[1] ইয়ার ফরদি আঁই একজন ফেরেস্তারে বেহেস্তর ত্যুন লামি আইস্তো দেকিলাম। তেঁইর আতত্ আছিল্ আবিয়া-দোজগর চাবি আর উগ্যুয়া বিরাট সিয়োল।
[2] তেঁই য়েই দানবরে, মানি য়েই ফুরানা আঁফ যিয়ানরে ইবিলিস আর শতান হোয়া অঅ য়িয়ানরে ধরিয়েনে এক আজার বছরর লাই বাঁধিল্ আর আবিয়া-দোজগত্ ফেলি দিল্। ফরদি তেঁই য়িয়ানত তালা দিয়েনে য়িয়ানর উঅর সিলমোঅর গরিল্, যেন্ এই এক আজার বছর শেষ নঅ অঅন ফইয্যন্ত দুনিয়ার জাতিঅক্যলরে আর য়িবা ভুল ফথদি লই যাইত্ নঅ ফারে; তারফরদি কিছু দিনর লাই য়িবারে অবইশ্যই ছারি দেয়া অইবো।
[4] তারফর আঁই হতাক্যিন সিংহাসন দেকিলাম, আর যারা য়েগিনর উঅরদি বোই আছিল্ য়িতারার আতত বিচার গরিবার হ্যমতা দেয়া অইয়্যেল্। আল্লাহ্র কালাম আর ইসার শিক্যা মতন চলিবার হারনে যারার মাথা হাডি ফেলা অইয়্যেল্, আঁই য়িতারার রুহ্গিনরে দেকিত্ ফাইলাম। য়িতারা য়েই জন্তুউয়ারে বা য়িয়ানর মুত্যির ফুজা নঅঅ গরে আর হোয়ালত্ বা আতত্ য়িয়ানর চিন্যঅ গ্রঅন নঅঅ গরে। য়িতারা জিন্দা অই উঢিল্ আর এক আজার বছর ধরিয়েনে মসিহ্র লগে রাজত্য গরিল্।
[5] ইয়ান অইল্ ফইল্যাবার মরনর ত্যুন জিন্দা অই উঢন আর এই বার যারা জিন্দা অইল্ য়িতারা মোবারক ও ফবিত্র। ফইল্যা বার যারা জিন্দা অইয়েনে উইট্যেল্ য়েই মানুষঅক্যলর উঅর দিতিয় মরনর হনঅ শক্তি নাই, বরং য়িতারা আল্লাহ্ ও মসিহ্র ইমাম অইবো আর য়েই আজার বছর মসিহ্র লগে রাজত্য গরিবো। কিন্তু য়েই আজার বছর শেষ নঅ অঅন ফইয্যন্ত বাকি মরা মানুষঅক্যলে জিন্দা নঅ অইল্।
[7] য়েই আজার বছর শেষ অই গেলে ফর ইবিলিসরে য়িয়ানর জেলহ্যানার ত্যুন ছারি দেয়া অইবো।
[8] য়িয়ান তহন যাইয়েনে গোডা দুনিয়ার জাতিঅক্যলরে, মানি ইয়াজুজ-মাজুজরে ভুল ফথদি লই যাইবো আর যুদ্যর লাই য়িতারারে একলগে একত্র গরিবো। ইতারার সইংক্যা অইবো সমুদ্রর বালুহনার মতন অসইংক্য।
[9] তহন আঁই দেকিলাম, য়িতারা আগাই যাইয়েনে আল্লাহ্র বান্দাঅক্যলর থাকিবার এলাহা আর তেঁইর য়েই ফ্রিয় শঅরগান ঘেরাও গরিল্। কিন্তু বেহেস্তর ত্যুন আগুন লামি আইয়েনে য়িতারারে ফোড়াই ফেলিল্।
[10] যিবা য়িতারারে ভুল ফথদি লই গেইয়্যেল্ য়েই ইবিলিসরে জলন্ত গন্ধকর লেকত ফেলি দেয়া অইল্। য়েই জন্তু আর ভন্ড নবিরে আগেই য়েডে ফেলি দেয়া অইয়্যেল্। য়েডে য়িতারা চিরহাল ধরিয়েনে দিন-রাইত যন্ত্রনা ভোগ গরিবো।
[11] তারফর আঁই উগ্যুয়া ডঁর সাদা সিংহাসন আর য়িয়ানর উঅরদি একজনরে বোই থাইক্তো দেকিলাম। তেঁইর সাম্নদির ত্যুন দুনিয়া আর আসমান ধাই গেল্, য়িতারার জাগা আর হনঅ মিক্যাদি নঅ রইল্।
[12] তারফর আঁই দেকিলাম, ডঁর-ছোড বেক মরা মানুষঅক্যলে য়েই সিংহাসনর সাম্নদি থিয়াই আছে। ইয়ার ফর হতাক্যিন কিতাব খোলা অইল্। তারফরদি আর উগ্যুয়া কিতাব খোলা অইল্। য়িয়ান আছিল্ জিবন-কিতাব। এই মরা মানুষঅক্যলর হাম সম্যন্দে য়েই কিতাবগিনত যেইল্যা লেহ্যা অইয়্যেল্ য়েই মতনই য়িতারার বিচার অইল্।
[13] যে মরা মানুষঅক্যলে সমুদ্রর মইধ্যে আছিল্, সমুদ্র য়িতারারে তুলি দিল্। ইয়ান বাদে মরন আর মরা রুহ্গিনর জাগার মইধ্যে যে মরা মানুষঅক্যলে আছিল্, মরন আর মরা রুহ্গিনর জাগা য়িতারারেঅ ফিরাই দিল্। ফত্যিকরে য়িবার হাম অনুযায়ি বিচার গরা অইল্।
[14] ফরদি মরন আর মরা রুহ্গিনর জাগারে আগুনর লেকত ফেলি দেয়া অইল্। এই আগুনর লেকত ফরনই অইল্ দিতিয় মরন।
[15] যারার নাম য়েই জিবন-কিতাবত্ ফাআ নঅ গেল, য়িতারারেঅ আগুনর লেকত ফেলি দেয়া অইল্।