[1] তারফর ভেরার বাইচ্যা যহন সাত লম্বর সিলমোঅর ভাঁগিল্ তহন বেহেস্তত্ অনুমান আধা ঘন্টা ধরিয়েনে হনঅ ডইল্যা আবাজ উনা নঅ গেল্।
[2] যে সাতজন ফেরেস্তা আল্লাহ্র সাম্নদি থিয়াই থাকে আঁই য়িতারারে দেকিত্ ফাইলাম। য়িতারার আতত সাত্যুয়া শিংগা দেয়া অইল্।
[3] ইয়ার ফর আর একজন ফেরেস্তা আইয়েনে হোরবানগাহ্র সাম্নদি থিয়াইল্। তেঁইর আতত্ উগ্যুয়া সোনার ধুফদানি আছিল্। তেঁইরে বউত ফরিমানে ধুফ দেয়া অইল্ যেন্ তেঁই সিংহাসনর সাম্নদির সোনার হোরবানগাহ্র উঅরদি আল্লাহ্র বেক বান্দাঅক্যলর মুনাজাতর লগে য়েই ধুফ হোরবানি গরে।
[4] য়েই ফেরেস্তার আতর ত্যুন ধুফর ধুঁয়া আল্লাহ্র বান্দাঅক্যলর মুনাজাতর লগে উঅরদি আল্লাহ্র সাম্নদি উঢি গেল্।
[5] তহন য়েই ফেরেস্তা হোরবানগাহ্র ত্যুন আগুন নিয়েনে য়েই ধুফদানিগান ভরিল্ আর দুনিয়াত ফেলি দিল্। য়িয়ানত ঠাঢার ফরিবার আবাজ ও অইন্যাইন্য ভয়ংকর আবাজ অইল্, আর বিজ্লি চম্কাইল্ ও ভুসাল অইল্।
[6] যে সাতজন ফেরেস্তার আতত্ সাত্যুয়া শিংগা আছিল্, ইয়ার ফরদি য়িতারা য়েগিন বাজাইবার লাই রেডি অইল্।
[7] ফইল্যা ফেরেস্তা তেঁইর শিংগা বাজাইলে ফর রক্ত মিশাইন্যা শিল ও আগুন দুনিয়াত ফেলা অইল্। য়িয়ানত তিন ভাগর এক ভাগ দুনিয়া, তিন ভাগর এক ভাগ গাছফালা আর বেক হোস্যুয়া খের ফুড়ি গেল্।
[8] ইয়ার ফর দিতিয় ফেরেস্তা তেঁইর শিংগা বাজাইল্। তহন বিরাট জলন্ত ফাআরর মতন উগ্যুয়া জিনিস সমুদ্রত ফেলা অইল্। য়িয়ানত সমুদ্রর তিন ভাগর এক ভাগ ফানি রক্ত অই গেল্,
[9] সমুদ্রর তিন ভাগর এক ভাগ ফ্রানি মরি গেল্, আর তিন ভাগর এক ভাগ জাঁআস তচনচ অই গেল্।
[10] ফরদি তিতিয় ফেরেস্তা তেঁইর শিংগা বাজাইল্। তহন উগ্যুয়া ডঁর তারা বাত্যির মতন জইলতে জইলতে আসমানর ত্যুন ফরিল্।
[11] য়েই তারার নাম আছিল্ সোমরাজ। তিন ভাগর এক ভাগ দইজ্যা আর ঝন্যার উঅরদি তারাউয়্যা ফরিল্। য়িয়ানত তিন ভাগর এক ভাগ ফানি তিতা অই গেল্ আর য়েই তিতা ফানির লাই বউত মানুষ মারা গেল্।
[12] ইয়ার ফরদি চাইর লম্বর ফেরেস্তা তেঁইর শিংগা বাজাইল্। য়িয়ানত সুয্যর তিন ভাগর এক ভাগ, চাঁনর তিন ভাগর এক ভাগ আর তারাগিনর তিন ভাগর এক ভাগ আঁধার অই গেল্। দিনর তিন ভাগর এক ভাগত আর রাইতোর তিন ভাগর এক ভাগত হনঅ ফঅর নঅ রইল্।
[13] ফরদি আঁই উগ্যুয়া ইগল ফাকিরে আসমানত্ বউত উঁচুলত উইত্যো দেকিলাম, আর য়েই ইগল ফাকিউয়ারে জোরে হইতো উনিলাম, “অইন্য যে তিনজন ফেরেস্তা শিংগা বাজাইতো যাআর, য়িতারার শিংগার আবাজ অইলে যারা এই দুনিয়ার য়িতারার বিফদ, বিফদ, বিফদ অইবো।”