[1] Neje tɛ bɛn funteni tuma la cogo min na, sanji tɛ bɛn suman tigɛ tuma la cogo min na, bonyali tɛ bɛn hakilintan ma ten.
[2] Cɔrɔnin ni nanagalen bɛ pan san fɛ cogo min na, o cogo la danga tɛna na ni sababu t'a la.
[3] Gwɛɲɛ bilara yɛlɛnkan so kama, karafe bilara fali kama, kololi bere bilara hakilintanw kɔ kama.
[4] I kana hakilintan jaabi ka kɛɲɛ ni a ka hakilintanya ye, walisa i kana kɛ a bɔɲɔgɔnko ye.
[5] I ka hakilintan jaabi ka kɛɲɛ ni a ka hakilintanya ye, walisa a kana a yɛrɛ jate hakilitigi ye.
[6] Ni mɔgɔ min ye hakilintan ci, o bɛ a yɛrɛ sen tigɛ ka tɔɔrɔ min.
[7] Barika tɛ nabara senkalaw la cogo min na, hakilintan dala ntalen bɛ ten.
[8] Mɔgɔ min bɛ bonyali di hakilintan ma, o bɛ i ko mɔgɔ min bɛ bɛlɛ kisɛ bila ntanfura kɔnɔ.
[9] Hakilintan dala ntalen bɛ i ko nwɔni busan donnen dɔlɔtɔ bolo.
[10] Mɔgɔ min bɛ hakilintan bila baara la, ani min bɛ tɛmɛnbaaw bila baara la, o bɛ i ko kalatigi min bɛ mɔgɔw bɛɛ bon ka u jogin.
[11] Wulu bɛ segin a fɔɔnɔ kan cogo min na, hakilintan bɛ segin a ka hakilintanya ma o cogo la.
[12] Ni i ye mɔgɔ dɔ ye min bɛ miiri ko a ye hakilitigi ye, hakilintan ka fisa ni o ye.
[13] Salabaatɔ b'a fɔ ko: «Waraba bɛ sira la, waraba bɛ dugu bɔlɔnw na.»
[14] Dala kon bɛ taa ka segin kɛ cogo min na, salabaatɔ bɛ yɛlɛmayɛlɛma a ka dali dalan kan ten.
[15] Salabaatɔ bɛ a tɛgɛ don dumuni minan kɔnɔ, ka o kɔsegin a da la, o b'a sɛgɛn.
[16] Salabaatɔ bɛ miiri tuma bɛɛ ko hakilitigi don ka tɛmɛn mɔgɔ wolonwula kan, minw bɛ jaabili kɛ ni hakilitigiya ye.
[17] Sirafɛ tɛmɛnbaa min bɛ i sen don kɛlɛ la, k'a sɔrɔ a sen t'a la, o bɛ i ko mɔgɔ min bɛ wulu minɛ a tulow ma.
[18] Mɔgɔ min bɛ a sigiɲɔgɔn lafili k'a fɔ ko a bɛ tulɔn kɛ dɔrɔn, o bɛ i ko fatɔ min bɛ tamɔɲɔw ni biɲɛkisɛw ni saya kerun.
[20] Ni dɔgɔ dɛsɛra, tasuma bɛ sa, ni naafigi tɛ yen, kɛlɛ bɛ ban.
[21] Finfin bɛ kɛ takami ye, dɔgɔ bɛ kɛ tasuma mana ye, o cogo la mɔgɔ min bɛ sɔsɔli kɛ, o bɛ kɛlɛ juguya.
[22] Naafigi ka kumaw bɛ i ko dumuni fɛn timiman, u bɛ don ka se fo nugu la.
[23] Da ɲuman ni dusukun jugu bɛ i ko warijɛbo munlen bɔgɔ daga la.
[24] Mɔgɔ min bɛ mɔgɔ koniya, o bɛ nanbara kuma fɔ, nka juguya maralen bɛ a dusukun na.
[25] Ni a ye kuma duman fɔ, i kana da a la, k'a masɔrɔ ko haramulen wolonwula bɛ a dusukun na.
[26] Hali ni a bɛ a ka koniya bɛɛ datugu ni nanbara ye, a ka juguya na bɔ kɛnɛkan jama bɛɛ ɲɛ na.
[27] Ni mɔgɔ min ye dingɛ sen, o yɛrɛ na bi o kɔnɔ, kabakurun na kɔsegin a kolonkolonbaa ma.
[28] Nɛnkun lafilikɛla bɛ mɔgɔ minw dusu kasi, a bɛ olu koniya, da min bɛ kuma nugulen fɔ, o bɛ tiɲɛnni kɛ.