[1] ইয়ার ফরদি আঁই উগ্যুয়া জন্তুরে সমুদ্রর মইধ্যর ত্যুন উঢি আইস্তো দেকিলাম। য়েই জন্তুউয়ার দোশ্যুয়া শিং আর সাত্যুয়া মাথা আছিল্। য়েই শিংগিনর উঅরদি দোশ্যুয়া তাজ আছিল্ আর মাথাগিনর উঅরদি কুফরি গরিবার লাই বিবিন্য নাম লেহ্যা আছিল্।
[2] য়েই জন্তুউয়া দেইক্তে আছিল্ চিতাবাঘর মতন, আর য়িয়ানর ঠেংগিন আছিল্ ভাল্যুকর ঠেংগর মতন ও মুক্যান আছিল্ সিংহর মুকর মতন। য়েই দানব্যুয়া য়িয়ানর শক্তি, সিংহাসন আর বিরাট হ্যমতা য়েই জন্তুউয়ারে দিল্।
[3] জন্তুউয়ার উগ্যুয়া মাথাত এন্ উগ্যুয়া আঘাত আছিল্ যিয়ানর হারনে য়িয়ান মরিবার মতন অইয়্যেল্, কিন্তু য়েই আঘাতগান ভালা অই গেইয়্যেল্। য়িয়ানত দুনিয়ার বেক মানুষ আচ্যাইয্য অইয়েনে য়েই জন্তুউয়ার ফিছদি ফিছদি চলিল্।
[4] দানব্যুয়া য়েই জন্তুউয়ারে হ্যমতা দিয়্যেল্ বুলি মানুষঅক্যলে য়েই দানবরে সইদা গরিল্, আর জন্তুউয়ারেঅ সইদা গরিয়েনে হইল্, “এই জন্তুর মতন হন্ আছে? আর হনেই বা য়িয়ানর লগে যুদ্য গরিত্ ফারে?”
[5] অহংকার আর কুফরি গরিবার লাই য়েই জন্তুউয়ারে হতা হইবার শক্তি দেয়া অইল্। য়েই জন্তুউয়া যেন্ বিয়াল্যিশ মাস ধরিয়েনে য়িয়ানর অধিকার হ্যাডাইত্ ফারে য়িয়ানর লাই য়িয়ানরে অনুমতি দেয়া অইল্।
[6] তহন য়েই জন্তুউয়া আল্লাহ্র আর তেঁইর নামর বিরুদ্যে কুফরি গইত্যো লাগিল্। ইয়ান বাদে, তেঁইর থাকিবার জাগার বিরুদ্যে আর বেহেস্তত্ যারা থাকে য়িতারার বিরুদ্যে বউত অফমানর হতা হইতো লাগিল্।
[7] আল্লাহ্র বান্দাঅক্যলর বিরুদ্যে যুদ্য গরিয়েনে য়িতারারে জয় গরি লইবার হ্যমতা য়িয়ানরে দেয়া অইল্ আর ফত্যি বংশ, দেশ, ভাষা ও জাতির মানুষঅক্যলর উঅরদি য়িয়ানরে অধিকার দেয়া অইল্।
[8] যারা এই দুনিয়ার, মানি যারার নাম ভেরার বাইচ্যার জিবন-কিতাবত্ লেহ্যা নাই য়িতারা বেক্যিনে য়েই জন্তুউয়ারে সইদা গরিবো। এই ভেরার বাইচ্যারে দুনিয়া সিষ্টির আগেই মারি ফেলিবার লাই ঠিগ গরা অইয়্যেল্।
[9] যিবার উনিবার হান আছে, য়িবা ফাক-কিতাবর এই কালাম উনক:
[10] যিবার বন্দি অইবার হতা আছে য়িবা বন্দি অইবো। যিবার তলোয়ারর আঘাতত্ খুন অইবার হতা আছে য়িবা খুন অইবো। ইয়ানর লাই আল্লাহ্র বান্দাঅক্যলর ধৈয্য আর বিশ্যাসর দরহার।
[11] ইয়ার ফরদি আঁই জবিনর ত্যুন আর উগ্যুয়া জন্তুরে উঢি আইস্তো দেকিলাম। ভেরার মতন য়িয়ানর দুয়া শিং আছিল্, কিন্তু য়েই দানবর মতন য়িয়ান হতা হইতো।
[12] এই জন্তুউয়া ফইল্যা জন্তুউয়ার অইয়েনে য়িয়ানর বেক হ্যমতা বেবার গইত্যো লাগিল্; আর যারা এই দুনিয়ার য়িতারারে দিয়েনে য়িয়ান য়েই ফইল্যা জন্তু, মানি যিয়ানর বিরাট আঘাত ভালা অই গেইয়্যেল্ য়িয়ানরে সইদা গরাইল্।
[13] য়িয়ান ডঁর ডঁর কেরামতি হাম গইত্যো লাগিল্, এন্ কি, মানুষঅক্যলর চোগর সাম্নদি আসমানর ত্যুন জবিনত্ আগুন লামাই আনিল্।
[14] য়েই ফইল্যা জন্তুর অইয়েনে যেতাক্যিন কেরামতি হাম গরিবার লাই য়িয়ানরে হ্যমতা দেয়া অইয়্যেল্ য়িয়ান য়েগিন গরিয়েনে মানুষঅক্যলরে ভুল ফথদি লই যাইতো লাগিল্। ফইল্যা যে জন্তুউয়া ছুরির আঘাত ফাইয়েনেঅ বাঁচি আছিল্, দিতিয় জন্তুউয়া মানুষঅক্যলরে হইল্ যেন্ য়িতারা য়িয়ানর উগ্যুয়া মুত্যি বানাআ।
[15] য়েই মুত্যিরে ফরান দিবার শক্তিঅ য়িয়ানরে দেয়া অইল্, যেন্ য়েই মুত্যিগান হতা হইত্ ফারে আর যারা য়েই মুত্যিরে সইদা গইত্যো নঅ য়িতারারে মারি ফেলাইত্ ফারে।
[16] য়িবা ডঁর-ছোড, ফুইসাআলা-গরিব, সাধিন আর গোলাম, বেক্যিনরেই ডাইন আতত্ বা হোয়ালর উঅর উগ্যুয়া চিন্য লইতো বাইধ্য গরিল্।
[17] ফলে য়েই চিন্য বাদে কেউ কিছু কিনিত্ বা বেচিত্ নঅ ফারিল্। য়েই চিন্য অইল্ য়েই জন্তুউয়ার নাম বা য়িয়ানর নামর সইংক্যা।
[18] এগিন বেক্যিন বুঝিবার লাই বুদ্যির দরহার। যিবার বুদ্যি আছে য়িবা য়েই জন্তুউয়ার সইংক্যা গনি চঅক, হারন য়িয়ান উগ্যুয়া মানুষর নামর সইংক্যা। আর য়েই সইংক্যা অইল্ ছঅশ ছষট্যি।