[1] Jakɛ denkɛ Agur ka kuma. A ye o ntalen da Itiɛl ni Ukal ye.
[2] Ne ye mɔgɔ bɛɛ la hakilintan de ye, siga tɛ o la, ne tɛ mɔgɔ hakilitigi ye.
[3] Ne ma hakilitigiya sɔrɔ, ne ma Ala senuma ka hakilitigiya dɔn.
[4] Jɔn yɛlɛnna sankolo la ka jigin? Jɔn ye fiɲɛ cɛ a tɛgɛ fila kɔnɔ? Jɔn ye jiw siri a ka dulɔki la? Jɔn ye dugukolo danw sigi? O tɔgɔ ko di? O denkɛ tɔgɔ ko di? Ni i b'a dɔn, i k'a fɔ.
[5] Ala ka kumaw bɛɛ jɛlen don, mɔgɔ minw bɛ Ala ɲini k'a kɛ u dogo yɔrɔ ye, a ye olu ka nɛgɛ bɛnnan de ye.
[6] I kana foyi fara a ka kuma kan, ni i ye o kɛ, a na i kɔrɔfɔ, i na sɔrɔ nkalontigɛla ye.
[7] Ne ye fɛn fila deli i fɛ, i kana ban ka olu di ne ma sani ne ka sa.
[8] I ka nanbara ni nkalon kumaw mabɔ ne la. I kana faantanya ni fɛntigiya si lase ne ma. Dumuni min bɛ ne bɔ, i ka o di ne ma,
[9] walisa ne kana ne dalacɛ i la fɛntigiya kosɔn, k'a fɔ ko: «Matigi ye jɔn ye?» Wala ne kana na sonyali kɛ faantanya kosɔn ka ne ka Ala tɔgɔ tiɲɛn.
[10] I kana baaraden tɔgɔ tiɲɛn a kuntigi ɲɛ na, walisa a kana i danga, i kana na jalaki.
[11] Siya dɔ bɛ yen min bɛ u fa danga, u tɛ u ba bonya fewu.
[12] Siya dɔ jɛlen don u yɛrɛ ɲɛ na, nka u ma ko ka jɛ.
[13] Siya dɔ bɛ yen, malobali ɲɛ bɛ u bɛɛ kun, u ɲɛwolow kɔrɔtalen bɛ.
[14] Siya dɔ bɛ yen, u ɲinw bɛ i ko npanw da duman, u ntagaɲinw bɛ i ko muru. U bɛ dugukolo kan ɲɛnibaatɔw dun ka olu ban, u bɛ kɔlibaatɔw dun ka olu ban Hadamadenw cɛma.
[15] Denmuso fila bɛ jila ntorimana fɛ, olu b'a fɔ ko: «A di ne ma, a di ne ma.» Fɛn saba bɛ yen minw tɛ wasa abada, fɛn naani yɛrɛ don minw t'a fɔ ko: «O n'a bɔ sa,»
[16] lahara dugu ni muso kɔna kɔnɔbara, ni dugukolo min tɛ fa ji la, ani tasuma min t'a fɔ ko: «O n'a bɔ sa.»
[17] Mɔgɔ min bɛ a fa dɔgɔya, min tɛ a ba kan minɛ, kɔ dala nkankan kɔnɔw na o ɲɛ bɔ, dugaw na a sogo dun.
[18] Kabako fɛn saba bɛ yen, ne tɛ minw faamu, fɛn naani yɛrɛ don ne tɛ u cogo dɔn,
[19] bɔn pan cogo sankolo la, sa fofo cogo farakolo kan, jikan kurun taa cogo kɔgɔji kan, ani cɛ ɲɛbɔ cogo npogotigi fɛ.
[20] Jatɔmuso cogo filɛ nin ye, a bɛ dumuni kɛ ka a da cɛ, o kɔ, a b'a fɔ ko: «Ne ma ko jugu si kɛ.»
[21] Fɛn saba bɛ dugukolo yɛrɛyɛrɛ, fɛn naani yɛrɛ don, a tɛ se u kɔrɔ,
[22] ni jɔnkɛ kɛra masakɛ ye, ni hakilintan fara dumuni la,
[23] ni muso sɔnkolon furula, ni jɔnmuso ye a mamuso ciyɛn ta.
[24] Fɛn ɲɛnama naani bɛ dugukolo kan, u ka misɛn, o bɛɛ n'a ta u hakili ka bon, u bɛ ko dɔn.
[25] Mɛnɛmɛnɛnin ye siya barikantan ye, nka u bɛ u ka balo ɲini suman tigɛ tuma la.
[26] Kulubaniw ye dantanfɛn barikantanw ye, nka u ka sow bɛ faraw cɛma.
[27] Masakɛ tɛ ntɔnw kun na, o bɛɛ n'a ta u bɛ taa kulu ni kulu.
[28] Mɔgɔ bɛ basa minɛ ni a bolo ye, o bɛɛ n'a ta a bɛ sɔrɔ masakɛ ka masaya sow kɔnɔ.
[29] Fɛn saba bɛ yen minw taama cogo ka ɲi, fɛn naani yɛrɛ don minw taa cogo ka ɲi,
[30] waraba min barika ka bon ni wara tɔw bɛɛ ta ye, a tɛ sira bila u si ɲɛ,
[31] ani yɛlɛnkan so min labɛnnen bɛ kɛlɛ kama ani bakɔrɔ, ani mɔgɔ si tɛ se ka masakɛ min bali.
[32] Ni i ye hakilintanya kɛ ka i yɛrɛ bonya, wala ni i ye miirili juguw kɛ, i ka i bolo da i da la,
[33] k'a masɔrɔ ni i ye nɔnɔ gosi, o bɛ nare bɔ, ni i ye nunkala mɔsi, o bɛ joli bɔ, o cogo la, ni i ye dimiya dabɔ, o bɛ kɛlɛ lawuli.