[1] Ne denkɛ, i ka ne ka hakilitigiya kumaw lamɛn, ka i tulo majɔ ne ka faamuli la,
[2] walisa u ka kɛ hakilitigiya kalan ye, ka dɔnniya to i da la.
[3] K'a masɔrɔ dunanmuso dawolo bɛ di toni, a ngɔnɔ ka nugu ni tulu ye,
[4] nka a laban ka kuna i ko jalaji, a bɛ i ko tɛlɛ da duman.
[5] A sen bɛ jigin ka taa saya yɔrɔ la, a sentali bɛ se lahara dugu da la.
[6] A tɛ miiri ɲɛnamaya sira ko la, a ka sira bɛ tunun, a tɛ a taa yɔrɔ dɔn.
[7] Ayiwa ne denkɛw, a' ye ne lamɛn sisan, aw kana ne dala kuma bila.
[8] I ka i sen mabɔ dunanmuso la, i kana gɛrɛ a ka so da la,
[9] walisa i kana i barika di mɔgɔ wɛrɛw ma, ka i si tilew di mɔgɔ hinɛntan ma,
[10] walisa dunanw kana fa i ka nafolo la, i ka baara nafa kana don mɔgɔ wɛrɛ ka so kɔnɔ,
[11] walisa i kana nwunan i laban waati la, i farisogo ni i farikolo bɛ ban tuma min na,
[12] ani i kana na a fɔ ko: «Mun kosɔn ne banna laadili ma? Mun kosɔn ne dusukun ye kɔrɔfɔli mafiɲɛya?
[13] Ko mun kosɔn ne ma sɔn ka ne karamɔgɔw kan minɛ, ka ne tulo majɔ ka ne kalanbaaw ka kalan lamɛn?
[14] Ko ne tun bɛ ɲini ka halaki jamaba cɛma.»
[15] I ka i yɛrɛ ka kɔlɔnji min, ani ji min bɛ woyo ka bɔ i ka ji boyi la.
[16] I ka ji boyi ka kan ka woyo kɛnɛma, ka i ka kɔji woyo ka taa dugu bɔlɔnw la wa?
[17] A ka kɛ i kelenpe ta ye, i ni dunanw kana jɛ a la.
[18] I ka ji boyi ka duba sɔrɔ, i denmisɛnma muso ka kɛ i ɲagali sababu ye.
[19] A bɛ i ko minanmuso ɲuman, i ko sɔnmuso cɛɲi. A ka kanuya ka i wasa tuma bɛɛ, a ka kanuya ka i nisɔndiya tuma bɛɛ.
[20] Ne denkɛ, mun kosɔn i bɛ ɲɛ bɔ muso wɛrɛ fɛ, ka i bolo meleke muso wɛrɛ disi la?
[21] K'a masɔrɔ Matigi ɲɛ bɛ mɔgɔw ka siraw bɛɛ la, a bɛ u ka siraw bɛɛ kɔlɔsi.
[22] Mɔgɔ jugu na minɛ a ka tilenbaliya fɛ, a ka jurumu sirilanw na a yɛrɛ siri.
[23] A na sa a ka fililiw tɔɔrɔ fɛ, ka halaki a ka hakilintanyaba kosɔn.