[1] Mɔgɔ jugu keleya kana i minɛ, u nɔ fɛ taama nege kana kɛ i la,
[2] k'a masɔrɔ u dusukun bɛ miiri juguya ko la, u daw bɛ kuma juguw fɔ.
[3] So bɛ jɔ hakilitigiya barika la, a bɛ sabati dɔnniya barika la.
[4] A bonw bɛ fa fɛn ɲuman sɔngɔ gɛlɛnw ani fɛn dumanw na faamuli barika la.
[5] Mɔgɔ hakiliman barika ka bon, mɔgɔ ko dɔnna bɛ kɛ setigi ye.
[6] Mɔgɔ bɛ kɛlɛ kɛ ɲɛjirali sɛbɛ barika la, laadibaa caman b'a to, se bɛ sɔrɔ.
[7] Hakilitigiya yɔrɔ ka jan hakilintan na, a tɛ kuma jama cɛma.
[8] Mɔgɔ min bɛ ko jugu kɛ cogo miiri, o bɛ wele ko tiɲɛnnikɛla.
[9] Hakilintan ka miirili ye jurumu ye, nparabɔla haramulen bɛ Hadamadenw fɛ.
[10] Ni i ja tigɛra degun don na, i barika bɛ dɔgɔya.
[11] Minw bɛ faga, i ka olu tila, minw bɛ taa kan tigɛ yɔrɔ la, i ka olu kisi.
[12] Ni i ko: «An ma foyi dɔn o la,» min bɛ dusukun sɛgɛsɛgɛ, o tɛna o dɔn wa? Min bɛ i ni kisi, o tɛna o dɔn wa? A tɛna mɔgɔw bɛɛ kelen-kelen sara ka kɛɲɛ ni u ka kɛwalew ye wa?
[13] Ne denkɛ, i ka di dun sabu a ka ɲi, dinɔɔnɔ ka timi i da la cogo min na,
[14] dɔnniya ni hakilitigiya ka diya i ni ye ten. Ni i y'a sɔrɔ a bɛ i ka sini ko nɔgɔya, i jigi tɛna tigɛ.
[15] Mɔgɔ jugu, i kana i dogo mɔgɔ tilennen ka yɔrɔ la k'a kɛlɛ, i kana a sigiyɔrɔ tiɲɛn,
[16] k'a masɔrɔ mɔgɔ tilennen bɛ bi siɲɛ wolonwula, a bɛ wuli, nka bɔnɛ bɛ mɔgɔ jugu sɔrɔ joona.
[17] Ni i jugu bira, i kana ɲagali o la, ni a sen talonna, o kana i nisɔndiya,
[18] ni Matigi ye o ye, o tɛna diya a ye, a na a ka dimiya mabɔ o tigi la.
[19] I kana i yɛrɛ dusu tiɲɛn kojugukɛlaw kosɔn, mɔgɔ jugu keleya kana i minɛ,
[20] k'a masɔrɔ kojugukɛla tɛ sini sɔrɔ, mɔgɔ jugu ka yeelen na dufa.
[21] Ne denkɛ, i ka siran Matigi ni masakɛ ɲɛ, i ni murutilikɛlaw kana jɛ,
[22] k'a masɔrɔ halakili na cun u kan yɔrɔ nin kelen, Matigi ni masakɛ na bɔnɛ minw lase u ma, jɔni bɛ o dɔn?
[23] Hakilitigiya kuma wɛrɛw filɛ, ka mɔgɔ bɔ mɔgɔ la kiri ko la, o man ɲi.
[24] Mɔgɔ min b'a fɔ mɔgɔ jugu ye ko: «I tilennen don,» mɔgɔw na o danga, siyaw na o mangoya.
[25] Nka minw bɛ kɔrɔfɔ, olu na madiyali ni duba ɲuman sɔrɔ.
[26] Ka mɔgɔ dɔ jaabi ko ɲuman, a bɛ i ko i bɛ o tigi da susu.
[27] I ka i ka kɛnɛma baara bɛɛ ɲɛnabɔ ka i ka forow labɛn, o kɔ, i ka i ka so jɔ.
[28] I kana seereya jugu kɛ i mɔgɔɲɔgɔn kama gwansan, i b'a fɛ ka mɔgɔ lafili ni i ka kuma ye wa?
[29] I kan'a fɔ ko: «A ye min kɛ ne la, ne na o ɲɔgɔn kɛ a la, ko i na o tigi minɛ ka kɛɲɛ ni a ka kɛwalew ye.»
[30] Ne tɛmɛnna salabaatɔ ka foro kɛrɛ fɛ, ani hakilintan ka rezɛn nakɔ kɛrɛ fɛ.
[31] A filɛ, nwɔni falenna a yɔrɔ bɛɛ la, bin jugu ye a yɔrɔ bɛɛ datugu, a lamini kogo bira.
[32] Ne ye o ye tuma min na, ne ye ne jɔ ka miiri o la, o ye ne kalan.
[33] Ka sunɔgɔ dɔɔnin, ka jingɔ dɔɔnin, ka i bolo kolonso ka i da dɔɔnin,
[34] o cogo la kɔli na bi i kan i ko binkannikɛla, faantanya na cun i kan i ko kɛlɛkɛ cɛ labɛnnen.