[1] Solomani ka ntalenw. Denkɛ hakiliman bɛ a fa nisɔndiya, nka denkɛ hakilintan bɛ a ba dusu kasi.
[2] Tilenbaliya nafolo sɔrɔlen tɛ mɔgɔ nafa, nka tilennenya bɛ mɔgɔ kisi saya ma.
[3] Matigi tɛ sɔn mɔgɔ tilennen ka tɔɔrɔ kɔngɔ fɛ, nka a bɛ mɔgɔ jugu bali ka a diyaɲe fɛn sɔrɔ.
[4] Bolo salabaatɔ bɛ kɛ kɔlibaatɔ ye, nka min bɛ timinandiya baara la, o bɛ fɛntigiya.
[5] Mɔgɔ min bɛ suman lasagon suman tigɛ tuma la, o ye denkɛ hakiliman ye, nka denkɛ min bɛ sunɔgɔ suman tigɛ tuma la, o ye maloya ko ye.
[6] Duba bɛ mɔgɔ tilennen kan, nka mɔgɔ jugu da bɛ fariya kuma fɔ.
[7] Mɔgɔ tilennen ko bɛ to mɔgɔw kɔnɔ u bɛ duba ta a ye, nka mɔgɔ juguw tɔgɔ na toli.
[8] Mɔgɔ dusukun hakiliman bɛ lasɔmili kuma lamɛn, nka kuma kunntan fɔla na bi.
[9] Mɔgɔ min bɛ taama jɛlenya sira fɛ, o lakanalen na taama, nka min ka siraw dulen don, o na bɔ kɛnɛkan.
[10] Mɔgɔ min bɛ a ɲɛ nwunutigɛ, o bɛ ɲɛnasisi kow kɛ, ani kuma kunntan fɔla na bi.
[11] Mɔgɔ tilennen da ye ɲɛnamaya ji boyi ye, nka mɔgɔ jugu da bɛ juguya lawuli.
[12] Koniya bɛ kɛlɛ lawuli, nka kanuya bɛ hakɛw bɛɛ datugu.
[13] Hakilitigiya bɛ sɔrɔ mɔgɔ faamuyalen da la, nka hakilintan niyɔrɔ ye kololi bere ye.
[14] Hakilitigiw bɛ dɔnniya mara, nka hakilintan da ye bɔnɛ surunyalen de ye.
[15] Nafolotigi ka nafolo ye a ka dugu lamini kogo ye, nka kɔlibaatɔw ka faantanya bɛ u halaki.
[16] Mɔgɔ tilennen ka kɛwalew ye ɲɛnamaya ji boyi ye, nka mɔgɔ jugu ka tɔnɔ ye jurumu ye.
[17] Mɔgɔ min bɛ kalan lamɛn, o bɛ ɲɛnamaya sira kan, nka min bɛ ɲinɛ o kɔ, o tigi bɛ tunun.
[18] Mɔgɔ min bɛ koniya mara a dusu la, o dawolo bɛ nkalon tigɛ, min bɛ tɔgɔ tiɲɛnni kuma fɔ, o ye hakilintan ye.
[19] Mɔgɔ min bɛ kuma kojugu, jurumu tɛ dɛsɛ o la. Mɔgɔ min bɛ se a da la, o ye hakilitigi ye.
[20] Mɔgɔ tilennen nɛnkun bɛ i ko warijɛ yɛrɛwolo, nka mɔgɔ jugu dusukun ye fɛn kunntan ye.
[21] Mɔgɔ tilennen da bɛ mɔgɔ caman nafa, nka hakilintanw na sa u ka ko dɔnbaliya kosɔn.
[22] Matigi ka duba bɛ mɔgɔ fɛntigiya, tɔɔrɔ si tɛ fara o kan.
[23] Ko jugu kɛli ye hakilintan diyaɲeko ye, nka mɔgɔ hakiliman falen bɛ hakilitigiya la.
[24] Mɔgɔ jugu bɛ siran min ɲɛ, o na a sɔrɔ, nka Ala bɛ mɔgɔ tilennen sagona fɛn di a ma.
[25] Fununfunun bɛ tɛmɛn cogo min na, hakilintan bɛ ban o cogo la, nka mɔgɔ tilennen jusigilan tɛ tiɲɛn abada.
[26] Lemuru kumu ji bɛ min kɛ mɔgɔ ɲin la, sisi bɛ min kɛ mɔgɔ ɲɛ la, salabaatɔ bɛ o ɲɔgɔn kɛ a cibaaw la.
[27] Matigi ɲɛsiran bɛ si tile jan di mɔgɔ ma, nka mɔgɔ jugu si sanw bɛ dɔgɔya.
[28] Mɔgɔ tilennen jigi ye ɲagali de ye, nka mɔgɔ jugu jigi na tigɛ.
[29] Matigi ye mɔgɔ tilennen ka kɛlɛ kunbɛn so ye, nka a bɛ kojugukɛla halaki.
[30] Mɔgɔ tilennen tɛna lamaga abada, nka mɔgɔ jugu tɛna sigi dugukolo kan.
[31] Mɔgɔ tilennen da bɛ hakilitigiya bange, nka nɛnkun nkalontigɛla na tigɛ ka bɔ yen.
[32] Mɔgɔ tilennen da bɛ kuma fɔta dɔn, nka mɔgɔ juguw da bɛ nkalon tigɛ.