[1] Yesuus Yohannis irra caalaa, barattootaas dabalachaa, cuuphaa tiis akka ture, warri Fariisotaa dhagayuun isaanii, Yesuus bira gahe.
[2] Oduma tahe illee, barattoota isaa tu cuuphe malee, Yesuus ifiif hin cuuphne ture.
[3] Kana booddee inni kutaa Yihudaa dhiisee ti, gara Galiilaatti deeme.
[4] Achi gahuuf, Samaariyaa keeysa dabruu tu isa irra ture.
[5] Kutaa Samaariyaa keeysaa gara magaalaa Siikaar jedhamu tokkootti dhufe; mandartichi lafa Yaaqoob ilma isaa Yoseefiif kannetti dhihoo dha.
[6] Bishaan boolla Yaaqoob achi ture. Yesuus karaa deemaa oolee waan dadhabeef jecha, boolla bishaanii sana cinaa gad taa'e; wayti isaa tiis akka sa'aatii jahaa waaree dha ture.
[7] Dubartiin Samaariyaa takkaas bishaan waraabuuf dhufte; hogguus Yesuus, “Bishaan dhugaatii anaaf kanni!” isiin jedhe.
[8] Barattoonni isaa waan nyaataa bituuf jecha gara magaalaaa deemanii ti turan.
[9] Dubartiin Samaariyaa sun isaan, “Akkamitti ati Yihudii taatee, ana dubartii Samaariyaa, bishaan dhugaatii gaafatta?” jetteeni. Yihudoonni warra Samaariyaa wajjiin meeshaa tokkotti hin nyaatan turan.
[10] Yesuus ammoo deebisee, “Kannaa Rabbii silaa beeytee, inni ‘Bishaan dhugaatii anaaf kanni!’ siin jedhe kuniis, eenyu akka inni tahe odoo hubattee, silaa sii tu isa kadhata ture, inni niis kunoo silaa bishaan jiraataa siif ni kanna ture” jedheeni.
[11] Dubartittiin as irratti, “Yaa Gooftaa, ati kunoo waan ittiin dubbuyfattu hin qabdu, boolliti bishaanii tiis gad fagoo dha, bishaan jiraataa sana eeysaa fidda ree?
[12] Abbaa keenya Yaaqoob irra ni caaltaa? Isaa tu boolla tana nuuf kanne, ifiifiis irraa dhuge, joolleen isaa tii fi horiiniis irraa dhugan” jetteeni.
[13] Yesuus ammoo, “Bishaan kana irraa namni dhugu hundinuu deebi'ee ni dheebota;
[14] bishaaniin ani kannuuf irraa namni dhugu garuu, bara baraaf hin dheebotu; bishaaniin ani kannuuf, isa keeysatti burqaa bishaanii kan jireenya bara baraa tiif burqu tahaaf” isiin jedhe.
[15] As irratti dubartittiin isaan, “Yaa Gooftaa! Deebi'ee akkaan ani hin dheebonneef, ammaas bishaan waraabuufiis akkaan asitti hin deddeebineef jecha, bishaan sana anaaf kanni!” jetteeni.
[16] Yesuus ammoo, “Deemii, jaarsa kee yaamii koottu!” jedheeni.
[17] Dubartittiin deebiftee, “Ani bar jaarsa hin qabuu” jetteeni; Yesuus ammoo, “Jaarsa hin qabu jechuun kee sirrii dha.
[18] Ati jaarsa shan heerumtee ti turte; namtichi amma wajjiin jirtu kun jaarsa kee tii miti; tana dhugaa dha natti dubbatte” isiin jedhe.
[19] As irratti dubartittiin, “Yaa Gooftaa, ati nabiyyii dha natti fakkaata.
[20] Abboonni keenya gaara kana gubbatti sagadan; isin warri Yihudootaa ammoo ‘Lafti Rabbiif irratti sagaduu qabnu Yerusaaleem keeysa’ jettu” isaan jette.
[21] Yesuus hogguus, “Yaa intalo, na amani, guyyaan isin gaara kana gubbatti yookiin Yerusaaleemitti Abbaa dhaaf hin saganne dhufuuf jira.
[22] Isin waan hin beeyneef sagaddu, nuti garuu waan beeynuuf saganna, najaatni Yihudoota keeysaa dhufa.
[23] Za'aan warri dhugaan sagadan, ruuhaa fi dhugaa dhaan Abbaadhaaf sagadan dhufa jira; kunoo, inni niis ammuma illee dhufee ti jira. Abbaaniis warra akkasitti isaaf sagadan barbaada.
[24] Rabbi Ruuhaa dha; warri isaaf sagadaniis Ruuhaa fi dhugaa dhaan isaaf sagaduu tu irra jira” isiin jedhe.
[25] Dubartittiin ammoo deebiftee, “Masiihi kan Kiristoos jedhamu akka dhufu niin beeka; inni gaafa dhufu waan hundumaa nutti hima” jetteeni.
[26] Yesuus hogguus, “Anuma kan sii wajjiin dubbachutti jiruu tu isa sana” isiin jedhe.
[27] Hogguu tana barattoonni isaa deebi'anii ti dhufan; dubartii wajjiin dubbachuu isaa tiifiis ni ajaa'iban, garuu isaan keeysaa tokko illeen, maal akka isiin barbaaddu, yookiin maaliif akka inni isii dhaa wajjiin haasawu hin gaafanne.
[28] Dubartittiin hogguus okkotee isii achumatti dhiiftee, gara magaalaaa dheeyxee namootattiis himtee,
[29] “Namticha waaniin ani kanaan dura godhe hundumaa anatti hime tokko koottaa laalaa; inni kun Kiristoos tahinnaa laataa?” jette.
[30] Namoonni hogguus mandaricha keeysaa bahanii, gara isaa dhufutti ka'an.
[31] Tana jiddutti barattoonni isaa, “Yaa barsiisaa, waa nyaadhu!” jechaa isa gaafachaa ti turan.
[32] Inni garuu deebisee, “Ani nyaata isin hin beeyne kaniin nyaadhuun qaba” isaaniin jedhe.
[33] Hogguus barattoonni, “Namaa tu waan nyaatu fideefii?” waliin jedhan.
[34] Yesuus ammoo, “Nyaanni kiyya fedha isa na ergee godhuu dha, hojii isaa tiis raawwachuu dha.
[35] Isin kunoo, ‘Ji'a afur booddee wayti oomishaa ni gaha’ jettuu mitii? Ija teeysaniin maasicha laalaa! Ani kunoo, midhaan bilchaatee, oomishamuuf akka gaheen isin beeysisa.
[36] Inni haamuus ammuma illee gatii isaa ni arkata, firii midhaantichaa tiis jireenya bara baraa tiif walitti ni qaba; kuniis namtichi facaasuu fi namtichi haamu wajjiin haa gammadaniifi.
[37] Akkasitti makmaaktichi, ‘Namni tokko ni facaasa, inni kaan ammoo ni haama’ jedhu sun kanaan dhugoomfama.
[38] Ani waan isin itti hin carraaqin akka haamtaniifiin isin erge; warri biraa itti laffa'an, isin ammoo lifaatii isaanii irraa faaydaa dha haammattan” isaaniin jedhe.
[39] Sababii dubartittiin, “Namticha waaniin ani kanaan dura godhe hundumaa anatti hime” jettee ragaa baateef jecha, magaalaa sanii warri Samaariyaa hedduun isatti amanan.
[40] Warri Samaariyaa hogguu isa bira dhufan, isaan bira akka turuuf Yesuus kadhannaan, inni niis guyyaa lamaaf isaan bira ture.
[41] Namoonni hedduuniis qoowlii isaa tiif jecha isatti amanan.
[42] Jarri hogguus dubartittii dhaan, “Kunoo, nuti asii achi waan ati dubbatteef amanna odoo hin tahin, nuti ifii keenyaaf dhageenyee ti jirra, namtichi kun naja-baasoo addunyaa tahuu isaa nutiis mirkanatti beeyne” jedhan.
[43] Guyyaa lamaan sana booddees Yesuus achii bahee, kutaa Galiilaa ti dhaqe.
[44] Yesuus, nabiyyiin tokko dhaloota isaa keeysatti akka hin kabajamne dubbatee ti ture.
[45] Warri Galiilaa tiis gara Ayyaana Bira Dabrutti ol bahanii, guyyaa ayyaanaa sana Yerusaaleemitti waan inni godhe hundumaa waan arkaniif jecha, hogguu inni Galiilaa gahe isa simatan.
[46] Inni deebi'ee Qaanaa Galiilaa, bakka itti bishaan daadhii inabaatti jijjiire dhufe; Qifirnaahomittiis namticha kaadamaa mootii tokko, kan ilmi isaa duraa dhukkubsatee tu ture.
[47] Yesuus Yihudaa ti irraa Galiilaa dhufuu isaa hogguu dhagaye, namtichi kun gara isaa dhaquuf Qifirnaahomitti gad bu'ee, ilma isaa kan yarate akka fayyisuuf Yesuus kadhate.
[48] Yesuus ammoo, “Silaa huu isin milikkitaa fi baasa yoo agartan malee, abadan hin amantan” jedheeni.
[49] Namtichi kaadamaan warra mootii sun, “Yaa Gooftaa, mucaan kiyya odoo hin duune dura gad koottu!” jedheeni.
[50] Yesuus ammoo, “Deemi! Ilmi kee siif jiraata” isaan jedhe; namtichi niis qoowlii Yesuus isatti dubbate, amanee ti deeme.
[51] Gara manaatti odoo deemaa jiruu, hojjatoonni isaa karaa irratti itti dhufanii, “Ilmi kee du'a irraa hafe” jedhanii ti itti himan.
[52] Inni ammoo sa'aatii mucichi itti wayyaawe isaan xiinxallaan, isaan ammoo “Kaleeysa sa'aatii torbaffaatti leeydaan isa gad dhiifte” jedhaniin.
[53] Hogguus abbaan mucichaa wayta itti Yesuus, “Ilmi kee siif jiraata” isaan jedhe tahuu isaa ti hubate; hogguu tana inninii fi haaskaan hundi niis ni amanan.
[54] Yesuus Yihudaa dhaa gara Galiilaatti eega deebi'ee, kanaan milikkita mu'ujizaa lammaffaa godhuu isaa ti.