[1] Yesuus itti furee, “Dhugumaan isinitti hima, namni goorannoo hoolotaatti balbalaan ol hin seenne, kan karaa biraa tiin seenu, inni hattuu dha, saamtuu dhaasi.
[2] Namni balbala goorannoo hoolotaa tiin ol seenu garuu, inni tiysituu hoolota sanaa ti.
[3] Tiysituu saniif karra-eeyduun hulaa ni bana, hoolonni niis sagalee isaa ni beekan, inni hoolota isaa maqaa isaanii tiin yaamee ti gad isaan baasa.
[4] Hoolota isaa hundumaa eega gad yaase, isaan dura deema; hoolonni sagalee isaa waan beekaniif jecha, isa duukaa dha deemu.
[5] Sagalee warra ambaa waan hin beeyneef, nama ambaa ni baqatu malee, isa duukaa hin deeman” jedhe.
[6] Yesuus dubbii fakkeenyaa tanaan isaanitti hime, isaan garuu wanni inni isaanitti hime tun, maal akka tate hin hubanne.
[7] Yesuus ammaas “Dhugumaan isinitti hima, Aana, balbalti hoolotaa!
[8] Warri na dura dhufanii, karaa biraa tiin seenan hundinuu hattuu dha, saamtuu dhaasi; hoolonni garuu isaan hin dhageenye.
[9] Balbaltichi Ana, eenyu illeen kan anaan ol seenu naja baha; ol ni seena, gadiis ni baha, dheedaas ni arkata.
[10] Hattuun, waan biraa tiif odoo hin tahin, hatuuf, qaluu dhaaf, ammaas balleeysuuf dhufti; ani garuu, isaan jireenya qabaatanii, guutuu irraan dhangala'uus haa qabaataniif jechaan dhufee jira” jedhe.
[11] Yesuus, “Tiysituun gaariin Ana, tiysituun gaariin lubbuu isaa hoolotaaf dabarsee ti kanna.
[12] Tiysituu dhugaa odoo hin tahin, bitamee kan eegu, hoolonni niis kan isaa kan hin tahin, yayyii hoolotatti dhufaa jirtu hogguu arku, hoolota dhiisee ti baqata; yayyiiniis hoolota ni butatti, warra kaaniis ni bittimsiti.
[13] Namtichi sun bitamee waan eeguuf jecha, hoolotaaf hin leeccallaawu.
[14] Tiysituun gaariin Ana; ani hoolota kiyya akkumaan beekutti, hoolonni kiyyaas akkasumatti na beekan,
[15] akkuma kanatti Abbaan ana ni beeka, aniis Abbaa niin beeka; lubbuu tiyyaas dabarsee hoolotaaf niin kanna.
[16] Warra bobbaa kana irraa hin tahin, hoolota biraa tiis niin qaba; isaaniis qaceelchee fiduun ana irra jira, sagalee tiyyaas ni dhagayu; walitti bobbaa tokko ni tahu, tiysituun isaanii tiis tokko taha.
[17] Ani lubbuu tiyya dabarsee kannee, ammaas deebisee waaniin fudhadhuuf jecha, Abbaan kiyya na jaalata.
[18] Nam tokko illeen lubbuu tiyya na irraa hin fuudhu, anumaa tu fedhii tiyyaan kanna malee. Ani lubbuu tiyya dabarsee kannuuf, ammaas deebisee fudhachuufiis amriin qaba; ajaja kanaas Abbaa kiyya irraa hiin fudhadhe” jedhe.
[19] Sababii dubbii kanneen irraa kan ka'e, Yihudoonni ammaas yaadaan garkar hiraman.
[20] Hedduun isaanii, “Sheeyxaanaa tu isa keeysa jira, qalbiin isaa tuqamtee ti jirti. Maaliif isa dhaggeeyfattu?” jedhan.
[21] Warri kaan ammoo, “Namni Sheeyxaana qabu, dubbii akkanaa dubbachuu hin dandayu; Sheeyxaanni ija warra jaamaa banuu ni dandayaa?” jechuu dha turan.
[22] Hogguus Yerusaaleemitti Ayyaanni Seenaa Beeytal Maqdas Eeybisuu, ni ayyaaneeyfama ture; wayti isaa tiis ganna keeysa ture.
[23] Yesuus ammoo Beeytal Maqdas keeysa kutaa “Hulluuqoo Solomoon” jedhamu, keeysa ni deddeema ture.
[24] Hogguus warri Yihudootaa isaan marsanii ti, “Ati hamma yoomitti qalbii teenya nu rarraafta? Masiihicha yoo taate, zaahir baasii nutti himi!” isaan jedhan.
[25] As irratti Yesuus deebisee, “Ani isinitti himee tiin jira, isin ammoo hin amantan, hojiin ani maqaa Abbaa kiyyaa tiin hojjadhu hundinuu anaaf ragaa dha bahu.
[26] Isin garuu hoolota kiyya keeysaa waan hin tahiniif jecha, hin amantan.
[27] Hoolonni kiyya sagalee tiyya ni dhagayu; ani isaan niin beeka, iisaaniis na duukaa dha bu'u
[28] Ani jireenya bara baraa isaaniif niin kanna, isaaniis abadan hin badan, namni tokko illeen harka kiyya keeysaa isaan hin butu.
[29] Abbaan kiyya kan isaan anatti kanne, hundumaa irra guddaa dha; abbaan fedhe illeen harka Abbaa kiyyaa keeysaa isaan butuu hin dandayu.
[30] Anaa fi Abbaan tokkuma” isaaniin jedhe.
[31] As irratti warri Yihudootaa dhagayanii, isa ajjeesuuf ammaas dhagaa guurratan.
[32] Yesuus garuu deebisee, “Hojii gaggaarii Abbaan kiyya anatti kanne hedduu hojjadhee isinitti agarsiisee tiin jiraa; isaan sana keeysaa hojii kamiif jecha dhagaa dhaan ana dhawuu barbaaddu?” isaaniin jedhe.
[33] Yihudoonni ammoo, “Ati Rabbi waan arrabsiteef malee, hojii gaarii waan hojjatteef jecha, dhagaa dhaan si hin dhooynu. Ati namuma taatee odoo jirtuu Rabbi waan if gootuufi” jedhanii ti deebisaniif.
[34] Yesuus ammoo, “‘Ani kunoo, isin waaqayyoota isiniin jedhee tiin jira’ kan jedhu seera keeysan keeysatti barreeyfamee ti jiraa mitii?
[35] Rabbi warra qoowliin isaa itti kannameen ‘Waaqayyoota’ jedhe; wanni Kitaabni jedhuus caphuun irra hin jiru.
[36] Eegasuu ammoo, isa Abbaan addatti baasee gara addunyaatti ergeen, ‘Ani Ilma Rabbii ti’ jechuu isaa tiif, akkamitti ‘Rabbi arrabsita’ jettuuni ree?
[37] Ani hojii Abbaa kiyyaa yoon hojjachuu baadhe, anatti hin amaninaa.
[38] Ani hojii Abbaa kiyyaa kaniin hojjadhu yoon tahe garuu, anatti yoo amanuu baattan illee, hojii tanatti amanaa! Tanaaniis Abbaan ana keeysa, aniis Abbaa keeysa akkaan jiru, sirritti ni hubattu” isaaniin jedhe.
[39] Yihudoonni ammaas isa qabuu dha barbaadan; inni garuu isaan harkaa bahee ti deeme.
[40] Yesuus ammaas Yordaanos gama, bakka Yohannis duraan itti cuuphaa ture dhaqee ti, achi bubbule.
[41] Namoonni hedduuniis gara isaa dhufanii ti, “Yohannis milikkita mu'ujizaa takka illee agarsiisuu illee baatu, garuu waa'ee namticha kanaa tiif wanni inni dubbate hundinuu dhugaa dha ture” jedhan.
[42] Achittiis namoonni hedduun Yesuusitti amanan.