[1] Kololi ka di mɔgɔ min ye, dɔnniya ko ka di o ye fana, nka kololi man di mɔgɔ min ye, o tigi ye hakilintan de ye.
[2] Mɔgɔ ɲuman ko ka di Matigi ye, nka a bɛ dabali jugukɛla jalaki.
[3] Juguya tɛ mɔgɔ sabati, nka mɔgɔ tilennenw dili tɛna lamaga.
[4] Muso sɛbɛ ye a cɛ ka masafugula de ye, nka min b'a cɛ maloya, o bɛ i ko a cɛ kolow tolilen don bana jugu fɛ.
[5] Mɔgɔ tilennen ka miirili ye tilennenya de ye, nka mɔgɔ jugu ka laadili ye nanbara de ye.
[6] Mɔgɔ jugu ka kumaw ye merunli ko ye mɔgɔ fagali kama, nka mɔgɔ tilennenw da bɛ mɔgɔw kisi.
[7] Mɔgɔ juguw bɛ halaki, foyi tɛ to u kɔ, nka mɔgɔ tilennenw ka so jɔlen na to.
[8] Mɔgɔ bɛ tanu ka kɛɲɛ ni a ka hakilitigiya ye, nka mɔgɔ kɔnɔna jugu na mafiɲɛya.
[9] Baaraden bɛ mɔgɔ min bolo k'a sɔrɔ a tɛ jate, o ka fisa ni mɔgɔ wasobanci ye k'a sɔrɔ dumuni tɛ a fɛ.
[10] Mɔgɔ tilennen bɛ a ka baganw mara ko ɲuman, nka mɔgɔ jugu ka hinɛ ye fariya ye.
[11] Mɔgɔ min bɛ a ka dugukolo sɛnɛ, o bɛ balo sɔrɔ, nka min bɛ tugu fɛn fufafu nɔ fɛ, o ye hakilintan ye.
[12] Mɔgɔ jugu ɲɛ bɛ bɔ kojugukɛlaw ka fɛn cɛlenw fɛ, nka mɔgɔ tilennenw dili bɛ nugu ka den kɛ.
[13] Mɔgɔ jugu ka juguya ye a yɛrɛ minɛli jan ye, nka mɔgɔ tilennen na kisi tɔɔrɔ ma.
[14] Mɔgɔ bɛ fa fɛn ɲumanw la a dala kuma tɔnɔ barika la. Mɔgɔw bɛɛ bɛ fɛn sɔrɔ ka kɛɲɛ ni u bolo baara ye.
[15] Hakilintan ka sira tilennen don a yɛrɛ ɲɛ na, nka mɔgɔ min bɛ laadilikan mɛn, o ye hakilitigi ye.
[16] Ni hakilintan diminna, i b'a dɔn o yɔrɔ nin bɛɛ, nka mɔgɔ hakiliman bɛ nenili kuma lɔminɛ.
[17] Seere tilennen bɛ tiɲɛ fɔ, nka seere nkalontigɛla bɛ nanbara kuma fɔ.
[18] Mɔgɔ dalafiɲɛ ka kuma bɛ joginni kɛ i ko tɛlɛ da duman, nka hakilitigi da bɛ kɛnɛyali kɛ.
[19] Dawolo tiɲɛ fɔla bɛ sabati tuma bɛɛ, nka nɛnkun nkalontigɛla bɛ ban ɲɛkɔmi ko kelen na.
[20] Mɔgɔ min bɛ bisigi jugu kɛ, o da bɛ lafilili kɛ, nka minw bɛ ko ɲuman laadili kɛ, olu bɛ ɲagali sɔrɔ.
[21] Bɔnɛ si tɛ mɔgɔ tilennen sɔrɔ, nka mɔgɔ juguw tɛ foyi sɔrɔ ni tɔɔrɔ tɛ.
[22] Matigi bɛ dawolo nkalontigɛla haramu, nka min bɛ taama jɛlenya sira fɛ, o tigi ko ka di a ye.
[23] Mɔgɔ kegun bɛ a ka dɔnniya dogo, nka hakilintanw dusukun bɛ u ka hakilintanya bɔ kɛnɛkan.
[24] Mɔgɔ min timinan ka di baara la, o na kuntigiya kɛ, nka salabaatɔ na bila diyagoya baara la.
[25] Hami ko bɛ mɔgɔ dusukun barika ban, nka kuma ɲuman bɛ a nisɔndiya.
[26] Mɔgɔ tilennen bɛ sira ɲuman jira a sigiɲɔgɔn na, nka mɔgɔ juguw ka siraw bɛ u lafili.
[27] Salabaatɔ tɛ a yɛrɛ ka sogo minɛlen jiran, nka timinandiya ye mɔgɔ ka nafoloba ye.
[28] Mɔgɔ tilennen ka sira ye ɲɛnamaya ye, saya tɛ a ka sira la.