[1] Mɔgɔ min bɛ ban laadili caman ma ka a kunkolo gɛlɛya, o tigi na halaki yɔrɔ nin kelen, fura tɛ o la.
[2] Ni mɔgɔ tilennenw cayara, mɔgɔw bɛ ɲagali, nka ni mɔgɔ jugu bɛ mɔgɔw kun na, u bɛ nwunan.
[3] Hakilitigiya ko ka di mɔgɔ min ye, o bɛ a fa nisɔndiya, nka mɔgɔ min ni jatɔmusow bɛ jɛ, o ka nafolo bɛ ban.
[4] Masakɛ bɛ jamana sabati tilennenya barika la, nka surɔ fɛn ko ka di mɔgɔ min ye, o na jamana tiɲɛn.
[5] Mɔgɔ min bɛ kuma nugulen fɔ a sigiɲɔgɔn ye, o bɛ minɛli jan da a sen ɲɛ.
[6] Mɔgɔ jugu bɛ minɛ tilenbaliya jan na, nka mɔgɔ tilennen bɛ se sɔrɔ ka ɲagalikan bɔ.
[7] Mɔgɔ tilennen bɛ i janto faantanw na, nka o ɲɔgɔn hinɛ tɛ mɔgɔ jugu la.
[8] Nparabɔlaw bɛ balawu lawuli dugu kɔnɔ, nka hakilitigiw bɛ dimiya mada.
[9] Ni hakilitigi dɔ ni hakilintan dɔ kɛra sɔsɔli kɛ ɲɔgɔn ye, hakilintan bɛ dimin wala ka yɛlɛ bɔ a la, a tɛ lafiya sɔrɔ.
[10] Mɔgɔ fagalaw bɛ mɔgɔ sɛbɛ koniya, nka mɔgɔ tilennenw bɛ u janto mɔgɔ sɛbɛ ni la.
[11] Hakilintan bɛ a ka dimiya jɛnsɛn kɛnɛma, nka hakilitigi bɛ sabali ka dimiya cɔngɔ a sen kɔrɔ.
[12] Ni kuntigi b'a tulo majɔ nkalontigɛla ka kuma la, a ka baarakɛlaw bɛɛ na kɛ mɔgɔ juguw ye.
[13] Faantan ni a tɔɔrɔbaa bɛɛ ka kan, Matigi bɛ kɛnɛyeelen bɔ u fila bɛɛ ye.
[14] Masakɛ min bɛ kiri tigɛ faantan kan ni tiɲɛ ye, o ka masasigilan na sabati badaa.
[15] Kololi bere ni kɔrɔfɔli bɛ hakilitigiya di, nka denmisɛn bilalen a yɛrɛma, o bɛ a ba maloya.
[16] Ni mɔgɔ jugu cayara, jurumu fana bɛ caya, nka mɔgɔ tilennenw na u bitɔ ye.
[17] I ka i den kolo, ni o kɛra, a na i dusu suma, a ko na i nisɔndiya haali.
[18] Ni jirali tɛ, foyi tɛ mɔgɔ bali ko jugu kɛli la, nka min bɛ sariya mara, o ye dubaden ye.
[19] Jɔnkɛ tɛ kolo ni kuma ye, hali ni a b'a faamu, a tɛ kan minɛli kɛ.
[20] Yala i ye mɔgɔ dɔ ye min da ka fiɲɛ wa? Hakilintan ka ko bɛ se ka ɲɛ ka tɛmɛn o tigi ta kan.
[21] Ni i ye i ka jɔnkɛ ladon ni a sagona fɛnw bɛɛ ye kabini a denmisɛnma, a laban na, a n'a fɔ ko i den don.
[22] Mɔgɔ dusu bɔlen bɛ kɛlɛ lawuli, mɔgɔ farinma bɛ tilenbaliya kow kɛ.
[23] Mɔgɔ ka kuncɛbaya bɛ a majigin, nka dusukun majiginlen na bonya sɔrɔ.
[24] Soɲalikɛla jɛɲɔgɔn bɛ a yɛrɛ ni koniya, a bɛ dangali kuma mɛn, nka a tɛ foyi fɔ.
[25] Mɔgɔ ɲɛsiran bɛ bili jan da mɔgɔ ɲɛ, nka min bɛ i jigi da Matigi kan, o lakanalen na to.
[26] Mɔgɔ caman bɛ kuntigi ka ɲumaya ɲini u yɛrɛw ye, nka Matigi de na kiri tigɛ mɔgɔw bɛɛ kan.
[27] Mɔgɔ tilenbali haramulen bɛ mɔgɔ tilennenw fɛ, tilennenya sira taamabaa haramulen bɛ mɔgɔ juguw fɛ.