[1] Juda bɔnsɔn ka masakɛ Ezekiasi fɛ cɛw ye Solomani ka ntalen minw sɔrɔ ka u sɛbɛn, olu filɛ.
[2] Ka kow dogo ye Ala nɔɔrɔ ye, nka ka kow sɛgɛsɛgɛ, o ye masakɛw nɔɔrɔ ye.
[3] Sankolow janya ni dugukolo dunya tɛ se ka sɛgɛsɛgɛ cogo min na, o cogo la masakɛw dusukun fana tɛ se ka sɛgɛsɛgɛ.
[4] Ni warijɛbo bɔra a la, a na kɛ minan ye sanu faga numu fɛ.
[5] Ni mɔgɔ jugu gɛnna ka bɔ masakɛ ɲɛ kɔrɔ, a ka masasigilan na sabati tilennenya fɛ.
[6] I kana i yɛrɛ bonya masakɛ ɲɛ kɔrɔ, i kana i jɔ mɔgɔbaw jɔ yɔrɔ la.
[7] A k'a fɔ i ye, na ɲɛ fɛ yan, o ka fisa ni i bilali ye kɔ fɛ faama ɲɛ kɔrɔ, i yɛrɛ ɲɛ na.
[8] I kana tɛliya ka taa kiri la, k'a masɔrɔ i tɛ a laban dɔn, a dɔrɔ i sigiɲɔgɔn bɛ se ka i lamalo kɔ fɛ.
[9] I ka i yɛrɛ lafasa i mɔgɔɲɔgɔn ɲɛ na, nka i kana mɔgɔ wɛrɛ ka gundo bɔ kɛnɛkan,
[10] walisa a mɛnbaaw kana na i mangoya, ani i tɔgɔ jugu kana to ka fɔ.
[11] Kuma bɛnnen min fɔra a waati la, o bɛ i ko jiriden bisigi min dilara ni sanu ye k'a bila warijɛ minan kɔnɔ.
[12] Sanu tulola nɛgɛ ani sanu masiri fɛn bɛ cogo min na, hakilitigi ka laadili bɛ ten a lamɛnbaa tulo la.
[13] Ciden sɛbɛ bɛ a cibaa bolo i ko ji sumalen funteni tuma la, a bɛ a kuntigi dusu suma.
[14] Mɔgɔ min bɛ a yɛrɛ bonya ko a tɛgɛ labilalen don, k'a sɔrɔ a tɛ o kɛ, o bɛ i ko sanfin ni sanfiɲɛ jintan.
[15] Muɲuli bɛ se sɔrɔ faama kan, kuma duman bɛ kolow kari.
[16] Ni i ye di sɔrɔ, i ka i fata dama dun a la, walisa i kana a fɔɔnɔ.
[17] I kana to ka don i sigiɲɔgɔn ka so kɔnɔ tuma bɛɛ, walisa a kana sɛgɛn i kɔrɔ ka i koniya.
[18] Mɔgɔ min bɛ nkalon seereya kɛ a sigiɲɔgɔn kama, o tigi bɛ i ko berekuru ni npan ani biɲɛ nun bɔlen.
[19] Ka i bolo kuru nanbara mɔgɔ la tɔɔrɔ tuma la, o bɛ i ko ɲin karilen ani sen mugulen.
[20] Mɔgɔ min bɛ dɔnkili da mɔgɔ dusu kasilen ɲɛ na, o bɛ i ko mɔgɔ min bɛ dulɔki bɔ a kan na fonɛnɛ tuma la, o bɛ i ko lemuru kumu ji kɛlen sɛgɛji la.
[21] Ni kɔngɔ bɛ i jugu la, i ka dumuni di a ma, ni minnɔgɔ b'a la, i ka ji di a ma,
[22] ni i ye o kɛ, i na takami ton a kun na, Matigi na i baraji.
[23] Kɔrɔnfɛ fiɲɛ bɛ na ni sanji ye cogo min na, kuma jugu bɛ mɔgɔ ɲɛnasisi ten.
[24] Ka sigi so kunna dogodogonin la, o ka fisa ni i sigili ye muso dala ko caman fɛ soba kɔnɔ.
[25] Kibaru duman min nana ka bɔ yɔrɔ jan na, o bɛ i ko ji sumalen dilen minnɔgɔtɔ ma.
[26] Mɔgɔ tilennen min bɛ yɛlɛma mɔgɔ juguw ɲɛ, o bɛ i ko ji duurulen ni kɔlɔnji kasa bɔlen.
[27] Di caman dunni man ɲi, tanuli caman fana man ɲi.
[28] Mɔgɔ min tɛ a yɛrɛ minɛ, o bɛ i ko kɛlɛ kunbɛn kogo tɛ dugu min na.