[1] Guyyaa jalqaba torbaanitti, [gaafa Dilbataa] barii odoo dukkanaawuu ti, Maariyaam Magdalaa gara qabrichaa dhuftee, dhagichi qabricha ittiin cufanii turan, qabricha irraa duruu akka kaafame agarte.
[2] Isiin fiigaa gara Simoon Phexiroosii fi gara barattuu kaan, kan Yesuus jaalatee dhuftee, “Goofticha qabrii keeysaa fuudhanii ti jiru, eeysa akka isa kaayaniis hin beeynu!” jettee ti isaanitti himte.
[3] Hogguusuma Phexiroosii fi barattuun inni kaaniis bahanii, gara qabrichaa dhaqan.
[4] Isaan lamaan wajjiin fiigan; barattuun kaan garuu Phexiroos dura dabree ti fiigee, dafee qabricha bira gahe.
[5] Inni niis gad godhatee, kafanni achi akka jiru arke malee, keeysa hin seenne.
[6] Simoon Phexiroos ammoo isa booddee dhaan dhufee, hogguusuma qabricha seenee, kafanni achi kaayamee ti arke.
[7] Shaashiin mataa Yesuus irra turte garuu, kafanaa wajjiin hin kaayamne, dachaafamee kophaatti bakka takka turte malee.
[8] Kana booddee barattuun kaan, inni Phexiroos dura qabrii bira gahee turees, keeysa seenee ti, kana arkee amane.
[9] Kitaabni, “Inni warra du'an keeysaa ka'uun isa irra jira” jedha, isaan garuu kana hamma ammaatti hin hubanne.
[10] Kana booddee barattoonni deebi'anii ti manatti galan.
[11] Maariyaam alaan qabrii cinaa dhaabbattee ti boochi turte; isiin booyaa ti gadi godhattee qabricha keeysa ilaalte.
[12] Maleeykoonni Rabbii lama uffata adaadii uffatanii, bakka reefki Yesuus kaayamee ture, tokko gara mataa tiin, kaan gara miilaa tiin odoo tattaa'anii ti agarte.
[13] Isaan hogguus, “Yaa intalo, maaliif boocha?” jedhanii ti isii gaafatan; isiin ammoo, “Gooftaa kiyya fudhatanii ti jiru, aniis bakka isa kaayan hin beeku” jettee ti isaaniif deebifte.
[14] Kana jechaa hogguu if duuba garagalte, Yesuus agarte. Inni achi dhaabbata ture; isiin garuu Yesuus tahuu isaa hin hubanne.
[15] Yesuus ammoo, “Yaa intalo, maaliif boocha? Eenyu barbaadda?” jedhee ti isii gaafate; isiin ammoo nama ooyiruu eegu isa seetee ti, “Gooftaa koo, ati yoo asii fuute, eeysa akka isa keeyse anatti himi; aniis dhaqee tiin isa fudhadha” isaan jette.
[16] Hogguus Yesuus, “Maariyaam!” isii dhaan jedhe. Isiin ammoo isatti garagaltee ti afaan Ibraayisxitti “Rabbuunii!” isaan jette; ma'anaan isaa tiis “Barsiisaa” jechuu dha.
[17] Yesuus ammoo, “Na hin tuqin! Ani amma illee gara Abbaatti ol hin baane; gara obboleeyyan kiyyaa deemii dhaqii tii, ‘Ani gara Abbaa kiyyaa tii fi Abbaa keeysanii, gara Rabbii kiyyaa tii fi Rabbii keeysanii tiin ol baha’ jedhii isaanitti himi!” jedhee ti isii ajaje.
[18] Hogguus Maariyaam Magdalaa dhuftee ti, “Ani Goofticha arkee tiin jira, inni dhaamsa kana anatti dhaamee ti jira” jettee ti barattootatti himte.
[19] Guyyaa jalqaba torbaanitti [gaafa Dilbataa] galgala, barattoonni Yihudoota waan sodaataniif jecha, mana cufatanii ti tattaa'an; hogguus Yesuus dhufee ti isaan jidduu dhaabbatee, “Nagayni isiniif haa tahu!” isaaniin jedhe.
[20] Tana eega jedhe booddee harka isaa lamaanii fi cinaacha isaa isaan agarsiise; barattoonni niis Goofticha arkanii ti gammadan.
[21] Yesuus ammaas itti deebi'ee, “Nagayni isiniif haa tahu!” isaaniin jedhe; itti furee tiis, “Abbaan akkuma ana erge, aniis isiniin erga” jedhee ti isaanitti dubbate.
[22] Kana jechaa ti hafuura isaanitti baafatee, “Ruuhal Qudus fudhadhaa!
[23] Dilii isaanii warri isin oomfii gootaniif, isaaniif oomfii godhamteef; dilii isaanii isin yoo oomfii godhuuf baattan, isaan irratti qabamtee ti jirti” isaaniin jedhe.
[24] Barattoota Gooftaa kudha lamaan keeysaa, Toomaas kan “Lakkuu” jedhamu tokko, hogguu Yesuus dhufe barattoota wajjiin hin turre.
[25] Barattoonni warri kaaniis, “Gooftaa agarree ti jirra” jedhanii ti itti himan; inni garuu, “Harka isaa lamaan irratti bakka mismaarri isa ure yoon arke malee, quba kiyyaas yoon uraa mismaaraa san keeysa kaaye malee, harka kiyyaas cinaacha isaa keeysa yoon kaaye malee, hin amanu!” isaaniin jedhe.
[26] Guyyaa saddeet booddee ammaas barattoonni isaa walitti qabamanii ti mana keeysa turan, Toomaasiis isaanii wajjiin ture. Isaan mana cufatanii odoo tattaa'anii, Yesuus dhufee ti isaan jidduu dhaabbatee, “Nagayni isiniif haa tahu!” isaaniin jedhe.
[27] Kana booddee Toomaasiin, “Quba kee fidii as irra kaahi, harka kiyya lamaan ilaali, harka kee fidii tii cinaacha kiyya keeysa kaahi; nama hin amanne hin tahin, kan amante tahi malee!” jedheeni.
[28] Toomaasiis, “Gooftaa koo, Rabbii koo!” jedhee ti deebiseef.
[29] Yesuus ammoo, “Yaa Toomaas, waan ana agarteef amantee? Odoo na hin arkin warri amanan, akkam eeybifamoo dha” isaan jedhe.
[30] Yesuus kitaaba kana keeysatti waan hin barreeyfamin, milikkittan biraa hedduu dha barattoota isaa duratti hojjatee ti jira.
[31] Isaan kanneen garuu, Yesuus, Kiristoos, Ilma Rabbii tahuu isaa akka amantanii fi, ammaas amanuu keeysaniiniis maqaa isaa tiin jireenya akka qabaattaniif jecha barreeyfaman.