[1] Hakilitigiya tɛ pɛrɛn wa? Dɔnniya tɛ a kan bɔ wa?
[2] A jɔlen bɛ kulu jamanjanw kan sira da la sira fara yɔrɔw la.
[3] K'a to dugu dondaw la, dugu kɔnɔ mɔgɔw dondaw kɛrɛ fɛ, a bɛ pɛrɛn k'a fɔ ko:
[4] «Mɔgɔw, ne kan bɛ aw ma, Hadamadenw, ne kan bɛ aw bɛɛ ma.
[5] Nalonmaw, aw ka hakilitigiya kalan. Hakilintanw, aw ka hakili sɔrɔ.
[6] A' ye aw tulo majɔ k'a masɔrɔ ne bɛ kobaw fɔ, ne bɛ ne da yɛlɛ ka aw kalan ko tilennenw na,
[7] k'a masɔrɔ ne da bɛ tiɲɛ fɔ, ne dawolow bɛ juguya haramu.
[8] Ne dala kumaw bɛɛ tilennen don, nkalon wala lafilili kuma si t'a la.
[9] U bɛɛ jɛlen don mɔgɔ hakilitigi ɲɛ na, u tilennen don mɔgɔ ko dɔnna ɲɛ na.
[10] Aw ka ne ka kalan jate ka tɛmɛn warijɛ kan, ka dɔnniya jate ka tɛmɛn sanu yɛrɛwolo kan,
[11] k'a masɔrɔ hakilitigiya ka fisa ni kɔnɔnkisɛ sɔngɔ gɛlɛn ye. Mɔgɔ ɲɛ bɛ bɔ fɛn o fɛn fɛ, o si t'a bɔ.
[12] Ne, hakilitigiya kɔni, ne ni faamuli bɛ sigi ɲɔgɔn fɛ, ne bɛ hakilitigiw ka miiriliw sɔrɔ cogo dɔn.
[13] Matigi ɲɛsiran ye ko jugu haramuli ye. Kuncɛbaya ni yɛrɛjiranciya ni kɛwale juguw ni da nkalontigɛla si ko man di ne ye.
[14] Laadili ni ko ɲɛnabɔ cogo ɲuman ye ne ta ye, ne ye faamuli ye, sebaaya bɛ ne fɛ.
[15] Masakɛw bɛ masaya kɛ ne de barika la, kuntigiw fana bɛ sariya tilennenw sigi.
[16] Setigiw ni mɔgɔbaw ni dugukolo kan kiritigɛlaw bɛ sigi mɔgɔ kun na ne de barika la.
[17] Minw bɛ ne kanu, ne bɛ olu kanu, minw bɛ ne ɲini, olu bɛ ne sɔrɔ.
[18] Nafolotigiya ni nɔɔrɔ bɛ ne fɛ, ani fɛn ɲuman mɛntaw ani tilennenya.
[19] Ne nafa ka fisa ni sanu ye, hali sanu yɛrɛwolo, ne tɔnɔ ka fisa ni warijɛ yɛrɛwolo ye.
[20] Ne bɛ tilennenya sira taama, ne bɛ taama sira jɛlenw fɛ,
[21] walisa ka ne kanubaaw fɛntigiya ka u ka nafolo mara yɔrɔw fa.
[22] «Matigi ye ne da a ka kɛwalew daminɛ tuma la, sani a ka a ka kɛwale fɔlɔw kɛ.
[23] Ne dilara kabini fɔlɔfɔlɔ, sani dugukolo ka kɛ yen.
[24] Ne sɔrɔla k'a sɔrɔ dingɛ dunbaw ni ji boyibaw tun tɛ yen.
[25] Sani kuluw ka sigi, sani tintinw ka kɛ yen, ne tun bɛ.
[26] Sani Matigi ka dugukolo ni kungo kɔnɔna ani dugukolo buguri fɔlɔ da.
[27] A ye sankolo ju sigi tuma min na, ne tun bɛ yen. A ye dingɛ dunba danw sigi tuma min na,
[28] a ye sankaba kɛ san fɛ ka jibaw lawuli tuma min na, ne tun bɛ yen.
[29] A ye kɔgɔji dan yɔrɔ sigi tuma min na, kɔ jiw kana tɛmɛn o kan, a ye dugukolo ju sigi tuma min na, ne tun bɛ yen.
[30] O bɛɛ kɛra ka ne to a kɛrɛ fɛ a ka baara la. Ne tun bɛ a diyaɲeko kɛ don o don, ka ɲagali a ɲɛ kɔrɔ tuma bɛɛ.
[31] Ne ɲagalila a ka dugukolo dalen kosɔn, Hadamadenw kɛra ne diyaɲe fɛn ye.
[32] «Ayiwa sisan ne denkɛw, a' ye ne lamɛn. Minw bɛ ne ka siraw taama, olu ye dubadenw ye.
[33] A' ye ne ka kalan lamɛn walisa aw ka kɛ hakilitigiw ye, aw kana a bila.
[34] Mɔgɔ min bɛ ne lamɛn, ka sigi ne ka donda la don o don ka makɔnɔli kɛ, ka ne ka kondon jiriw kɔlɔsi, o ye dubaden ye,
[35] k'a masɔrɔ mɔgɔ min bɛ ne sɔrɔ, o tigi bɛ ɲɛnamaya sɔrɔ, Matigi na sɔn o ma.
[36] Nka min bɛ ne hakɛ ta, o bɛ a yɛrɛ ni hakɛ ta. Ne koniyabaaw bɛ saya kanu.»