[1] Kanaan booddee ayyaana warra Yihudootaa tu ture; Yesuusiis gara Yerusaaleemitti ol bahe.
[2] Achittiis “Karra hoolaa” tan jedhamtu cinaa qullata bishaanii, afaan Ibraayisxitti “Beetzataa” kan jedhamu tokkoo tu ture; bishaan sana bira hulluuqoo baballoo shantu ture.
[3] Namoonni dhukkubsatoon hedduun, warri jaaman, warri naaffatan, warri qaamni isaanii laamshawees achi cicciisanii, [raafamuu bishaantichaa ni eeggatu turan.
[4] Maleeykaan Rabbii gaaf-gaaf bishaanticha ni raasa; raafamuu isaa booddee, namni dura bishaanticha keeysa seene uzrii kam irraa huu ni fayya ture].
[5] Namticha bara soddomii saddeet dhukkubsate tokkoo tu achi ture.
[6] Yesuus hogguu namticha dhukkubsatee ciisu sana arke, bara dheeraaf dhukkubsachuu isaa beekee ti, “Fayyuu ni barbaaddaa?” jedhee ti isa gaafate.
[7] Namtichi dhukkubsataan sun, “Gooftaa koo, bishaantichi hogguu raafamu sochi bishaantichaa keeysa nama na buusu hin qabu; ifii kiyyaa odoon itti tiradhuu ti, namni biraa na dura keeysa seena” jedhee ti deebiseef.
[8] Yesuus ammoo, “Ka'ii, siree tee fudhadhuu tii deemi!” isaan jedhe.
[9] Namtichi niis hogguusuma fayyee ti, siree isaa fudhatee achii deeme; guyyaan namtichi kun itti fayye guyyaa Sanbataa ti ture.
[10] Hogguus warri Yihudootaa namticha fayye sanaan, “Guyyaan arraa Sanbata, siree baadhachuu seerri si dhoorka” jedhaniin.
[11] Inni garuu deebisee, “Namticha ana fayyisee tu, ‘Siree tee fudhadhuu tii deemi!’ anaan jedhe” isaaniin jedhe.
[12] Isaan ammoo, “Eenyu namtichi, ‘Siree tee fudhadhuu tii deemi’ jedhee sitti hime?” jedhanii ti isa gaafatan.
[13] Namtichi fayye sun garuu, eenyu akka isa fayyise hin beeyne; Yesuus ammoo namoonni bakka sanitti waan tuuchaniif jecha, achii Deemee ti ture.
[14] Eegasii Yesuus namticha fayye sana Beeytal Maqdasitti arkee ti, “Kunoo, amma fayyitee ti jirta; eegasuu kan kana irra caalu akka sitti hin dhufneef, asii achi dilii hin godhin!” isaan jedhe.
[15] Namtichi hogguus deemee ti, kan isa fayyise Yesuus akka tahe warra Yihudootaatti hime.
[16] Yihudoonni as irratti, Yesuus hojii akkasii guyyaa Sanbataatti waan hojjateef jecha, isa arihachutti ka'an.
[17] Yesuus garuu, “Abbaan kiyya amma illee hojjachutti jira, aniis ammoo niin hojjadha” jedhee ti isaanitti dubbate.
[18] Kana dhageenyaan Yihudoonni, Yesuus seera Sanbataa caphsuu qofa odoo hin tahin, Rabbi, Abbaa kiyya jechuu isaa tiin Rabbitti if qixxeeysee ti jira jedhanii ti isa ajjeesuuf daran yaadan.
[19] Yesuus itti furee, “Dhugumaan isinitti hima, Ilmi ifii isaa tiin humaa godhuu hin dandayu, waan Abbaan isaa godhu qofa laalee ti godha; duuba, waanuma Abbaan hojjatu, Ilmi niis ammaas sanuma hojjata.
[20] Abbaan Ilma ni jaalata, waan ifii hojjatu hundumaa Ilmatti ni agarsiisa; isin akka ajaa'ibdaniif inni hojii kana irra caalu illee isatti agarsiisuuf deema.
[21] Akkuma Abbaan warra du'an kaasee isaan jiraachisutti, Ilmi niis ammaas akkasumatti warra barbaadu ni jiraachisa.
[22] Kana qofaa miti, Abbaan ifii isaa tii nama tokkotti illee firdii hin godhu, firdii hundumaa harka Ilma isaatti kannee ti jira.
[23] Akkasuma hundinuu Abbaaf ulfina akkuma kannanitti, Ilmaafiis ulfina haa kannanii; namni Ilmaaf ulfina hin kannine, Abbaa Ilma ergeefiis ulfina hin kannu.
[24] “Dhugumaan isinitti hima, namni qoowlii tiyya dhagayee isa ana ergetti amanu, jireenya bara baraa ni qaba; inni du'a irraa gara jireenyatti dabree ti jira, yakki niis itti hin muramu.
[25] Dhugumaan isinitti hima, wayti warri du'an sagalee Ilma Rabbii itti dhagayan dhufuuf jirti, ammumaa huu dhuftee ti jirti; warri dhagayaniis ni jiraatu.
[26] Abbaan akkuma ifii burqaa jireenyaa tahetti, akkasumatti Ilmi isaa tiis burqaa jireenyaa akka tahuuf, isaaf kannee ti jira.
[27] Inni Ilma Namaa waan taheef jecha, Abbaan isaa akka inni firdii godhuuf amrii kannee tiif jira.
[28] Kun ajaa'iba isinitti hin tahin; warri du'anii qabritti awwaalaman sagalee isaa waytiin itti dhagayan ni dhufti.
[29] Isaan qabrii keeysaa ni bahu, warri waan gaarii hojjatan jireenya arkachuuf du'aa ni ka'u, warri waan hamaa hojjatan ammoo firditti dhihaachuuf du'aa ni ka'u” jedhe.
[30] Yesuus itti dabalee, “Ani ifii kiyyaan humaa godhuu hin dandayu; Abbaa kiyya irraa akkumaan dhagayu qofattiin farada; firdiin tiyyaas firdii haqaa ti; kuniis akkaan ifii fedhutti odoo hin tahin, akka fedha isa na ergeetti waaniin godhuufi.
[31] Ifii kiyyaaf ragaa kaniin bahu yoon tahe, ragummaan tiyya hin fudhatamtu.
[32] Garuu anaaf kan ragaa bahu kan biraa tokkoo tu jira, ragummaan inni anaaf bahuus amanamaa akka tahe, ani niin beeka.
[33] Isin Yohannis cuuphaatti namoota ergitan; inni dhugaaf ragaa bahee ti jira.
[34] Isin akka najaa baataniifiin kana godha malee, ani ragummaa namaa hin fudhadhu.
[35] Yohannis ibsaa belbelee ifa kanne ture; isin garuu waytumaaf jecha, ifa isaatti gammaduu dha barbaaddan.
[36] Kan Yohannis cuuphaa irra caalaa ragaa anaaf bahu niin qaba; hojichi Abbaan kiyya akkaan raawwadhuuf anatti kanne kanneen aniis dalagaa jiruu tu, Abbaan akka ana erge ragaa anaaf bahu.
[37] Ammaas Abbaan, inni na ergees, ifii fuu anaaf ragaa bahee ti jira; isin sagalee Isaa takkaa hin dhageenye, uunkaa isaa tiis hin agarre.
[38] Isin isa Abbaan ergetti waan hin amanneef jecha, qoowliin isaa isin keeysa hin teeysu.
[39] ‘Barreeyfama Qulqulluu keeysaa jireenya bara baraa ni arkanna’ jettanii ti fardeeyfattanii xiinxaltu; barreeyfamni qulqulluuniis anumaaf ragaa bahu.
[40] Haa tahu malee, isin gara kiyya dhuftanii jireenya arkachuu hin barbaaddan.
[41] “Ani nama biraa, faaruu hin fudhadhu.
[42] Ani ammoo isiniin beeka, qalbii teeysan keeysaa jaalala Rabbii akka hin qabnees niin beeka.
[43] Ani maqaa Abbaa kiyyaa tiiniin dhufe, isin garuu ana hin simattan; kan biraa maquma ifii isaa tiin yoo dhufe, isa ammoo ni simattu.
[44] Isin faaruu wal irraa fuffudhattan malee, faaruu Rabbii tokkicha biraa dhuftu sana arkachuuf yoo ijibbaata hin goone, duuba akkamitti amanuu dandeeysu ree?
[45] Ani Abbaa kiyyaa duratti kaniin isin kasasu, isinitti hin fakkaatin; kan isin kasasu jira, inni niis Musee, isuma isin abdattanii dha.
[46] Museen waa'ee koo barreeysee waan jiruuf jecha, odoo Museetti amantanii, anattiis ammaas ni amantu turtan.
[47] Garuu isin waan Museen barreeysetti warra hin amanne taatanii, akkamitti waaniin ani afaaniin isinitti dubbadhu amantu ree?” jedhe.