[1] Yesuus, “Mukni inabaa inni dhugaa Ana, muka kana kan dhaabee eegu ammoo, Abbaa kiyya.
[2] Damee ana irra jirtu tan firii hin goone, irraa moogola; damee firii godhatu garuu caalatti akka firii godhatuuf jecha, ni geemasha.
[3] Qoowliin ani isinitti dubbadhe irraa kan ka'e, isin amma qulqulleeyfamoo dha.
[4] Ana keeysa jiraadhaa! Aniis isin keeysaan jiraadha; yoo muka inabaa irra jiraatte malee, dameen ifiin firii gootu hin jirtu; akkasuma isiniis, yoo ana keeysatti jiraattan malee, firii godhachuu hin dandeeysan.
[5] Ani soomayyoo inabaa ti, isin ammoo dameelee dha; namni ana keeysa jiraatee, aniis isa keeysa yoon jiraadhe, inni firii hedduu dha godhata; anaan maleetti waa takka illee godhuu hin dandeeysan.
[6] Namni ana keeysa hin jiraanne, akkuma damee darbamtee xooloyxee ti; dameeleen akkanaa walitti qabamanii, ibiddatti darbamanii ti gubamu.
[7] Isin yoo ana keeysa jiraattan, qoowliin tiyyaas isin keeysa yoo jiraatte, waanuma feetan kadhadhaa, isiniifiis ni taha.
[8] Firii hedduu godhattanii, barattoota Kiyya tahuu yoo agarsiiftan, kun Abbaa kiyyaaf ulfina taha.
[9] “Akkuma Abbaan kiyya na jaalatee tiin, aniis isin jaaladhe; jaalala tiyya keeysatti sabadhaa!
[10] Akkumaan ani fedha Abbaa kiyyaa eegee, jaalala isaa keeysatti sabadhetti, isiniis fedha Kiyya yoo eeydan, jaalala tiyya keeysatti ni sabattu.
[11] Gammachuun tiyya isin keeysa jiraattee, gammachuun teeysan guutuu akka taatuuf jechaafiin tana isinitti himee jira.
[12] “Ajajni kiyya isa kana; akkumaan ani isin jaaladhetti, isiniis wal jaaladhaa!
[13] Nama saahibban isaa tiif lubbuu isaa dabarsee kannu irra caalaa, kan jaalala qabu tokko illeen hin jiru.
[14] Waaniin isin ajaje yoo gootan, isin saahibban kiyya.
[15] Gabrichi waan gooftaan isaa hojjatu waan hin beeyneef jecha, asii achi gabroota jedhee isin hin yaamu; waaniin Abbaa kiyya irraa dhagaye hundumaa isin beeysisuu irraa kan ka'e, saahibban koo jedhee tiin isin yaame.
[16] Isinii miti kan ana filate; deemtanii akka firii gootan, firiin teeysaniis tan ayaa qabdu akka taatuuf, kan isin file bar anaa; eegasuu, Abbaan kiyya waanuma isin maqaa kiyyaan kadhattan, isiniif ni kanna.
[17] Kana hundumaa akka isin wal jaalattaniifiin isin ajaja” jedhe.
[18] Yesuus itti dabalee, “Biiyti addunyaa yoo isin jibbite, isin dura akka ana jibbite beekaa!
[19] Warra addunyaa dhaa odoo taatanii, biiyti addunyaa dhaa akka waan kan ifii isiitti isin ni jaalatti turte; amma garuu, isin kan addunyaa waan hin tahiniif, ammaas ani addunyaa keeysaa waaniin isin fileef jecha, biiyti addunyaa dhaa isin jibbite.
[20] Dubbiin ani, ‘Hojjataan, namticha isa hojjachiifatu irra hin caalu’ jedhee isinitti hime sana yaadadhaa! Eegasuu isaan warra ana arihan yoo tahan, isiniis ni arihu; qoowlii tiyya warra eegan yoo tahaniis, teeysaniis ni eegu.
[21] Isa ana erge waan hin beeyneef maqaa kiyyaaf jecha, kana hundumaa isin irratti ni raawwatu.
[22] Ani dhufee silaa isaanitti dubbachuu baadhe, dilii isaanitti hin tahu ture; amma garuu dilii isaanii tiif waan itti sababatan hin qaban.
[23] Namni na jibbu, Abbaa kiyyaas jibbuu isaa ti.
[24] Odoo waan namni biraa tokko illeen hin godhin ani isaan jiddutti godhuu baadhee, dilii isaanitti hin tahu ture; amma garuu hojii tana hundumaa oduma arkanii, anaa fi Abbaa kiyyaas ni jibban.
[25] Kana godhuun isaanii tiis, waan seera isaanii keeysatti, ‘Sababaan maleetti na jibban’ jedhamee kan barreeyfame sun akka raawwatamuufi.
[26] “Jajjabeeysaan, inni Abbaa kiyya keeysaa bahu, Ruuhaan dhugaa kaniin ani isiniif ergu sun, hogguu dhufu, inni anaaf ragaa dha baha.
[27] Isiniis jalqabaa kaaftanii anaa wajjiin waan turtaniif jecha, warra ragaa bahu taatu” jedhe.