[1] ইয়ার ফর আঁই চাইরজন ফেরেস্তারে দুনিয়ার চাইর হোনাত্ থিয়াই থাইক্তো দেকিলাম। য়িতারা দুনিয়ার চাইর হোনার বাতাস আট্কাই রাইক্যেল্, যেন্ দুনিয়া, সমুদ্র বা হনঅ গাছর উঅর বাতাস নঅ বাআ।
[2] ফরদি আঁই আর একজন ফেরেস্তারে ফুক মিক্যাদির ত্যুন উঢি আইস্তো দেকিলাম। তেঁইর হাছে জিন্দা আল্লাহ্র সিলমোঅর আছিল্। যে চাইরজন ফেরেস্তারে দুনিয়া আর সমুদ্রর হোতি গরিবার হ্যমতা দেয়া অইয়্যেল্ য়েই চাইরজন ফেরেস্তারে তেঁই বউত জোরে চিল্যাইয়েনে হইল্,
[3] “আঁরার আল্লাহ্র গোলামঅক্যলর হোয়ালত্ সিলমোঅর নঅ দঅন ফইয্যন্ত দুনিয়া, সমুদ্র বা গাছফালার হোতি নঅ গইজ্যো।”
[4] তারফর আঁই য়েই সিলমোঅর গরা মানুষঅক্যলর সইংক্যা উনিলাম। বনি-ইসরাইলঅক্যলর বেক বংশর মইধ্যর ত্যুন মোট এক লাক চুচল্ল্যিশ আজার মানুষরে সিলমোঅর গরা অইয়্যেল্:
[5] এহুদার বংশর মইধ্যর ত্যুন বারো আজার। রুবেনর বংশর মইধ্যর ত্যুন বারো আজার। গাদর বংশর মইধ্যর ত্যুন বারো আজার।
[6] আশেরর বংশর মইধ্যর ত্যুন বারো আজার। নফ্তালির বংশর মইধ্যর ত্যুন বারো আজার। মানশার বংশর মইধ্যর ত্যুন বারো আজার।
[7] শিমিয়োনর বংশর মইধ্যর ত্যুন বারো আজার। লেবির বংশর মইধ্যর ত্যুন বারো আজার। ইষাখরর বংশর মইধ্যর ত্যুন বারো আজার।
[8] সবুলুনর বংশর মইধ্যর ত্যুন বারো আজার। ইউসুফর বংশর মইধ্য ত্যুন বারো আজার। বিন্ইয়ামিনর বংশর মইধ্যর ত্যুন বারো আজার।
[9] ইয়ার ফরদি আঁই ফত্যি জাতি, বংশ, দেশ আর ভাষার মইধ্যর ত্যুন এত মানুষর ভিড় দেকিলাম দে, য়িতারার সইংক্যা কেউ গনিত্ নঅ ফারিল্। সাদা ফোশাক ফিঁদিয়েনে য়িতারা য়েই সিংহাসন আর ভেরার বাইচ্যার সাম্নদি হ্যাজুর ফাতা আতত লই থিয়াই আছিল্।
[10] য়িতারা জোরে চিল্যাইয়েনে হইতো আছিল্: “যিবা সিংহাসনত্ বোই আছে, আঁরার য়েই আল্লাহ্ আর ভেরার বাইচ্যার আততই গুনাহ্র ত্যুন নাজাত রইয়্যে।”
[11] তারফর ফেরেস্তাঅক্যলে বেক্যিনেই য়েই সিংহাসনর, নেতাঅক্যলর আর চাইরজন ফ্রানির চাইরোফাশদি থিয়াইল্। য়িতারা সিংহাসনর সাম্নদি উইত অইয়েনে আল্লাহ্রে সইদা গরি হইল্,
[12] “আমিন। ফশংসা, গোরব, গেয়ান, শুকরিয়া, সম্যান, হ্যমতা আর শক্তি চিরহাল ধরিয়েনে আঁরার আল্লাহ্রই অঅক। আমিন।”
[13] তহন একজন নেতা আঁরে হইল্, “সাদা ফোশাক ফিঁদা এই মানুষঅক্যল হারা? আর হডের ত্যুনই বা য়িতারা আইস্যে?”
[14] আঁই তেঁইরে হইলাম, “সঅন, য়িয়ান অনেই জানন্।” তেঁই আঁরে হইল্, “য়েই মআহষ্টর মইধ্যর ত্যুন যারা আইস্যে ইতারা তারাই। ইতারা ইতারার ফোশাক ভেরার বাইচ্যার রক্তত্ ধুইয়েনে সাদা গইজ্যে।
[15] য়িয়ানর লাই ইতারা আল্লাহ্র সিংহাসনর সাম্নদি আছে আর বেহেস্তর এবাদত-হ্যানাত্ ইতারা দিন-রাইত তেঁইর এবাদত গরের। যিবা সিংহাসনর উঅরদি বোই আছে তেঁইই ইতারার উঅরদি তেঁইর তাম্বু হ্যাডাইবো।
[16] ইতারার আর ভুগ লাইগ্দো নঅ, তিরাশঅ লাইগ্দো নঅ; সুয্যর তেজ ইতারার গাআত আর লাইগ্দো নঅ, বঅর বেশি গরমঅ লাইগ্দো নঅ,
[17] হারন য়েই ভেরার বাইচ্যা যিবা সিংহাসনর উঅরদি আছে তেঁইই ইতারার ভেরাচরাইন্যা অইবো। জিন্দা ফানির ঝন্যার হাছে তেঁই ইতারারে লই যাইবো, আর আল্লাহ্ ইতারার চোগর ফানি ফুছি দিবো।”