[1] তারফর ফাঁচ লম্বর ফেরেস্তা শিংগা বাজাইল্, আর আঁই উগ্যুয়া তারা দেকিত্ ফাইলাম। তারাউয়্যা আসমানর ত্যুন দুনিয়াত ফইজ্যেল্। য়েই তারাউয়ারে আবিয়া-দোজগর চাবি দেয়া অইল্।
[2] তারাউয়্যা আবিয়া-দোজগ খুলিল্; তহন বিরাট চুলার ত্যুন যেইল্যা ধুঁয়া বাইর অঅ, ঠিগ য়েই ডইল্যা আবিয়া-দোজগর ত্যুন ধুঁয়া বাইর অইতো লাগিল্। আবিয়া-দোজগর ধোঁয়াত সুয্য আর আসমান আঁধার অই গেল্,
[3] ও য়েই ধুঁয়ার মইধ্যর ত্যুন বউত খেরগুয়া ফরিং দুনিয়াত বাইর অই আইল্। য়েই খেরগুয়া ফরিংগিনরে দুনিয়ার কেঁএরা-বিছার মতন হ্যমতা দেয়া অইল্।
[4] য়েগিনরে হোয়া অইল্ যেন্ য়েগিনে দুনিয়ার হনঅ খের বা হোস্যুয়া হনঅ কিছু অথবা হনঅ গাছর হোতি নঅ গরে; হ্যালি যে মানুষঅক্যলর হোয়ালত্ আল্লাহ্র সিলমোঅর নাই য়িতারারই হোতি গরে।
[5] এই মানুষঅক্যলরে মারি ফেলিবার হনঅ হ্যমতা য়িতারারে দেয়া নঅ অইল্ আঁসা, তঅ ফাঁচ মাস ফইয্যন্ত যন্ত্রনা দিবার হ্যমতা য়িতারারে দেয়া অইল্। কেঁএরা-বিছা যহন হনঅ মানুষরে শুম ফুঢাআ তহন যেইল্যা যন্ত্রনা অঅ এই খেরগুয়া ফরিংগিনর দেয়া যন্ত্রনা ঠিগ য়েই ডইল্যাই।
[6] য়েই সমত মাইন্ষ্যে মরনর তালাইশ গরিবো কিন্তু হনঅ মতেই য়িয়ান ফাইতো নঅ; য়িতারা মইত্যো চাইবো কিন্তু মরন য়িতারার হাছর ত্যুন ধাই যাইবো।
[7] য়েই খেরগুয়া ফরিংগিন দেইক্তে যুদ্যর লাই রেডি গরা ঘোড়ার মতন। য়েগিনর মাথাত সোনার তাজর মতন এক ডইল্যা জিনিস আছিল্, আর য়েগিনর মুকর চিয়ারা আছিল্ মানুষর মতন।
[8] য়েগিনর চুল মাইয়্যাঅক্যলর চুলর মতন আর য়েগিনর দাঁত সিংহর দাঁতর মতন।
[9] য়েগিনর বুগত্ লোআর বুক রক্যার ফোশাকর মতন ফোশাক আছিল্। বউত হতাক্যিন ঘোড়া একলগে যুদ্যর ঘোড়াগাড়ি টানি লইয়েনে দুঁরি গেলে যেইল্যা আবাজ অঅ, য়েগিনর ফাগর আবাজ ঠিগ য়েই ডইল্যাই আছিল্।
[10] য়েগিনর লেজ আর শুম কেঁএরা-বিছার লেজ ও শুমর মতন আছিল্। ফাঁচ মাস ফইয্যন্ত মানুষঅক্যলর হোতি গরিবার শক্তি য়েগিনর লেজত্ আছিল্।
[11] আবিয়া-দোজগর ফেরেস্তাই আছিল্ এই খেরগুয়া ফরিংগিনর বাদশা। য়িব্রু ভাষাত য়েই ফেরেস্তার নাম আছিল্ আবদ্যোন আর গিরিক ভাষাত আফল্যুয়োন, মানি তচনচহারি।
[12] ফইল্যা বিফদ শেষ অইল্। চঅ, ইয়ার ফরদি আরো দুয়া বিফদ আইয়্যের্।
[13] তারফর ছঅ লম্বর ফেরেস্তা তেঁইর শিংগা বাজাইল্। আল্লাহ্র সাম্নদি যে সোনার ধুফগাহ্ আছে য়েই ধুফগাহ্র চারগুয়া শিংগর হাছর ত্যুন আঁই একজনরে হতা হইতো উনিলাম। যিবার হাছে শিংগা আছিল্ য়েই ছঅ লম্বর ফেরেস্তারে তেঁই হইল্,
[14] “যে চাইরজন ফেরেস্তা মআ দইজ্যা ফোরাতর মইধ্যে বাঁধা রইয়্যে য়িতারারে ছারি দঅ।”
[15] তহন য়েই চাইরজন ফেরেস্তারে ছারি দেয়া অইল্। এই বছরর এই মাস, এই দিন আর এই ঘন্টার লাই য়েই ফেরেস্তাঅক্যলরে রেডি রাকা অইয়্যেল্ যেন্ য়িতারা তিন ভাগর এক ভাগ মানুষরে মারি ফেলে।
[16] ফরদি আঁই উনিত্ ফাইলাম, ঘোড়াত চরইন্যা সৈন্যর সইংক্যা আছিল্ কুরি কুটি।
[17] দশ্যনত যে ঘোড়াগিন আর য়েগিনর উঅর যারারে আঁই দেকিলাম য়েগিনর চিয়ারা এই ডইল্যা আছিল্ — য়েগিনর বুক রক্যার ফোশাক আছিল্ আগুনর মতন লাল, নিলা ও গন্ধকর মতন অঅলইদ্যা রংগর। ঘোড়াগিনর মাথা আছিল্ সিংহর মাথার মতন আর য়েগিনর মুকর ত্যুন আগুন, ধুঁয়া ও গন্ধক বাইর অইতো আছিল্।
[18] আগুন, ধুঁয়া ও গন্ধক — এই তিন্যুয়া আঘাত দিয়েনে তিন ভাগর এক ভাগ মানুষরে মারি ফেলা অইল্।
[19] য়েই ঘোড়াগিনর মুক ও লেজর মইধ্যেই য়েগিনর শক্তি আছিল্, হারন য়েগিনর লেজগিন আছিল্ আঁফর মতন। য়েই লেজগিনর মাথা দিয়েনে য়েগিনে মানুষর হোতি গইত্যো আছিল্।
[20] কিন্তু এই বেক আঘাতর ফরদিঅ যে মানুষঅক্যলে বাঁচি রইল্ য়িতারা নিজরার আতে বানাইন্যা মুত্যিগিনর ত্যুন মন নঅ ফিরাইল্। য়িতারা ভুতগিনর আর যারা দেকিত্, উনিত্ বা আঁঢিত্ নঅ ফারে এন্ হতাক্যিন সোনা, রুফা, ফিতোল, ফাত্যোর আর গাছ দিয়েনে বানাইন্যা মুত্যির ফুজা গইত্যোই থাকিল্।
[21] এগিন বাদে খুন, জাদুবিদ্যা, জেনা আর চুরি — এগিন বেক্যিনর ত্যুনঅ য়িতারা মন নঅ ফিরাইল্।