[1] I kana i yɛrɛ bonya sini ko la, k'a masɔrɔ ko min bɛ kɛ sini, i tɛ o dɔn.
[2] Mɔgɔ wɛrɛ ka i tanu, i yɛrɛ da kana i tanu, dunan k'a fɔ, i yɛrɛ da kan'a fɔ.
[3] Kabakurun ka girin, cɛncɛn fana ka girin, nka hakilintan ka dimiya ka girin ka tɛmɛn o bɛɛ kan.
[4] Dimiya ka farin, a tɛ hinɛ, dusubɔ bɛ i ko kɔ karilen woyo, nka jɔni bɛ se ka keleya kunbɛn?
[5] Kɛnɛkan kɔrɔfɔli ka fisa ni kanuya dogolen ye.
[6] I teri ye joginda minw kɛ i la, o bɛ a ka kanuya jira, nka i jugu ka da susuli ye janfali ye.
[7] Mɔgɔ min falen don, o bɛ dinɔɔnɔ cɔngɔ a sen kɔrɔ, nka kɔngɔ bɛ min na, hali fɛn kunaman bɛɛ ka timi o da la.
[8] Mɔgɔ min bɛ a fa so bila ka taa yɔrɔ jan, o bɛ i ko kɔnɔ min bɛ a ɲaa to yen ka yaalayaala.
[9] Tulu suma duman ni latikɔlɔn bɛ mɔgɔ nisɔndiya cogo min na, mɔgɔ teri ka laadili ɲuman min bɛ bɔ a dusukun na, o bɛ mɔgɔ nisɔndiya ten.
[10] I kana i teri ni i fa teri janfa, i kana taa i balima ka so i degun don na fana. I sigiɲɔgɔn min yɔrɔ ka surun i la, o ka fisa ni i baden min yɔrɔ ka jan i la ye.
[11] Ne denkɛ, i ka hakili sɔrɔ ka ne dusu nisɔndiya, ni o kɛra, ne na se ka ne tɔgɔ jugu fɔbaa jaabi.
[12] Mɔgɔ hakiliman bɛ tɔɔrɔ natɔ ye k'a yɛrɛ dogo, nka ko dɔnbali bɛ taa ɲɛ ka tɔɔrɔ sɔrɔ.
[13] Ni mɔgɔ dɔ kɛra dunan ka juru seere ye, i ka a ka dulɔkiba minɛ o kun kɔrɔ, i ka a yɛrɛ minɛ tɔnɔmada la, sabu a sɔnna ka kɛ dunan ka juru seere ye.
[14] Mɔgɔ min bɛ soli ka duba ta a teri ye ni kanba ye, o bɛ jate a dangali ye.
[15] Sanji bɛ to ka toni sanba nalen kɔ cogo min na, muso dala ko caman fana bɛ ten.
[16] Mɔgɔ min bɛ se ka o muso bali, o bɛ se ka fiɲɛ bali, ka tulu minɛ a tɛgɛ kɔnɔ.
[17] Nɛgɛ bɛ nɛgɛ da diya cogo min na, mɔgɔ bɛ a mɔgɔɲɔgɔn kalan ten.
[18] Mɔgɔ min bɛ torosun kɔlɔsi, o na a mɔ dun, mɔgɔ min bɛ a karamɔgɔ bonya, o fana na bonya sɔrɔ.
[19] Mɔgɔ bɛ a yɛrɛ ɲɛda ye ji la cogo min na. o cogo la, i bɛ min ye mɔgɔ wɛrɛ dusukun na, o bɛ i yɛrɛ ta la.
[20] Lahara dugu ni dingɛ dunba tɛ wasa cogo min na, Hadamaden ɲɛ tɛ wasa filɛli la ten.
[21] Warijɛ bɛ yeele dagani kɔnɔ, sanu bɛ yeele faa kɔnɔ ka u kɔrɔbɔ cogo min na, Hadamaden cogo bɛ kɔrɔbɔ a tanuli fɛ ten.
[22] Hali ni i bɛ hakilintan ni ɲɔ susu ɲɔgɔn fɛ kolon kɔnɔ ni kolon kala ye, a ka hakilintanya tɛ bɔ a la.
[23] I ka i ka sagaw kɔlɔsi kosɛbɛ ka u cogo dɔn, ka i janto i ka bagankuluw la,
[24] sabu nafolotigiya tɛ mɛn. Bɔnsɔn nataw bɛɛ bɛ masafugula sɔrɔ wa?
[25] Ni bin jalen kanna, bin nugu bɛ bɔ, kulu kan bin bɛ mara.
[26] Sagadenw bɛ bila i fɛɛrɛbɔ kama, bakɔrɔw ye foro san sɔngɔ ye.
[27] Ba nɔnɔ bɛ i ni i ka so mɔgɔw balo, ka i ka baarakɛ musow mago ɲɛ.