa dheeyxa?’ jettanii ana hin gaafattan.
[6] Ani waan kanneen isinitti himnaan, naasuun qalbii teeysan guutte.
[7] Dhugumaan isinitti hima, deemuu kiyyaa tu isiniif irra wayyaa dha; ani deemu malees, jajjabeeysaan gara keeysan hin dhufu; garuu, ani yooniin deeme isa gara keeysaniin erga.
[8] Inni niis hogguu dhufu, waa'ee dilii, waa'ee qaceelummaa tii fi waa'ee firdii laalchisuun biyya addunyaa ni hubachiisa.
[9] Waa'ee dilii laalchisee, sababa namoonni anatti hin amaniniif.
[10] Waa'ee qaceelummaa ilaalchisee, sababaan ani gara Abbaa, bakka isin asii achi itti ana hin agarretti deemuufi.
[11] Waa'ee firdii ilaalchisee, sababni isa addunyaa tana moohu irratti yakki waan murameefi.
[12] “Isin amma fudhachuu hin dandeeysan malee, silaa waaniin isinitti himu hedduun qabaan ture.
[13] Garuu, inni Ruuha dhugaa hogguu dhufu, isaa tu dhuguma hundatti isin geeysa; inni niis ifuma irraa kaasee hin dubbatu, waanuma dhagaye qofa dubbata malee, waan ddhufa jiruus isinitti mullisa
[14] Waan kiyya tahe irraa fuudhuu dhaan waan isinitti mullisuuf jecha, inni ulfina anaaf kanna.
[15] Wanni Abbaan qabu hundinuu kiyya; kanaafiin inni kiyya waan tahe irraa fuudhee ti isiniif mullisa, jedhee isinitti dubbadhe” jedhe.
[16] Yesuus, “Wayta xiqqoo booddee ana hin agartan, ammaas xiqqo achiin booddee deebitanii ti na agartu” jedhe.
[17] Barattoota isaa keeysaa hammi tokko, “‘Wayta xiqqoo booddee ana hin agartan, ammaas xiqqo achiin booddee, deebitanii ti na agartu’, ammaas wayta biraa, ‘Ani gara Abbaa deemuu kiyya’ nuun jechuun isaa kun maali?” waliin jedhan.
[18] Itti furanii tiis, “‘Wayta xiqqoo’ jechuun isaa tun maali? Maaluma akka inni jechuu barbaade nuuf hin galu” jedhan.
[19] Yesuus akka isaan isa gaafachuu barbaadan hubatee ti, “Taniin ani ‘Wayta xiqqoo booddee ana hin agartan, ammaas wayta xiqqo achiin booddee deebitanii ti na agartu’ jedhe maal jechuu koo akka tahe, wal gaggaafachaa ti jirtuu?
[20] Dhugumaan isiniin jedha; isin ni boochu ni waywaattuusi; biiyti addunyaa garuu ni gammaddi; isin ni naatu, naasuun teeysan garuu gammachutti ni jijjiiramti.
[21] Dubartiin takka dahuuf wayta geeyse, wayti cimiimmuu isii dhaa waan gaheef jecha ni cinqamti; garuu, eega ilmoo deeyse booda, cinqii isii hundumaa irraanfattee ti, namni tokko addunyaa irratti waan dhalateef jecha, ni gammaddi.
[22] Teeysaniis akkanuma; ammaaf naasuu dha qabdu; ani garuu deebi'ee tiin isin arka, garaan keeysaniis ni gammada, gammachuu teeysaniis eenyu illeen isin irraa hin fudhatu.
[23] Gaafas isin humaa ana hin gaafattan; dhugumaan isinitti hima, waanuma isin maqaa kiyyaan Abbaa kadhattan, inni isiniif ni kanna.
[24] Hamma ammaatti isin maqaa kiyyaan waa takka illee hin kadhanne; gammachuun teeysan guutuu akka taatuuf kadhadhaa, ni arkattuusi!” isaaniin jedhe.
[25] Yesuus, “Kana hundumaa dubbii haala fakkeenyaa tiin isinitti dubbadhee tiin jira; garuu waytiniin ani dubbii haala fakkeenyaa tiin isinitti hin dubbanne ni dhufa; hogguus zaahirittiin waa'ee Abbaa isinitti hima.
[26] Gaafas isin maqaa kiyyaan ni kadhattu, aniis ammoo, ‘Mee Abbaan isiniif kadhadha’ hin jedhu.
[27] Isin waan na jaalattaniif, Abbaa biraa dhufuu kiyyaas waan amantaniif jecha, Abbaaniis ifii fuu isin jaalata.
[28] Abbaa biraa bahee tiin gara addunyaa tana dhufe, amma ammoo addunyaa dhiisee gara Abbaattiin deebi'a” jedhe.
[29] Hogguus barattoonni isaa, “Amma gaa kunoo, dubbii haala fakkeenyaa tiin odoo hin tahin, zaahiritti dubbatta.
[30] Amma ati waan hundumaa akka beeytu, gaaffii illee namni si gaafachuu akka si hin barbaachifne, kunoo ni agarra; kuniis ati Rabbi biraa dhufuu kee akka amannu nu godha” jedhaniini.
[31] Yesuus ammoo isaaniif deebisee, “Ammumaa ni amantuu?
[32] Garuu, wayti isin kophaatti itti na dhiiftanii gara mana keeysanitti bittimfamtan ni dhufti, kunoo, dhuftee huu; ani garuu kophaa kiyyaa miti, Abbaan anaan wajjiin jira.
[33] Ana keeysatti nagaya akka arkattaniif jechaan kana hundumaa isinitti himee tiin jira; addunyaa tana keeysatti, rakkinaa tu isin mudata. Abshir, ani kunoo, addunyaa moohadhee tiin jira” jedhe.