[1] Tɔgɔ ɲuman ka fisa ni nafolotigiya ye, mɔgɔ sɛbɛya ka fisa ni warijɛ ni sanu ye.
[2] Fɛntigi ni faantan bɛ ɲɔgɔn kunbɛn, Matigi de ye u fila bɛɛ da.
[3] Mɔgɔ kegun bɛ ko jugu natɔ ye ka i yɛrɛ dogo o la, nka hakilintan bɛ taa ɲɛ ka tɔɔrɔ sɔrɔ.
[4] Yɛrɛ majiginli ni Matigi ɲɛsiran, o tɔnɔ ye fɛntigiya ni nɔɔrɔ ni ɲɛnamaya de ye.
[5] Nwɔni ni janw bɛ mɔgɔ dulen ka sira kan, mɔgɔ min bɛ a ni kɔlɔsi, o bɛ i mabɔ u la.
[6] Denmisɛn ka kan ka sira min taama, i ka a kalan o la, hali ni a kɔrɔla, a tɛna o bila.
[7] Fɛntigi bɛ faantanw kun na, juru tabaa ye jurutigi ka jɔn ye.
[8] Mɔgɔ min bɛ tilenbaliya dan, o na juguya suman tigɛ, a ka juguya fanga na tiɲɛn.
[9] Mɔgɔ hinɛma na duba sɔrɔ, k'a masɔrɔ a bɛ a ka dumuni di faantanw ma.
[10] I ka nparabɔla gɛn, ni o kɛra, kɛlɛ na ban, wɔyɔ ni mafiɲɛyali na dabila.
[11] Dusukun jɛlen ko ka di mɔgɔ min ye, ni a bɛ hɛrɛ kuma fɔ, masakɛ na kɛ o teri ye.
[12] Matigi ɲɛ bɛ dɔnniya sɛbɛ mara, nka a bɛ nkalontigɛla ka kuma tiɲɛn.
[13] Salabaatɔ b'a fɔ ko waraba bɛ kɛnɛma, ko o na a faga dugu bɔlɔnw na.
[14] Dunanmusow da ye dingɛ dunba ye, Matigi diminna mɔgɔ min kɔrɔ, o na bi a kɔnɔ.
[15] Hakilintanya sirilen bɛ denmisɛn dusukun na, nka kololi bere bɛ o mabɔ a la.
[16] Mɔgɔ min bɛ i fanga digi faantanw na k'a yɛrɛ fɛntigiya, ani min bɛ fɛntigi sɔn, olu na kɔli.
[17] I tulo majɔ ka hakilitigiya kumaw lamɛn, i dusukun sin ne dɔnniya ma,
[18] k'a masɔrɔ o kow bɛɛ marali ka ɲi i dusukun na, u bɛɛ ka to i da la.
[19] Ne b'a fɛ ka i kalan bi, walisa i jigi ka to Matigi kan.
[20] Yala ne ma sɛbɛnni kɛ ni laadili ni faamuli ye e kosɔn,
[21] ka i kalan ko sɛbɛw ni tiɲɛ kumaw la wa? O kɛra walisa ni mɔgɔ dɔ ye i ci ka tiɲɛ ɲini, i ka se ka kunnafoni jɛlen kɔsegin o tigi ma.
[22] I kana faantan bolo fɛn minɛ sabu faantan don, i kana sɛgɛnbaatɔ tɔɔrɔ kiri la,
[23] k'a masɔrɔ Matigi ye u lafasabaa de ye, mɔgɔ minw bɛ u ka fɛnw bɔsi u la, a na olu faga.
[24] Mɔgɔ min dusu bɛ bɔ joona, i ni o kana jɛ, i kana taa mɔgɔ farinma fɛ,
[25] walisa i kana na a cogo ta ani o kana na kɛ i minɛli jan ye.
[26] Mɔgɔ minw bɛ layidu ta ɲɔgɔn ye, ka u tɛgɛ ci ɲɔgɔn tɛgɛ la, i kana don olu ka jɛ la, i kana kɛ juru seere ye.
[27] Ni fɛn tɛ i fɛ ka o sara, i ka dali dalan tɛna ta ka bɔ i kɔrɔ wa?
[28] I bɛnbaw ye dugukolo dan minw sigi, i kana olu dan kɔrɔw yɛlɛma.
[29] I ye mɔgɔ dɔ ye min bɛ se a ka baara la kosɛbɛ wa? O na baara kɛ masakɛ ye, nka a tɛna baara kɛ mɔgɔ gwansanw fɛ.