[1] Yesuus odoo karaa dabraa nama dhaloota isaa tii jalqabee jaamaa tahe tokko arke.
[2] Hogguus barattoonni isaa, “Yaa barsiisaa! Namtichi kun dilii eenyuu tiif jaamaa tahee dhalate? Isaa tu yakke moo yookiin haawwan isaa tu yakke?” jedhanii ti Yesuus gaafatan.
[3] Yesuus ammoo deebisee, “Inni dilii hojjateef, yookiin haawwan isaa dilii hojjatanii fii miti, kun wanni taheef, hojiin Rabbii akka isa irratti mullattuufi.
[4] Guyyaan odoo jiruu, hojii isa ana ergee dalaguu tu ana irra jira; wayti namni tokko illeen itti hojjachuu hin dandeenye halkan kunoo, dhufa jira.
[5] Addunyaa keeysa hammaan jirutti, ani ifaa addunyaa ti” isaaniin jedhe.
[6] Yesuus akkuma tana jedheeni, lafatti tufee, hancufa isaa tiin biyyee dhoqqeeysee, dhoqqee ija namtichaatti dibe.
[7] Namtichaaniis, “Deemii qullata Siilo'amitti dhiqadhu!” jedheeni; “Siilo'am” jechuun kan ergame jechuu dha. Namtichi hogguusuma deemee ti dhiqatee, ija isaa tiiniis arkaa ti deebi'ee dhufe.
[8] Olloonni isaa tii fi warri kanaan dura odoo inni kadhatuu arkan, “Inni kun namticha taa'ee kadhachaa turee mitii?” jedhanii ti gaafatan.
[9] Namoonni hammi tokko, “Eeyye isuma” jedhan; kaan ammoo, “Lakkisaa, isa fakkaata malee” jedhan. Namtichi hogguus, “Ani isuma” jedhe.
[10] Namoonni ammoo, “Ijji tee lachuu akkamitti siif banaman ree?” jedhanii ti isa gaafatan.
[11] Hogguus inni, “Namticha Yesuus jedhamuu tu biyyee dhoqqeeysee, ija tiyya lachutti anaaf dibee, ‘Gara qullata Siilo'am dhaqii tii dhiqadhu!’ anaan jedhe. Aniis dhaqee dhiqannaan arkuun dandaye” jedhee ti isaaniif deebise.
[12] Jarri ammoo, “Inni sun eeysa jira?” jedhanii ti isa gaafatan; namtichi garuu, “Ani hin beeku” jedhee ti deebiseef.
[13] Isaan hogguus namticha dur jaamaa ture sana Fariisotaatti dhiheeysan.
[14] Guyyaan Yesuus biyyee dhoqqeeysee, ija namticha jaamaa itti bane guyyaa Sanbataa ti ture.
[15] Fariisonni niis ammaas akkamitti arkuu akka dandaye namticha gaafatan; namtichi hogguus, “Inni ija tiyya irra dhoqqee dha kaaye, ani ammoo niin dhiqadhe, niin arkees!” isaaniin jedhe.
[16] Fariisota keeysaa hammi tokko, “Namtichi kun guyyaa Sanbataa waan hin eeyneef, nama Rabbi biraa dhufe tahuu hin dandayu” jedhan. Isaanuma keeysaa warri kaan ammoo, “Namni dilaawaan tokko akkamitti milikkita mu'ujizaa kana hundumaa hojjatee agarsiisuu dandaya?” jennaan, as irratti yaadaan garkar bahan.
[17] Kana booddee warri Fariisotaa namticha jaamaa ture sanaan, “Waa'ee namticha ija siif bane kanaa maal jetta?” jedhaniin; hogguus namtichi, “Inni nabiyyii dha” jedhee ti deebiseef.
[18] Yihudoonni amma illee, namtichi kun jaamaa turee, akka amma arkuu dandayees hin amanne; kanaaf haawwan namticha kanaatti erganii ti ifitti yaamsisan.
[19] Warra yaamaman sanaaniis, “Inni kun ilma keeysan, kan isin jaamaa tahee ti dhalate jettanii? Amma ammoo akkamitti arka ree?” jedhanii ti gaafatan.
[20] Haawwan isaa deebisanii, “Akka inni ilma keenya tahe, jaamaa tahee tiis akka dhalate ni beeyna.
[21] Amma garuu akkamitti akka arku, hin beeynu; eenyu ija isaa lachuu akka baneefiis nuti hin beeynu; inni nama guddaa dha; waan mataa isaa ifii fuu dubbachuu dha dandayaa, isuma gaafadhaa!” jedhaniin.
[22] Haawwan isaa Yihudoota waan sodaataniif jecha kana jedhan; nam tokko illeen “Yesuus Masiihicha” jedhee ragaa baanaan, hogguusuma tokkummaa waldaya isaanii keeysaa akka baafamu Yihudoonni duruun waan murteeysaniif jecha ture.
[23] Sababii kanaaf ture, kan haawwan isaa “Inni nama guddaa dha, isuma gaafadhaa!” wanni jedhaniif.
[24] Eegasii Fariisonni namticha jaamaa ture sana hoggaa lammaffaa yaamanii ti, “Ati Rabbiif ulfina kanni! Namtichi kun dilaawaa tahuu isaa nuti ni beeyna” isaan jedhan.
[25] Namtichi garuu, “Inni dilaawaa tahuu isaa ani hin beeku, waan takka qofaan beeka; ani jaamaa tahee tiin dhaladhe, amma garuu kunoo, niin arka” jedhee ti isaaniif deebise.
[26] As irratti isaan, “Maal sitti godhe? Akkamitti ija tee tiis siif bane?” jedhanii ti gaafatan.
[27] Inni ammoo, “Kanaan dura ani isinitti himnaan dhaggeeyfachuu dha diddan; maaliif ammaas dhagayuu barbaaddan? Akkami sa! Isiniis barattoota isaa tahuu dha feetuu?” jedhee ti deebiseef.
[28] Fariisonni as irratti namtichatti orihanii, “Sii tu barattuu isaa ti, nuti garuu barattoota Musee ti.
[29] Rabbi Museetti akka dubbate nuti ni beeyna; namtichi kun garuu eeysaa akka inni dhufe illee hin beeynu” jedhaniin.
[30] Namtichi deebisee, “Isin eeysaa akka inni dhufe illee hin beeynu jettu; tun waanuma ajaa'ibaa ti; inni kunoo, ija tiyya anaaf bane.
[31] Rabbi warra dilaawootaaf akka hin dhageenye ni beeyna; nama isa sodaatuuf, fedhii isaa tiis kan raawwatuuf garuu ni dhagaya.
[32] Duruma irraa jalqabee, nama jaamaa tahee dhalateef, kan ija isaa bane, namni tokko illeen dhagayee hin beeku.
[33] Namni kun odoo Rabbi biraa dhufuu baate, waa takka illee hojjachuu hin dandayu ture” isaaniin jedhe.
[34] Isaan ammoo deebisanii, “Suma dilaawaa tu nu barsiisaa?” jedhaniin; hogguusuma namticha, tokkummaa waldaya isaanii keeysaa baasan.
[35] Yesuus akka isaan tokkummaa waldaya isaanii keeysaa isa baasan ni dhagaye; hogguu isa arkees, “Ilma Namaatti ni amantaa?” isaan jedhe.
[36] Namtichi garuu, “Eenyu inni, yaa Gooftaa? Akkaan itti amanuuf, anatti himi!” jedhee ti deebiseef.
[37] Yesuus deebisee, “Kunoo, ammaa huu agartee ti jirta; kan siin wajjiin dubbachaa jiruu tu isa” jedheeni.
[38] Namtichi deebisee, “Niin amana, yaa Gooftaa koo” jedhee ti jilbiiffatee Yesuusiif sagade.
[39] Yesuus ammoo, “Warri jaamaan akka arkan, warri arkan ammoo akka jaaman, firdii godhuufiin ani gara addunyaa tanaa dhufee jira” jedhe.
[40] Fariisota warra isaa wajjiin turan keeysaa jarreen tokko kana dhagayanii ti, “Toolee, nuuniis jaamota jechuu kee tii ree?” jedhaniin
[41] Yesuus ammoo, “Jaamota silaa taatanii, dilii isinitti hin tahu ture; amma garuu, isin ‘Ni agarra’ waan jettaniif, diliin teeysan isin irratti hafti” jedhee ti isaaniif deebise.