[1] To tɔ nantan ni lafiya, o ka fisa ni so fa dumuniba kɛlɛma ye.
[2] Denkɛ min bɛ maloya ko kɛ, jɔnkɛ hakiliman na sigi o kun na, a na kɛ balimaw ciyɛn ta ɲɔgɔn ye.
[3] Warijɛ ni sanu bɛ yeele dagani fan tasumama la ka u kɔrɔbɔ, nka min bɛ dusukun sɛgɛsɛgɛ, o ye Matigi de ye.
[4] Mɔgɔ jugu bɛ da jugu ka kuma lamɛn, nkalontigɛla bɛ nɛnkun nanbarama lamɛn.
[5] Mɔgɔ min bɛ yɛlɛ faantan na, o bɛ a Dabaa mafiɲɛya, min bɛ ɲagali mɔgɔ tɔɔrɔlen na, o tigi tɛna to a sara sɔrɔbali ye.
[6] Mɔdenw ye cɛkɔrɔbaw ka masafugula ye, faw ye u denw nɔɔrɔ de ye.
[7] Kuma sɛbɛ tɛ bɛn hakilintan ma, o cogo la nkalon kumaw fana tɛ bɛn faama ma.
[8] Nili fɛn bɛ i ko kabakurun sɔngɔ gɛlɛn a dibaa ɲɛ na, a bɛ taa yɔrɔ o yɔrɔ, a bɛ se sɔrɔ.
[9] Mɔgɔ min bɛ hakɛ datugu, o bɛ kanuya ɲini, nka naafigi bɛ teri sɛbɛw bila ɲɔgɔn na.
[10] Kɔrɔfɔli bɛ hakilitigi dusu minɛ ka tɛmɛn gwɛɲɛ ɲɛ kɛmɛ kan hakilintan na.
[11] Mɔgɔ jugu tɛ foyi ɲini murutili kɔ, nka ciden farinma na ci a nɔ fɛ.
[12] Ursi waramuso bɔnɛlen a denw la, o ni mɔgɔ kunbɛnni ka fisa ni hakilintan ni a ka hakilintanya ni mɔgɔ kunbɛnni ye.
[13] Mɔgɔ min bɛ ko ɲuman sara ni ko jugu ye, bɔnɛ tɛna bɔ o tigi ka so.
[14] Kɛlɛ daminɛtɔ bɛ i ko so ji dontɔ, o de kosɔn, i ka sɔsɔli dabila sani a ka kɛ wɔyɔ ye.
[15] Mɔgɔ min bɛ jo di mɔgɔ jugu ma ani min bɛ mɔgɔ tilennen jalaki, olu fila bɛɛ haramulen bɛ Matigi fɛ.
[16] Ka hakilitigiya san sɔngɔ di hakilintan ma, a bɛ mun ɲɛ, k'a sɔrɔ hakili tɛ a fɛ?
[17] Teri sɛbɛ bɛ mɔgɔ kanu tuma bɛɛ, a bɛ kɛ i balimakɛ ye tɔɔrɔ waati la.
[18] Mɔgɔ min bɛ kɛ a tɔɲɔgɔn ka juru seere ye, o tigi ye hakilintan de ye.
[19] Kɛlɛ ka di mɔgɔ min ye, jurumu ko ka di o tigi ye. Mɔgɔ min bɛ a ka so da janya, o tigi bɛ halakili ɲini.
[20] Dusukun tilenbali tɛ hɛrɛ si sɔrɔ, bɔnɛ na nɛnkun nanbarama sɔrɔ.
[21] Mɔgɔ min bɛ hakilintan bange, o na tɔɔrɔ sɔrɔ, hakilintan fa tɛ ɲagali fewu.
[22] Dusukun ɲagalilen ye fura ɲuman ye, nka dusu kasi bɛ mɔgɔ kolow sa.
[23] Mɔgɔ jugu bɛ surɔ fɛn minɛ dogo la, walisa ka kiri kow tiɲɛn.
[24] Hakilitigiya bɛ taa mɔgɔ hakiliman ɲɛ fɛ, nka hakilintan bɛ a ɲɛ yaala ka se fo dugukolo dan na.
[25] Denkɛ hakilintan bɛ a fa ɲɛnasisi, a bɛ a ba dusu kasi.
[26] Ka mɔgɔ tilennen ɲangi, o man ɲi, ka mɔgɔ sɛbɛ gosi a ka tilennenya kosɔn, o fana dagalen tɛ.
[27] Mɔgɔ min bɛ a ka kuma fɔta kɔlɔsi, o ye ko dɔnna ye, mɔgɔ min sabalilen don, o ye hakilitigi ye.
[28] Hali hakilintan, ni a tɛ kuma, o bɛ jate hakilitigi ye. Mɔgɔ min bɛ a da tugu, o ye hakilitigi ye.