[1] Ne denkɛ, i ka ne ka kuma lamɛn, ka ne ka ci fɔlenw mara.
[2] I ka i tulo majɔ hakilitigiya la, ka i dusukun sin faamuli ma.
[3] I ka hakilitigiya deli, a ka i dɛmɛ, ka i kan lase faamuli ma, ko a ka i dɛmɛ.
[4] I ka a ɲini i ko warijɛ, ka a ɲini ko ɲuman i ko nafolo dogolen.
[5] Ni i ye o kɛ, i na Matigi ɲɛsiran faamu, ka Ala dɔnniya sɔrɔ.
[6] K'a masɔrɔ Matigi bɛ hakilitigiya di, dɔnniya ni faamuli bɛ bɔ a da la.
[7] A bɛ kisili mara mɔgɔ tilennenw ye, mɔgɔ minw bɛ jɛlenya sira taama, a ye olu ka nɛgɛ bɛnnan de ye.
[8] A bɛ tilennenya siraw mara, ka a ka kanulenw ka siraw kɔlɔsi.
[9] O tuma la i na tilennenya ni ko sɛbɛw faamu, ani tiɲɛ kow ni sira minw bɛɛ bɛ hɛrɛ di mɔgɔ ma.
[10] Ayiwa hakilitigiya na don i dusukun na, dɔnniya ko na diya i ni ye.
[11] Ko sɛnsɛni hakili na i kɔlɔsi, faamuli na i mara.
[12] A na i kisi kɛɲɛkɛya ma ka i tila nanbara kuma fɔbaaw la.
[13] U bɛ tilennenya siraw bila, ka dibi siraw taama.
[14] Ko jugu kɛli ka di u ye, u bɛ ɲagali dabali jugu la.
[15] U bɛ taa mɔgɔ lafili sira fɛ, ka sira tilenbali taama.
[16] A na i kisi jatɔmuso ma ani dunanmuso ka kuma nugulenw ma.
[17] O muso ye a denmisɛn cɛ janfa ka ɲinɛ a ka Ala ka layidu kɔ.
[18] A ka so bɛ saya sira da la, a ka sira bɛ taa bila suw cɛma.
[19] Minw bɛ taa yen, olu si tɛ kɔsegin tun, u si tɛna ɲɛnamaya sira ye tun.
[20] O cogo la, i ka taama mɔgɔ tilennenw ka siraw fɛ, i ka to tilennenya sira kan,
[21] k'a masɔrɔ mɔgɔ tilennenw na sigi jamana kɔnɔ, mɔgɔ jɛlenw na to yen.
[22] Nka mɔgɔ juguw na ban ka bɔ jamana kɔnɔ, mɔgɔ tilenbaliw dili na sama ka bɔ yen.