[1] Dawuda denkɛ Solomani, Israɛl bɔnsɔn ka masakɛ ka ntalenw,
[2] walisa mɔgɔ ka hakilitigiya dɔn ani k'a kalan ka hakilitigiya kuma faamu,
[3] ka kalan jɛlen sɔrɔ ka tiɲɛ ko faamu ani tilennenya ni ko sɛbɛmaw,
[4] walisa ka ko dɔnbali lakeguya ka dɔnniya ni ko sɛnsɛni hakili di kamalenw ma.
[5] Hakilitigi ka lamɛnni kɛ ka dɔ fara a ka dɔnniya kan, mɔgɔ hakiliman ka se dabali sɛbɛ la,
[6] walisa ka ntalenw ni kuma kɔrɔmaw faamu ka hakilitigiw ka kumaw ni u ka gundow faamu.
[7] Matigi ɲɛsiran ye dɔnniya daminɛ de ye, nka hakilintanw bɛ hakilitigiya ni kalan lagosi.
[8] Ne denkɛ, i ka i fa ka kalan lamɛn, i kana ban i ba ka laadili ma,
[9] k'a masɔrɔ u na kɛ nɔɔrɔ masafugula ye i kun na ka kɛ kan na masiri ye i kan na.
[10] Ne denkɛ, ni jurumukɛlaw bɛ i nɛgɛn, i kana sɔn.
[11] Ni u ko i ka taa u fɛ, ko aw ka aw merun mɔgɔ ɲɛ k'a faga, ka jan da mɔgɔ jalakibali ɲɛ k'a minɛ,
[12] ka u ɲɛnama kunun ka u ban i ko lahara taabaw, ka u kunun i ko mɔgɔ salenw bɛ don kaburu kɔnɔ cogo min na,
[13] ko aw na nafolo sɔngɔ gɛlɛn sifa bɛɛ sɔrɔ ka aw ka sow fa ni fɛn cɛlenw ye,
[14] ni u ko i ka don u ka jɛ la, ko aw na jɛ wari bilalan kelen na,
[15] ayiwa ne denkɛ, i kana taama u fɛ, i ka i sen fɛngɛ u ka siraw ma,
[16] k'a masɔrɔ u senw bɛ boli ka taa ko jugu nɔ fɛ, u ka tɛli mɔgɔ faga fɛ.
[17] Ni jan dara kɔnɔ ɲɛ a yɛrɛ ɲɛ na, o jan dara fuu.
[18] O mɔgɔw bɛ merun min ɲɛ k'a faga, u yɛrɛw don, u bɛ u dogo u yɛrɛw ni kama.
[19] Binkanni fɛn nege bɛ mɔgɔ minw na, olu ka siraw bɛ ten, binkanni fɛn na u yɛrɛw faga.
[20] Hakilitigiya bɛ pɛrɛn dugu bɔlɔnw na, a bɛ a kan bɔ fɛrɛkɛnɛw la.
[21] A bɛ pɛrɛn jamaba lajɛ yɔrɔw la, a mankan bɛ mɛn dugu dondaw la, a ko:
[22] «Hakilintanw, hakilintanya ko na diya aw ye fo tuma jumɛn? Nparabɔlaw, nparabɔli ko na diya aw ye fo tuma jumɛn? Hakilintanw, aw na to ka ban dɔnniya ma fo tuma jumɛn?
[23] A' ye kɔsegin ka ne ka laadili lamɛn, ne na ne ni jigin aw kan ka caya, ne na aw kalan ne ka kumaw la,
[24] sabu ne pɛrɛnna ka aw wele, aw ma sɔn ka ne lamɛn. Ne ye ne bolo mɔɔnɔbɔ aw ye, mɔgɔ si ma sɔn ka o jate.
[25] Nka aw banna ne ka laadili bɛɛ ma, aw t'a fɛ ka ne ka kalan lamɛn.
[26] O de kosɔn ne fana na aw yɛlɛ aw ka bɔnɛba don na. Ni siran koba ye aw minɛ tuma min na,
[27] ni siran kobaw ye aw sɔrɔ i ko fiɲɛba, ni bɔnɛ sera aw ma i ko ji woyoba, ni sɛgɛn ni degunba cunna aw kan tuma min na, ne na yɛlɛ bɔ aw la o tuma la.
[28] O tuma la u na kasi ne nɔ fɛ, nka ne tɛna u jaabi. U na ne ɲini yɔrɔ bɛɛ, nka u tɛna ne ye,
[29] k'a masɔrɔ u banna dɔnniya ma, u ma Matigi ɲɛsiran ɲɛnatɔmɔ.
[30] U mago tun tɛ ne ka laadili la, u ye ne ka laadili mafiɲɛya.
[31] O de kosɔn u na u yɛrɛw ka yɛrɛ sago kɛ tɔnɔ sɔrɔ, u na fa u yɛrɛw ka laadiliw la.
[32] Ko dɔnbaliw ka filibanciya na u faga, hakilintanw ka ɲɛmajɔbaliya na u halaki,
[33] nka mɔgɔ min bɛ ne lamɛn, o na sigi hɛrɛ la, a lakanalen na sigi, a tɛna siran ko jugu si ɲɛ.»